Роўна год таму ў Беларусі пачаўся продаж квіткоў на канцэрт, якога прыхільнікам прыйдзецца чакаць… 16 месяцаў! Тысячы прададзеных білетаў, чэргі каля «Мінск-Арэны» і раптам — адмена шоу і бальніца хуткай дапамогі, у якую трапіў з атручваннем саліст Depeche Mode Дэйв Гаан. Як гэты час перажылі беларускія прыхільнікі «дэпешаў» і ці захавалі квіткі-артэфакты, якія будуць дзейнічаць і на канцэрце 13 лютага?
Задаць гэтыя і іншыя пытанні аб вечнай любові да легендарнага гурта мы вырашылі тых, хто купіў квіткі ў першы ж дзень продажаў. Дарэчы, сярод тых, хто адхопіць квіток сёння, 12 кастрычніка 2017, агенцтва «Атам М» разыграе meet'n'greet, то бок сустрэчу з гуртом Depeche Mode. Пераможца будзе выбраны выпадковым чынам.
Максім Самусенка, інжынер: «Я не цягну з мерапрыемствамі, якія мне цікава наведаць, і адразу ж купляю на іх квіткі. Такая ж сітуацыя была з канцэртам DM. На шоу я збіраўся ісці з калегам, які таксама купіў квіток адным з першых. Адмена канцэрта «дэпешаў» у маім жыцці здарылася не ў першы раз. Памятаеце, у адным з мінулых тураў у Дэйва была аперацыя і канцэрты, якія павінны былі адбыцца ў Балтыцы, адмянілі. Да такіх падзей я стаўлюся па-філасофску — спачатку, вядома, быў у шоку, потым супакоіўся, захаваў білет і вось збіраюся ўсё-ткі патрапіць на канцэрт у лютым».
Надзея Гудвіловіч, юрыст: «На канцэрт DM я планавала пайсці з сяброўкай. Меркавалася, што квіток будзе маім падарункам ёй на дзень нараджэння. Хацелася трапіць у фан-зону, таму я спяшалася і купіла квіткі ў першы ж дзень. Нічога не прадракала бяды, я спецыяльна раней вярнулася з адпачынку ў Егіпце і ўзяла выходны на наступны пасля канцэрту дзень. Мы прыехалі да «Мінск-Арэны» загадзя. Усе былі ў прадчуванні, спявалі песні, смяяліся. Памятаю, як я падышла да кіёска купіць вады і прадавец сказаў мне, што толькі што прачытаў на афіцыйным сайце DM, што канцэрту не будзе. Так атрымалася, што я першай паведаміла гэтую сумную навіну ў чарзе. Мужчына ў майцы з партрэтам Дэйва расплакаўся. І трэба прызнаць, ён быў не самотны. Мы з сяброўкай пайшлі заліваць гора і праз пару дзён здалі квіткі. Былі на эмоцыях, напэўна. У найбліжэйшыя дні я купляю новы білет, таму што ўсе стадыі прыняцця сітуацыі прайшлі, а жаданне патрапіць на канцэрт засталося».
Алена, намеснік дэкана: «Depeche Mode — гэта лёсавызначальны гурт для нашай сям'і. Я пачала слухаць DM у 90-я, бо мой старэйшы брат быў вялікім прыхільнікам. У 2013 годзе, калі музыкі ўпершыню прыехалі ў Мінск, мы з мужам не змаглі пайсці на канцэрт, бо я чакала дзіця. Тады здавалася, што рэклама і размовы сяброў аб будучым канцэрце проста пераследуюць мяне. Пайсці вельмі хацелася, але што зробіш — трэба было расстаўляць прыярытэты. У 2014 годзе мы ўсё ж такі трапілі на канцэрт і засталіся пад вялікім уражаннем, таму, як толькі была абвешчаная дата апошняга канцэрта, я папрасіла мужа купіць квіткі. І што ж вы думаеце? Літаральна за 2 дні да выступу лекар сказаў мне, што мы зноў станем бацькамі. Квіткі прыйшлося здаць. Няхай фанаты закідалі мяне памідорамі, але я была рада, што канцэрт адмянілі. А я б проста абзайдросцілася! Я вельмі спадзявалася, што канцэрт будзе ў сакавіку, каб паспець нарадзіць і ўсё-такі пайсці, але і прыхільнікаў вельмі добра разумею: яны гэтага сапраўды чакалі!»
