У магазінах Беларусі няма кантрафактнага алкаголю, заявіў намеснік міністра — галоўны дзяржаўны санітарны ўрач Ігар Гаеўскі на прэс-канферэнцыі ў Мінску 16 верасня.
«Проста немагчыма, каб у Беларусі быў выпушчаны кантрафакт. Усе тэхрэгламенты выконваюцца», — сказаў ён аб айчыннай алкагольнай прадукцыі. Гаеўскі падкрэсліў, што ўвесь алкаголь, які вырабляецца ў краіне, падвяргаецца сур'ёзнай праверцы. Акрамя таго, створаны надзейны бар'ер для недапушчэння з'яўлення няякаснага алкаголю ў аб'ектах гандлю.
Гаворачы аб імпартным алкаголі, Гаеўскі заявіў, што «часам было незразумела, што адбываецца». Ён згадаў «выпадкі, калі людзі труціліся незразумела чым».
Бар'ерам для няякаснага нестандартнага імпартнага алкаголю ў Беларусі з'яўляецца абавязковая дзяржаўная экспертыза, сказаў Гаеўскі. Калі гэтая працэдура будзе адменена, «з'явіцца шчыліна для таго, каб на рынак патрапіла нешта незразумелае». На экспертызу прывозяць у большасці выпадкаў толькі той тавар, які можа яе прайсці, падкрэсліў Гаеўскі.
«У выніку мы ўпэўненыя, што на легальным рынку Беларусі не прадаюць нядобры алкаголь у плане паказчыкаў, прымешак і гэтак далей», — заявіў Гаеўскі.
Намеснік галоўнага ўрача Рэспубліканскага цэнтра гігіены, эпідэміялогіі і грамадскага здароўя Вадзім Гулін дадаў, што сёлета імпартная алкагольная прадукцыя была забракаваная праз высокае ўтрыманне сівушных алеяў, складаных эфіраў, метанолу.
Віно бракавалі з-за неадпаведнасці стандартам паказчыкаў кіслотнасці, якія паказвалі на выкарыстанне састарэлага вінаматэрыялу, а таксама парушэнняў умоў і тэрмінаў захоўвання віна да розліву.
Цяпер чытаюць
Качанава прапанавала ўвесці адказнасць за «няпраўду ў тыктоку»11
Каментары