«Mužčyna ŭ majcy z partretam Dejva raspłakaŭsia». Jak heta — čakać kancerta Depeche Mode paŭtara hoda

Roŭna hod tamu ŭ Biełarusi pačaŭsia prodaž kvitkoŭ na kancert, jakoha prychilnikam pryjdziecca čakać… 16 miesiacaŭ! Tysiačy pradadzienych biletaŭ, čerhi kala «Minsk-Areny» i raptam — admiena šou i balnica chutkaj dapamohi, u jakuju trapiŭ z atručvańniem salist Depeche Mode Dejv Haan. Jak hety čas pieražyli biełaruskija prychilniki «depiešaŭ» i ci zachavali kvitki-artefakty, jakija buduć dziejničać i na kancercie 13 lutaha?

Zadać hetyja i inšyja pytańni ab viečnaj lubovi da lehiendarnaha hurta my vyrašyli tych, chto kupiŭ kvitki ŭ pieršy ž dzień prodažaŭ. Darečy, siarod tych, chto adchopić kvitok siońnia, 12 kastryčnika 2017, ahienctva «Atam M» razyhraje meet'n'greet, to bok sustreču z hurtom Depeche Mode. Pieramožca budzie vybrany vypadkovym čynam.

Maksim Samusienka, inžynier: «Ja nie ciahnu ź mierapryjemstvami, jakija mnie cikava naviedać, i adrazu ž kuplaju na ich kvitki. Takaja ž situacyja była z kancertam DM. Na šou ja źbiraŭsia iści z kaleham, jaki taksama kupiŭ kvitok adnym ź pieršych. Admiena kancerta «depiešaŭ» u maim žyćci zdaryłasia nie ŭ pieršy raz. Pamiatajecie, u adnym ź minułych turaŭ u Dejva była apieracyja i kancerty, jakija pavinny byli adbycca ŭ Bałtycy, admianili. Da takich padziej ja staŭlusia pa-fiłasofsku — spačatku, viadoma, byŭ u šoku, potym supakoiŭsia, zachavaŭ bilet i voś źbirajusia ŭsio-tki patrapić na kancert u lutym».

Pavialičyć

Nadzieja Hudviłovič, juryst: «Na kancert DM ja płanavała pajści ź siabroŭkaj. Mierkavałasia, što kvitok budzie maim padarunkam joj na dzień naradžeńnia. Chaciełasia trapić u fan-zonu, tamu ja śpiašałasia i kupiła kvitki ŭ pieršy ž dzień. Ničoha nie pradrakała biady, ja śpiecyjalna raniej viarnułasia z adpačynku ŭ Jehipcie i ŭziała vychodny na nastupny paśla kancertu dzień. My pryjechali da «Minsk-Areny» zahadzia. Usie byli ŭ pradčuvańni, śpiavali pieśni, śmiajalisia. Pamiataju, jak ja padyšła da kijoska kupić vady i pradaviec skazaŭ mnie, što tolki što pračytaŭ na aficyjnym sajcie DM, što kancertu nie budzie. Tak atrymałasia, što ja pieršaj paviedamiła hetuju sumnuju navinu ŭ čarzie. Mužčyna ŭ majcy z partretam Dejva raspłakaŭsia. I treba pryznać, jon byŭ nie samotny. My ź siabroŭkaj pajšli zalivać hora i praz paru dzion zdali kvitki. Byli na emocyjach, napeŭna. U najbližejšyja dni ja kuplaju novy bilet, tamu što ŭsie stadyi pryniaćcia situacyi prajšli, a žadańnie patrapić na kancert zastałosia».

Alena, namieśnik dekana: «Depeche Mode — heta losavyznačalny hurt dla našaj siamji. Ja pačała słuchać DM u 90-ja, bo moj starejšy brat byŭ vialikim prychilnikam. U 2013 hodzie, kali muzyki ŭpieršyniu pryjechali ŭ Minsk, my z mužam nie zmahli pajści na kancert, bo ja čakała dzicia. Tady zdavałasia, što rekłama i razmovy siabroŭ ab budučym kancercie prosta pieraśledujuć mianie. Pajści vielmi chaciełasia, ale što zrobiš — treba było rasstaŭlać pryjarytety. U 2014 hodzie my ŭsio ž taki trapili na kancert i zastalisia pad vialikim uražańniem, tamu, jak tolki była abvieščanaja data apošniaha kancerta, ja paprasiła muža kupić kvitki. I što ž vy dumajecie? Litaralna za 2 dni da vystupu lekar skazaŭ mnie, što my znoŭ staniem baćkami. Kvitki pryjšłosia zdać. Niachaj fanaty zakidali mianie pamidorami, ale ja była rada, što kancert admianili. A ja b prosta abzajdrościłasia! Ja vielmi spadziavałasia, što kancert budzie ŭ sakaviku, kab paśpieć naradzić i ŭsio-taki pajści, ale i prychilnikaŭ vielmi dobra razumieju: jany hetaha sapraŭdy čakali!»

