«Ірына Палм зробіць гэта найлепей»
Далікатная псыхалягічная драма са скандальным сюжэтам.
Ірына Палм зробіць гэта найлепей (Irina Palm)
Бэльгія – Люксембург – Вялікабрытанія – Нямеччына – Францыя, 2007, каляровы, 103 хв.
Рэжысэр: Сэм Гарбарскі
Ролі выконваюць: Марыан Фэйтфул, Мікі Манойлавіч, Кевін Бішап, Сіобэт Г’юлет, Дорка Грылас
Жанр: Драма
Прызы, фэсты: Намінацыя на “Залатога мядзьведзя” Бэрлінскага кінафэсту, намінацыя на Эўрапейскі прыз за найлепшыя акторскія ролі (Марыан Фэйтфул і Мікі Манойлавіч)
Адзнака: 7,5 (з 10)
Сьціплая хатняя гаспадыня-ўдава Мэгі, каб выратаваць хворага ўнука, наймаецца працаваць у начны клюб. Там яна задавальняе мужчынаў найпрасьцейшым мэтадам. Слава пра ейную “ручную працу” расьце, але ні сям’я, ні сяброўкі не здагадваюцца, што пяцідзесяцігадовая жанчына – знакамітая Ірына Палм…
Мастацтва – заўжды правакацыя, яно даходзіць да межаў, углядаецца ў сьмерць, скандал, забароненае. Мэта – раскрыць чалавека й ягоную душу, паднесьці люстэрка да твару кожнага. Мы ніколі ня трапім у сытуацыю “Гамлета”, ня будзем штурмаваць млыны зь дзідаю (“Дон Кіхот”) і ўпотайкі ня пойдзем у Мардор, каб зьнішчыць крыніцу зла. Але мы пазнаем у героях сябе – і нашы жыцьцёвыя сытуацыі.
Карціна Сэма Гарбарскага, хаця й гучыць у пераказе скандальна, надзвычай далікатная й тактоўная (аніводнай плюгай сцэны). Стужка зробленая на намёках, адценьнях эмоцый і бліскучай акторскай гульні пад трапна-мэдытатыўную музыку “Ghinzu”. Для стваральнікаў фільму істотныя не клубнічна-пабытовыя падрабязнасьці сэкс-індустрыіі, а твары, позіркі, любоў, нянавісьць, пагарда, здольнасьць дараваць.
Бабуля любіць унука, нявестка ненавідзіць яе, сын-рохля апусьціў рукі й азлобіўся, ганаровы ўладар начнога клюбу хавае самоту пад маскай цынізму. А гераіня ва ўзросьце знаходзіць сілы, каб зноў раскрыць сваё сэрца.
Марыан Фэйтфул (Мэгі – Ірына Палм) і Мікі Манойлавіч (сталы актор Кустурыцы, у фільме – гаспадар клюбу) – кранальна-наіўныя, як падлеткі, якія ня ведаюць, як прызнацца ў першым каханьні. Але, калі падлеткам замінаў брак досьведу, то старым героям замінаюць звычкі, праца і век.
Іранічна-дасьціпныя маскі сябровак-кумушак, безграшоўе і плёткі ў краме; роспачная гістэрыка сына, які даведаўся, чым займаецца ягоная маці…
Глядзіце. Гэта сапраўднае кіно пра жыцьцё.
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння66
Каментары