У бацькі Курэйчыка пацвердзілі каранавірус. Ён адпачываў у санаторыі для міліцыі і заразіўся ад чалавека з Віцебска
Уладзімір Курэйчык, бацька беларускага рэжысёра Андрэя Курэйчыка, захварэў на каранавірус. 8 красавіка яго шпіталізавалі як кантакт першага ўзроўню. Сёння стала вядома пра станоўчы вынік тэста, паведамляе «Радыё Свабода».
«Яго перавялі ў чацвёртую бальніцу. Калі гэты тэст прыйшоў, яго вельмі хутка сабралі і з аднаго шпіталя перавезлі ў іншы. Яго суседа перавялі ў іншую палату. Стан у бацькі такі ж — не палепшаў і не пагоршаў. Тэмпература. На жаль, у яго, як і ў большасці людзей за 60, не вельмі моцнае здароўе, ёсць хранічныя захворванні», — кажа Андрэй Курэйчык.
Апошнім часам Андрэй Курэйчык не бачыўся з бацькам, бо ізаляваўся з сям’ёй за горадам.
«Тым родным, якія з бацькам жывуць, брату і яго жонцы, сказалі, што ім трэба перайсці на рэжым самаізаляцыі. Цяпер яны кантакты першага ўзроўню».
Уладзіміру Курэйчыку 66 год. У сакавіку ён адпачываў у санаторыі Міністэрства ўнутраных спраў на Нарачы. Аднаго з наведвальнікаў, з якім кантактаваў Курэйчык-старэйшы, шпіталізавалі з двухбаковай пнеўманіяй, а пасля выявілі каранавірус.
«Гэтай сітуацыі магло б не быць, — дадае Курэйчык. — Калі б быў нармальны каранцін у краіне, санаторыі павінны былі быць закрытыя. Бо там у асноўным пажылыя людзі, туды ездзяць за 50—60.
Там адзін хворы, зразумела, заражае ўсіх астатніх, бо яны разам робяць працэдуры, сядзяць за аднымі сталамі ў сталовай, ходзяць у адзін басейн. Калі там забралі чалавека з двухбаковай пнеўманіяй, я бацьку сказаў, што не проста так будзе».
У санаторыі МУС «Свабодзе» пацвердзілі, што ў іх быў госць з каранавірусам. Санаторый часова прыпыніў прыём наведвальнікаў.
«Так, пакуль нікога не прымаем і, хутчэй за ўсё, часова закрыемся», — сказала супрацоўніца санаторыя.
Паводле яе, інфікаваны — пенсіянер з Віцебска.
«Ён у нас два тыдні адпачываў: як выходзіў на балкон, усё на гармоніку граў», — дадалі ў санаторыі.
Цяпер чытаюць
Палякі купляюць дамы ў Беларусі — цікавяцца, ці хопіць на жыццё еўрапейскай пенсіі, і радуюцца смешным выдаткам6
Каментары