Таццяна Нінальд, галоўны бухгалтар: «Я проста фанат DM з 1989 года. Не аднойчы была на канцэртах, неяк раз нават у Кіеў спецыяльна паехала. Купілі квіткі на шоу ў Мінску ў першы ж дзень — а чаго цягнуць? Я жыву ў Барысаве, і ў Мінск прыехала спецыяльна на гэтае шоу. Стаяла, як і ўсе, у чарзе, раптам пачула, што канцэрт адменены ў сувязі з хваробай Дэйва. Ніхто не паверыў, вядома, казалі, што гэта нейкая памылка. Што я ў выніку рабіла ў той вечар? Навушнікі ў вушы і, галаву павесіўшы, назад дадому — сапраўдны фанат-псіх-адзіночка. Квіткі і не думала здаваць, ведала, што праблема вырашыцца і Д.М. ўсё-ткі выступіць у Беларусі. Я вельмі шчаслівая, што канцэрт прызначаны на люты і чакаю яго з нецярпеннем».
Аляксандр Макараў, вядучы эканаміст: «Я купіў квіток на канцэрт у першы ж дзень, таму што добра памятаў, як зала не змясціла ўсіх ахвотных у 2013 годзе. Я люблю Д.М., дакладна ведаю, што пайду, таму сэнс адкладаць куплю білета не бачыў. Калісьці я быў у мінскім фан-клуб DM, у мяне нават захавалася сяброўская карта. З тых часоў засталося шмат сяброў, такіх жа прыхільнікаў творчасці Дэйва, як і я. Як правіла, разам мы і ездзім на канцэрты. Калі даведаліся, што мінскае шоу адмяняецца, адразу ж вырашылі ехаць у любую іншую краіну, дзе яно ўсё ж адбудзецца. Квіткі ў Варшаве да таго часу ўжо скончыліся, таму думалі рвануць у Франкфурт. Добра, што канцэрт усё-такі адбудзецца і ехаць нікуды не трэба».
Дэйв Гаан, мяркуючы па ўсім, таксама ніяк не можа забыцца на свой апошні візіт у Мінск. Спецыяльна для прыхільнікаў з Беларусі музыка запісаў відэа, у якім просіць даць яму другі шанс.
Арганізатары канцэрту, агенцтва «Атам М», у сваю чаргу трымаюць кулачкі і спадзяюцца, што лютаўскае шоу пройдзе бездакорна. Дарэчы, за гэты час па ТБ прайшло 4334 рэкламныя ролікі аб Depeche Mode, якія ў агуламі прагледзелі 255 мільёнаў разоў. Іншымі словамі, кожны беларус паглядзеў відэа мінімум 25 разоў. «Калі шчыра, я да гэтага часу не магу ацаніць, добра для нас гэта ці дрэнна. Мы цяпер у стане «паспрабуйце хадзіць у маім абутку». Я адразу хацеў рабіць канцэрт DM у Беларусі ў лютым, у другой частцы тура. Ну вось, што хацеў, тое і атрымаў. Думкі матэрыяльныя! Катастрофы няма, ёсць жыццё, у якім бываюць выпрабаванні. Хочацца хутчэй правесці гэты канцэрт. Так доўга — паўтара года! — мы квіткі на канцэрт яшчэ ніколі не прадавалі. Але DM — мой любімы гурт, і яго канцэртамі я гатовы займацца вечна і нават у наступным жыцці, — распавёў дырэктар «Атам М» Андрэй Аляксееў.
Доўгачаканы канцэрт Depeche Mode пройдзе 13 лютага ў «Мінск-Арэне». Пачатак у 20.00. Кошт квіткоў ад 80 да 320 рублёў. Усе квіткі, набытыя на канцэрт, які павінен быў прайсці ў ліпені, сапраўдныя. Набыць квіткі можна на сайце арганізатара мерапрыемства — канцэртнага агенцтва «Атам М» (без камісіі), на сайтах білетных аператараў, а таксама ў касах горада.
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3
Каментары