Гістарычны момант для Украіны: адбыўся аб'яднаўчы сабор памеснай украінскай царквы.
Сабор праходзіў у велічным кіеўскім саборы Святой Сафіі.
Сёння на аб'яднаўчым саборы ў Кіеве было прынята рашэнне пра стварэнне Украінскай аўтакефальнай царквы. Яе ўзначаліў 39-гадовы мітрапаліт Епіфаній.
Епіфаній (Сяргей Думенка) нарадзіўся ў 1979 г. у Адэскай вобласці. Належыць да Кіеўскага патрыярхата, доктар багаслоўя.
Менавіта яго кандыдатуру на пасаду кіраўніка аб'яднанай украінскай праваслаўнай царквы падтрымаў архіерэйскі сабор УПЦ КП, што прайшоў 13 снежня.
У сённяшнім саборы бралі ўдзел прадстаўнікі Украінскай праваслаўнай царквы Кіеўскага патрыярхата, Украінскай праваслаўнай царквы Маскоўскага патрыярхата і УАПЦ, узяў удзел і прэзідэнт Украіны Пятро Парашэнка. Кіраўнікі УПЦ КП і УАПЦ Філарэт і Макарый адмовіліся балатавацца на пасаду кіраўніка УПЦ.
Мяркуецца, што Украінская царква атрымае Томас (грамату аб незалежнасці) ад Усяленскага патрыярха 6 студзеня, перад Раством.
Памкненні Украіны да незалежнай царквы выклікалі шал у Расіі, а на Сінодзе РПЦ у Мінску 15 кастрычніка было нават заяўлена, што разрываюцца адносіны з Канстанцінопалем.
У свеце — 15 памесных праваслаўных цэркваў, г.зн. тых, што маюць аўтакефалію, або кіруюцца ў межах незалежнай дзяржавы. Згодна з канонам Канстанцінопальскага патрыярхата, гэта Канстанцінопальская, Александрыйская, Антыяхійская, Іерусалімская, Руская, Сербская, Румынская, Балгарская, Грузінская, Кіпрская, Эладская, Польская, Албанская, Чэшская і Славацкая. Да аўтаномных належаць Сінайская, Фінляндская, Эстонская. Не прызнае Канстанцінопаль Амерыканскую праваслаўную царкву.
Большасць з гэтых цэркваў кіруюцца патрыярхамі, некаторыя малалікія — мітрапалітамі ці архіепіскапамі.
Мітрапаліт Епіфаній нарадзіўся пад Адэсай, а вырас на Букавіне, у Чарнавіцкай вобласці. Ён мае рэпутацыю інтэлектуала.
Тысячы жыхароў Кіева сабраліся сёння на Сафійскай плошчы вітаюць сваю новую Царкву і яе іерарха.
Ці варта купляць закінутую хату за адну базавую і колькі гэта каштуе насамрэч? Вось што расказваюць людзі4
Каментары