Armianina, jaki siadzić bolš za 20 hadoŭ za stvareńnie ŭ Homieli złačynnaj hrupoŭki, asudzili jašče za try žorstkija zabojstvy

Pra historyju «SB» raskazali va ŭpraŭleńni Śledčaha kamiteta pa Homielskaj vobłaści.

Trup mytnika

Ranicaj 14 krasavika 2002 hoda ŭ Homieli vypadkovy minak znajšoŭ trup mužčyny. Šmatlikija traŭmy pakazvali na hvałtoŭny charaktar śmierci. Niepadalok valalisia častki małatka, a taksama niekalki kamianioŭ ź plamami kryvi. Ekśpiertyza ŭstanaviła, što hetyja pradmiety stali pryładaj zabojstva, ździejśnienaha mienš za sutki tamu.

Zahinułym akazaŭsia 35-hadovy Ihar Małyšaŭ (imiony i proźviščy fihurantaŭ źmienieny), jaki pracavaŭ inśpiektaram Homielskaj mytni. Napiaredadni viečaram jon viartaŭsia ad baćkoŭ, jakija žyli niepadalok. Pierad hetym patelefanavaŭ žoncy i skazaŭ, što chutka budzie doma. Mabilnik Ihara, na jaki sprabavała datelefanavacca žonka, znachodziŭsia pry im. A voś kurtka i partmane źnikli.

Raskryć spravu tady nie ŭdałosia.

Čarhovy raz da jaje viarnulisia ŭ śniežni 2022 hoda.

Padazravany znajšoŭsia ŭ kałonii

U pracesie asablivuju ŭvahu pryciahnuŭ piersanaž pa imi Avak Kaśjan — hramadzianin Armienii, jaki pasialiŭsia kaliści ŭ Biełarusi i mieŭ burnaje kryminalnaje minułaje. Šukać jaho nie spatrebiłasia, pakolki 62-hadovy Kaśjan užo bolš za 20 hadoŭ adbyvaŭ pakarańnie za stvareńnie złačynnaj hrupy i sieryju ździejśnienych joju razbojaŭ. Adzin z napadaŭ skončyŭsia zabojstvam paciarpiełaha, druhi ledź vyžyŭ.

U kałonii znachodziŭsia i eks-udzielnik bandy Anatol Mitrochin. Jašče šmat hadoŭ tamu jon abmoviŭsia, što da zabojstva mytnika (i nie tolki) datyčny Kaśjan. Ale tady infarmacyja nie znajšła paćviardžeńnia.

Ciapier, kali Mitrochina pačali dapytvać znoŭ, jon pryznaŭsia, što prysutničaŭ u momant ździajśnieńnia zabojstva Kaśjanam, jaki da hetaha prapanoŭvaŭ mytniku naładzić kanał kantrabandnych pastavak. Adnak toj admoviŭ kryminalniku.

Avak vyrašyŭ pakvitacca. U pamočniki ŭziaŭ Mitrochina, skazaŭšy, što źbirajecca «prosta pahavaryć» ź inśpiektaram. Ale zamiest hetaha napaŭ sa śpiny, nanosiačy ŭdary małatkom z takoj siłaj, što toj złamaŭsia. Paśla čaho dabivaŭ achviaru kamianiami. 

Bajučysia stać nastupnaj achviaraj, šakavany i pierapałochany Mitrochin dapamoh pieraciahnuć trup.

Dokazam stali ślady pachu

Zrešty, dla pradjaŭleńnia abvinavačvańnia hetaha było niedastatkova. Sam ža Kaśjan, jakomu nieŭzabavie treba było vyzvalacca, kateharyčna ŭsio admaŭlaŭ. 

Dadatkovuju ŭliku dała alfaktarnaja ekśpiertyza — heta mietad daśledavańnia śladoŭ pachu, zasvojeny śpiecyjalistami paraŭnalna niadaŭna. Na kanfiskavanych ź miesca złačynstva i ŭpakavanych pradmietach pach zachavaŭsia navat praz dva dziesiacihodździ. Nadziejnym kansiervantam pasłužyła kroŭ achviary, ź jakoj pry naniasieńni udaraŭ źmiašalisia pot i pach, jakija vydzialajucca dałońniu zabojcy.

Ekśpiertyza paćvierdziła: na małatku i kamianiach prysutničaŭ pach Avaka Kaśjana. U toj čas jak ad Anatola Mitrochina pachu nie było, što paćviardžała jaho apovied — udaraŭ jon nie nanosiŭ.

Novyja strašnyja zabojstvy

U liku inšaha Mitrochin raspavioŭ, jak padčas vypiŭki zachmialeły Kaśjan abmoviŭsia pra adnu sa svaich ciomnych spraŭ. Havorka išła pra niejkuju dziaŭčynu, jakaja mieła nachabstva admović jamu ŭ seksie. I tady Avak razam z pryjacielem «sucišyŭ jaje nazaŭždy». U inšy raz armianin pakazaŭ Mitrochinu na adzin z damoŭ u Savieckim rajonie Homiela. I skazaŭ, što tam razam ź siabram jon zabiŭ piensijanierku.

Znajšlisia i inšyja śviedki, uklučajučy byłych saŭdzielnikaŭ Kaśjana.

U krasaviku 1997‑ha ŭ Homieli sapraŭdy była znojdziena miortvaj 19-hadovaja dziaŭčyna, jakuju pierad śmierciu zhvałtavali. Uvosień taho ž hoda ŭ svajoj kvatery zabili piensijanierku. Abodva złačynstvy zastavalisia nieraskrytymi.

