Ukrainski sałdat uratavaŭsia z akružeńnia na elektrarovary, jaki jamu skinuli z drona
Bajec USU, atrymaŭšy ciažkaje ranieńnie na froncie, vybraŭsia z akružeńnia na elektrarovary. Transpart jamu dastavili prosta na pieradavuju z dapamohaj drona. Apieracyju praviali bajcy ŭkrainskaha bataljona «Rubiež».
Jak raspavioŭ małodšy lejtenant Mikałaj Hrycenka, načalnik štaba bryhady, bajec z pazyŭnym «Tankist» byŭ adzinym žyvym siarod čatyroch ukrainskich sałdat, jakija trymali hetu pazicyju. Jon zastavaŭsia adzin na hetaj pazicyi kala 5 dzion i byŭ całkam akružany — «vorah byŭ śpieradu, zzadu i na abodvuch fłanhach, paviedamlaje UNIAN.
«Padjechać tudy na technicy niemahčyma, bo ŭsiudy vorah. Vyjści samastojna jon taksama nie moh, bo da bližejšaj pazicyi jamu treba było iści paŭtara kiłamietra. U jaho stanie, z ranieńniami nižnich kaniečnaściej, jon by prosta nie dajšoŭ», — raspavioŭ Hrycenka.
Hrycenka skazaŭ, što jaho kamanda raspracavała płan evakuacyi, jaki praduhledžvaŭ dastaŭku elektrarovara da pazicyi źniasilenaha sałdata z dapamohaj ciažkich dronaŭ — typu «Vampir» abo «Heavy Shot».
Vialikaj prablemaj była vaha. Tak, elektrarovar važyć kala 40 kiłahramaŭ. Takija drony, jak «Vampir» abo «Kažan», ciahnuć da 15 kiłahramaŭ, «Heavy Shot» — moža ciahnuć 40, ale pry hetym dalokaść palotu skaračajecca prykładna da 2 kiłamietraŭ.
Hrycenka paviedamiŭ, što było niekalki niaŭdałych sprob dastaŭki. Pieršy dron byŭ źbity razam z rovaram, a druhi raźbiŭsia z-za taho, što jaho ruchaviki zhareli.
Jon dadaŭ, što rovar spačatku razabrali na častki i dastavili na pazicyju bližej da linii sutyknieńnia. Paśla hetaha jaho sabrali i ŭklučyli, a zatym dastavili da sałdata.
Bryhada «Rubiež» apublikavała kadry, na jakich treci dron pieravozić rovar z dapamohaj labiodki, i kadry taho, jak bajec jaho atrymlivaje.
«My rabili staŭku na chutkaść, na niečakanaść, na biasšumnaść rovara i, viadoma, na mužnaść i advahu samoha «Tankista»», — adznačyŭ Hrycenka.
Kamientary