Папскі легат перадасць беларускім грэка-каталікам рэліквію св. Язафата Кунцэвіча, якой 400 год
Спецыяльны пасланнік папы Францішка, арцыбіскуп Вены кардынал Крыстаф Шонбарн, які прыбывае ў Беларусь сёння, перадасць Беларускай Грэка-Каталіцкай Царкве рэліквію — частку аблачэння святога пакутніка Язафата Кунцэвіча.
Пра гэта ўчора паведаміў сайт Венскай архідыяцэзіі.
«Кардынал Крыстаф Шонбарн падарожнічае ў пачатку ліпеня 2016 года ў якасці пасланніка папы Францішка ў Беларусь… і таксама мае падарунак для невялікай Грэка-Каталіцкай Царквы ў Беларусі», — гаворыцца ў артыкуле.
Рэліквія святамучаніка Язафата, які быў забіты ў 1623 годзе з-за таго, што імкнуўся да еднасці хрысціян усходняга абраду ў Вялікім Княстве са Святым Пасадам, стане аб'ектам шанавання і дабраслаўленнем для беларускіх грэка-католікаў.
БГКЦ, якая была забароненая спачатку ў Расійскай імперыі, а потым у СССР, налічвае каля 10 000 вернікаў па ўсёй Беларусі, гаворыцца ў артыкуле на аўстрыйскім сайце.
Апостальскі візітатар для грэка-католікаў Беларусі архімандрыт Сяргей Гаек распавёў сайту Catholic.bу, што кардынал Крыстаф Шонбарн з'яўляецца ардынарыем для католікаў усходняга абраду ў Аўстрыі і «ведае пра жыццё нашай Царквы».
Пад яго амафорам праз пэўны час быў душпастырам беларускіх грэка-католікаў у Вене а. Андрэй Абламейка.
«Тады паўстала думка, каб частку архіерэйскай вопраткі святамучаніка Язафата перадаць нашай Царкве ў Беларусі, дзе служыў святы Язафат», — сказаў душпастыр беларускіх грэка-католікаў.
«Сёлета спаўняецца 100 год, як мошчы святамучаніка Язафата былі перанесеныя з г. Бяла Падляска (на Падляшшы ў Польшчы) да храма св. Барбары ў Вене. Яны спачывалі там да 25 лістапада 1963 года. Тады, у час ІІ Ватыканскага сабору, пры ўдзеле беларускага грэка-каталіцкага біскупа Чэслава Сіповіча, мошчы св. Язафата былі перанесеныя ў Рым, у базіліку св. Пятра», — распавёў архімандрыт Сяргей Гаек.
Ці варта купляць закінутую хату за адну базавую і колькі гэта каштуе насамрэч? Вось што расказваюць людзі4
Каментары