Taćciana Ninald, hałoŭny buchhałtar: «Ja prosta fanat DM z 1989 hoda. Nie adnojčy była na kancertach, niejak raz navat u Kijeŭ śpiecyjalna pajechała. Kupili kvitki na šou ŭ Minsku ŭ pieršy ž dzień — a čaho ciahnuć? Ja žyvu ŭ Barysavie, i ŭ Minsk pryjechała śpiecyjalna na hetaje šou. Stajała, jak i ŭsie, u čarzie, raptam pačuła, što kancert admienieny ŭ suviazi z chvarobaj Dejva. Nichto nie pavieryŭ, viadoma, kazali, što heta niejkaja pamyłka. Što ja ŭ vyniku rabiła ŭ toj viečar? Navušniki ŭ vušy i, hałavu paviesiŭšy, nazad dadomu — sapraŭdny fanat-psich-adzinočka. Kvitki i nie dumała zdavać, viedała, što prablema vyrašycca i D.M. ŭsio-tki vystupić u Biełarusi. Ja vielmi ščaślivaja, što kancert pryznačany na luty i čakaju jaho ź nieciarpieńniem».

Pavialičyć

Alaksandr Makaraŭ, viadučy ekanamist: «Ja kupiŭ kvitok na kancert u pieršy ž dzień, tamu što dobra pamiataŭ, jak zała nie źmiaściła ŭsich achvotnych u 2013 hodzie. Ja lublu D.M., dakładna viedaju, što pajdu, tamu sens adkładać kuplu bileta nie bačyŭ. Kaliści ja byŭ u minskim fan-kłub DM, u mianie navat zachavałasia siabroŭskaja karta. Z tych časoŭ zastałosia šmat siabroŭ, takich ža prychilnikaŭ tvorčaści Dejva, jak i ja. Jak praviła, razam my i jeździm na kancerty. Kali daviedalisia, što minskaje šou admianiajecca, adrazu ž vyrašyli jechać u lubuju inšuju krainu, dzie jano ŭsio ž adbudziecca. Kvitki ŭ Varšavie da taho času ŭžo skončylisia, tamu dumali rvanuć u Frankfurt. Dobra, što kancert usio-taki adbudziecca i jechać nikudy nie treba».

Dejv Haan, miarkujučy pa ŭsim, taksama nijak nie moža zabycca na svoj apošni vizit u Minsk. Śpiecyjalna dla prychilnikaŭ ź Biełarusi muzyka zapisaŭ videa, u jakim prosić dać jamu druhi šans.

Arhanizatary kancertu, ahienctva «Atam M», u svaju čarhu trymajuć kułački i spadziajucca, što lutaŭskaje šou projdzie biezdakorna. Darečy, za hety čas pa TB prajšło 4334 rekłamnyja roliki ab Depeche Mode, jakija ŭ ahułami prahledzieli 255 miljonaŭ razoŭ. Inšymi słovami, kožny biełarus pahladzieŭ videa minimum 25 razoŭ. «Kali ščyra, ja da hetaha času nie mahu acanić, dobra dla nas heta ci drenna. My ciapier u stanie «pasprabujcie chadzić u maim abutku». Ja adrazu chacieŭ rabić kancert DM u Biełarusi ŭ lutym, u druhoj častcy tura. Nu voś, što chacieŭ, toje i atrymaŭ. Dumki materyjalnyja! Katastrofy niama, jość žyćcio, u jakim byvajuć vyprabavańni. Chočacca chutčej pravieści hety kancert. Tak doŭha — paŭtara hoda! — my kvitki na kancert jašče nikoli nie pradavali. Ale DM — moj lubimy hurt, i jaho kancertami ja hatovy zajmacca viečna i navat u nastupnym žyćci, — raspavioŭ dyrektar «Atam M» Andrej Alaksiejeŭ.

Doŭhačakany kancert Depeche Mode projdzie 13 lutaha ŭ «Minsk-Arenie». Pačatak u 20.00. Košt kvitkoŭ ad 80 da 320 rubloŭ. Usie kvitki, nabytyja na kancert, jaki pavinien byŭ prajści ŭ lipieni, sapraŭdnyja. Nabyć kvitki možna na sajcie arhanizatara mierapryjemstva — kancertnaha ahienctva «Atam M» (biez kamisii), na sajtach biletnych apierataraŭ, a taksama ŭ kasach horada.

• 0
• 0
• 0
• 0
• 0
• 0
• 0
• 0