Хто такі Дзмітрый Лемяшонак? Чалавек у майцы «ДНР», блізкі да жаночага манастыра ў Навінках
Свята-Елізавецінскі жаночы манастыр, які месціцца на ўскрайку Мінску, ля Навінак, прыцягнуў да сябе ўвагу выступам «падпалкоўніка расійскага ГРУ» Антона Маншына. На сустрэчы было каля сотні чалавек, у тым ліку і манашкі.
«Хутка нашу Радзіму, якая называецца Святая Русь — без падзелу на Белую, Малую і Вялікую, — чакае сур’ёзнае выпрабаванне вайной. Нашым мужчынам, прысутным тут, гэтая інфармацыя асабліва спатрэбіцца. Бо я ўпэўнены, што яны возьмуць у ёй удзел», — казаў Маншын, што сустракала захапленне сярод манашак.
Пазней рэдактарка сайта Свята-Елісавецінскага манастыра інакіня Іаанна сказала, што запрашэнне Маншына было іх памылкай, хаця яна і не ведае, адкуль вайсковец узяўся.
Варта адзначыць, што Маншын зусім не адзіны дзіўны персанаж, які круціцца вакол Свята-Елісавецінскага манастыра.
На шматлікіх фатаздымках з падвор’я ў Навінках прысутнічае 40-гадовы Дзмітрый Лемяшонак. Лысы, барадаты мужчына, нярэдка адзеты ў майкі «Данецкай народнай рэспублікі» ці мінскага «Дынама».
Дзмітрый Лемяшонак — гэта сын протаіерэя Андрэя Лемяшонка, які з’яўляецца духоўнікам Свята-Елісавецінскага манастыра. Сын — вельмі часты госць у абіцелі.
Ён часта з’яўляецца на манастырскім падвор’і, у самім храме, фатаграфуецца з манашкамі. Прычым Лемяшонак-малодшы не надта хавае свае палітычныя погляды. Найчасцей на ім майкі з выявай герба «ДНР» і «Белая Русь», ці спартовая масцерка з надпісам Russia.
Старонкі Лемяшонка ў сацыяльных сетках поўняцца перадрукамі аб змаганні супраць «карнікаў» у Данецку і Луганску, а таксама выяваў праваслаўных святых і старцаў. Асаблівы піетэт Лемяшонак адчувае да Сербскай праваслаўнай царквы, здзяйсняе паломніцтвы ў тыя мясціны.
Дзмітрый Лемяшонак быў адным з заснавальнікаў сучаснага фанацкага руху мінскага «Дынама». У той час ён прытрымліваўся радыкальных неанацысцкіх поглядаў. Яшчэ і цяпер на ягонай старонцы ў «Аднакласніках» можна сустрэць водгулле тых перакананняў.
Цяпер Лемяшонак фактычна з'яўляецца персонай нон-грата для фанатаў «Дынама». Ніякага дачынення да сённяшняга фан-руху ён мае.
Праз нейкі час Лемяшонак стаў «праваслаўным актывістам», пры гэтым захаваўшы свае абсалютна прарасійскія перакананні. Лемяшонак быў адным з тых, хто збіваў маладафронтаўца Мікалая Дземідзенку падчас сустрэчы ў «Доме Масквы» ў Мінску з расійскім чарнасоценскім пісьменнікам Мікалаем Старыкавым.
Нярэдка Лемяшонак фігуруе на фатаздымках падчас казацкіх сходак, на якіх у тым зафіксаваны так званы «атаман» Пятро Шапко.
Цяпер жа найчасцей Дзмітрый Лемяшонак у суправаджэнні свайго бацькі і манахінь Елісавецінскага манастыра здзяйсняе паломніцтвы ў Расію і Сербію.
Протаірэй Андрэй Лемяшонак падчас сустрэчы ў манастыры з былым ГРУшнікам Антонам Маншыным быў на адпачынку ў Чарнагорыі.
Каментары