Ekśpiertnaja rada Rasijskaha vajenna-histaryčnaha tavarystva, jakoje ŭznačalvaje pamočnik Pucina Uładzimir Miadzinski, vyznačyła pieramožcu konkursu na najlepšy pomnik maršału Kanstancinu Rakasoŭskamu, jaki padorać biełaruskamu horadu. Pieramoh prajekt maskvički.
Pomnik dvojčy Hieroju Savieckaha Sajuza budzie pastaŭleny Rasijskim vajenna-histaryčnym tavarystvam u haradskim skviery na rahu Savieckaj vulicy i płoščy Paŭstańnia, pobač ź jakim tradycyjna pravodzicca vajskovy parad z nahody Dnia Pieramohi.
Pa vynikach hałasavańnia ŭ konkursie na najlepšy architekturna-mastacki prajekt pomnika Rakasoŭskamu pieramoh prajekt Julii Pašynaj.
«Naša Niva» adšukała patencyjnuju aŭtarku pomnika. Jana naradziłasia ŭ 1989 hodzie ŭ haradku Kulabaki Nižaharodskaj vobłaści Rasii, skončyła ŭ 2011 hodzie Abramcaŭski mastacka-pramysłovy kaledž imia V. M. Vaśniacova pa śpiecyjalnaści «kieramika», a paśla — fakultet skulptury Rasijskaj akademii žyvapisu, skulptury i dojlidstva ŭ Maskvie, dzie žyvie i ciapier.
Pomnik adlustroŭvaje vobraz Rakasoŭskaha ŭ momant kamandavańnia Paradam Pieramohi 1945 hoda. Maršał pakazany ŭ paradnaj formie, viercham na ŭźniatym na dybki kani. Pastamient vykanany ŭ vyhladzie brukavanki Krasnaj płoščy i źmiaščaje dva siužetnyja reljefy: z adnaho boku — karta Homielska-Rečyckaj nastupalnaj apieracyi pad kamandavańniem Rakasoŭskaha, u vyniku jakoj byŭ vyzvaleny Homiel; ź inšaha boku — składzienyja ściahi raźbitych niamieckich čaściej. U pravaj ruce vieršnik trymaje maršalskuju šablu, vastryjom jakoj jon pakazvaje na ściahi raźbitaha voraha — što simvalizuje poŭnuju kapitulacyju praciŭnika.
U mai 2025 hoda na miescy budučaha pomnika byŭ adkryty zakładny kamień. Pomnik płanujecca stvaryć da 82-j hadaviny vyzvaleńnia Homiela ad niamieckich zachopnikaŭ, jakaja budzie adznačacca 26 listapada 2025 hoda.
Raniej Rasijskaje vajenna-histaryčnaje tavarystva pastaviła pomniki Kanstancinu Rakasoŭskamu ŭ Maskvie, Vałhahradzie i Ułan-Ude.
Staršynioj Rasijskaha vajenna-histaryčnaha tavarystva źjaŭlajecca Uładzimir Miadzinski, pamočnik Pucina, raniej viadomy svajoj rollu ŭ prapahandysckaj dziejnaści Kramla, a ciapier u jakaści kiraŭnika rasijskaj delehacyi na pieramovach z Ukrainaj. U sakaviku hetaha hoda jon pryjazdžaŭ u Minsk, kab uziać udzieł u adkryćci novaha pomnika sałdatam Rasijskaj impieratarskaj armii, jakija zahinuli padčas Pieršaj suśvietnaj vajny. Pomnik z vyjavaj impierskaha arła byŭ ustanoŭleny za košt Rasijskaha vajenna-histaryčnaha tavarystva.
Akramia pomnika maršału Rakasoŭskamu, Miadzinski maje namier pastavić u Homieli pomnik rasijskamu fieldmaršału Ivanu Paskieviču, dušycielu paŭstańnia 1830—1831 hadoŭ.
Redki vypadak: pamiłavany biełaruski palitviazień pajšoŭ na vajnu suprać Ukrainy16
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary