Віктар Каліна: Я напісаў гімн «Мы рускія, з намі Бог», а мяне ні за што збілі работнікі расійскай калоніі
Спявак Віктар Каліна апублікаваў крык душы — зварот да прэзідэнта Расіі Уладзіміра Пуціна.
Каліна наракае, што яго, на яго ж аграсядзібе, да паўсмерці збілі супрацоўнікі калоніі пасёлка Анохава Смаленскай вобласці Расіі. А пасля Каліну за гэта яшчэ і аштрафавалі!
Ліст Каліны філасофскі. Спачатку ён даказвае сваю любоў да Расіі — напісаў гімн «Мы рускія, з намі Бог», падтрымаў «ДНР», адпачывае ў Крыме, з'яўляецца прыхільнікам Пуціна. «Вы, Уладзімір Уладзіміравіч, найлепшае, што Бог даў Рускай зямлі і людзям Расіі», — прызнаецца спявак.
Дык вось, Каліна адкрыў аграсядзібу пад Смаленскам. Праўда, з гасцямі яму не надта шанцуе.
Улетку яго пабіла п'яная кампанія. За што? За партрэт Аляксандра Лукашэнкі на сцяне. Адзін з гасцей назваў яго Сталіным — і пачалося.
Апагей — святкаванне дня нараджэння супрацоўніцы выпраўленчай калоніі. Каліна кажа, што атрымаў удар бутэлькай шампанскага ззаду і я двойчы страціў прытомнасць. А п'яныя сілавікі тым часам штурмавалі яго дом.
Але пакараць супрацоўнікаў калоніі не атрымалася, бо паліцыя нібыта не змагла іх знайсці. Затое самога Каліну аштрафавалі на $15 за брыдкаслоўе. Спявак лічыць гэта прыніжэннем.
«Будучы грамадзянінам Беларусі і параўноўваючы дзве краіны і дзве мадэлі, магу сказаць, Беларусь на парадак вышэй па ўзроўні сацыяльнай абароненасці, абароненасці ад бязмежжа чыноўнікаў і сілавікоў … А ў Расіі тым часам народ памірае ад недаядання, хвароб, холаду і безнадзейнасці», — падсумоўвае Каліна.
Каментары