Ich rasśledavańnie adnavili. Źjaviŭsia jašče adzin piersanaž — 46‑hadovy Arciom Antonaŭ. Pałovu z pražytych hadoŭ jon pravioŭ u kałonii za zabojstva, saŭdzielnicaj u jakim stała jaho žonka. Razam jany pryjšli da žančyny, jakaja pa abjavie ŭ haziecie pradavała šviejnuju mašynku. Ale kuplać jaje nie źbiralisia. Antonaŭ napaŭ na haspadyniu i staŭ nanosić udary nažom. A zatym muž i žonka pačali pakavać rečy ŭ sumki.

Huki raspravy pačuŭ muž achviary, ź jakim jana razmaŭlała pa haradskim telefonie i, kali pajšła adčyniać dźviery «pakupnikam», nie pakłała słuchaŭku na aparat. Muž vyklikaŭ milicyju — Antonavych zatrymali prosta ŭ kvatery.

Za zabojstva z asablivaj žorstkaściu Arciom atrymaŭ 25 hadoŭ kałonii, a jaho žonka — 15. U 2021-m, na dva hady raniej za termin, Arciom vyzvaliŭsia.

Na dopycie jon pryznaŭ, što ŭ 1990-ja, jašče da svajoj pasadki, byŭ znajomy z Avakam Kaśjanam. Ale pra jaho złačynstvy zusim nie ŭ kursie. Pry hetym było prykmietna: Antonaŭ niervujecca i niešta chavaje.

U niejki momant Antonava prymusili zahavaryć. Spačatku jon pryznaŭsia, što prysutničaŭ pry zabojstvie piensijanierki. Nibyta da jaje jany z Kaśjanam pryjšli, kab zabrać hrašovy doŭh. Ale haspadynia jaho admaŭlała i stała vyhaniać vizicioraŭ. Tady Avak vychapiŭ nož i pačaŭ nanosić udary. Antonaŭ, ź jaho słoŭ, sprabavaŭ spynić tavaryša i atrymaŭ ranieńnie ruki. Paśla čaho, ściakajučy kryvioj, dabieh da znajomaj, jakaja pieraviazała ranu.

Antonava taksama nastojliva raspytvali pra zabojstva 19-hadovaj dziaŭčyny. Adniekvajučysia spačatku, jon raptam pryznaŭ: tak, Kaśjan raspavioŭ, što zabiŭ jaje, a trup pakinuŭ u susiednim ad jaho doma dvary.

Hienom DNK Antonava supaŭ z tym, jaki vyjavili na kurtcy zabitaj dziaŭčyny. Imkliva pieratvarajučysia ŭ padazravanaha, śviedka raskazaŭ, jak usio było nasamreč.

Heta zabojstva zdaryłasia ŭ jaho na vačach u jaho kvatery. Budučuju achviaru tudy pryviali Kaśjan i jaho siabar. Jany ž jaje zhvałtavali i zadušyli. A jon z-za strachu pierad raspravaj byŭ vymušany dapamahać pazbavicca ad trupa. Vidać, tady jaho bijałahičny śled i zastaŭsia na kurtcy. U paćviardžeńnie Antonaŭ navat nazvaŭ nibyta druhoha z zładziejaŭ, pakazaŭšy na realna isnujučaha čałavieka. Toj usio admaŭlaŭ i biez vahańniaŭ zdaŭ uzory kryvi na ekśpiertyzu. Jaje vyniki paćvierdzili niedatyčnaść da złačynstva.

Vyśvietliłasia, što Antonaŭ prypisvaŭ hetamu znajomamu tyja dziejańni, jakija ździajśniaŭ sam.

Dziaŭčynie prapanavali seks utroch, a paśla zabili

A było ŭsio tak. U hości da Antonava Kaśjan pryjšoŭ ź junaj znajomaj. Usie razam vypivali. U razhar viesiałości dziaŭčynie prapanavali seks utroch, adnak taja admoviłasia. Tady jaje zhvałtavali i stali zabivać. Kaśjan dušyŭ, a Antonaŭ utrymlivaŭ. Zatym, užo miortvuju, apranuli i vynieśli trup u susiedni dvor.

Antonaŭ taksama pryznaŭsia, što i pry zabojstvie piensijanierki nie prosta prysutničaŭ, ale i aktyŭna ŭdzielničaŭ.

Matyvam zabojstva pasłužyła rabavańnie. Da piensijanierki jany pryjšli, viedajučy, što taja źbiraje hrošy. I jany sapraŭdy byli — bolš za 4000 dalaraŭ, za jakija ŭ toj čas u Homieli možna było kupić dobruju kvateru. Voś tolki nadziejna schavanuju valutu zabojcy tak i nie znajšli.

U telefonie Antonava znajšli taksama pierapiski seksualnaha charaktaru ź niapoŭnahadovymi.

U červieni ŭ Homielskim abłasnym sudzie byŭ vyniesieny prysud. Abodva fihuranty pryznanyja vinavatymi ŭ inkryminavanych im złačynstvach. Avak Kaśjan prysudžany da pazbaŭleńnia voli na 25 hadoŭ u papraŭčaj kałonii strohaha režymu. Arciom Antonaŭ adpravicca tudy ž na 20 hadoŭ. Taksama sudom pastanoŭlena spahnać ź ich kampiensacyju maralnaj škody na karyść paciarpiełych (svajakoŭ achviar) na ahulnuju sumu 300 tysiač rubloŭ.

• 1
• 0
• 0
• 0
• 1
• 0
• 2
• 0