«Інакш бы трактар падагналі, а не джып. Там проста месца такое гіблае: я з-за горкі еду па галоўнай, а ён з-за лесу па другаснай выязджае. Відаць, падумаў хлопец, што ў яго галоўная», — расказала «Нашай Ніве» жонка Мікалая Статкевіча пра ўчарашнюю аварыю, у якой яна цудам засталася жывая.
У сарочцы нарадзіўся і адвакат Статкевіча Аляксандр Галіеў, якога везла спн.Адамовіч. «Я не бачыла машыны. Мяне дасталі і паклалі на ўзбочыне, — расказвае яна. — Але [сын] Юра кажа, што больш памяты бок сядзення пасажыра».
Здарэнне адбылося на дарозе Шклоў—Бялынічы, на павароце на Цяцерына. Жонка Адамовіча ехала па галоўнай дарозе на сваім «Сітраене С4». Джып «Гран Чэрокі» выехаў справа з другаснай дарогі перад самай машынай Адамовіч.
«Я ўпэўненая, што гэта выпадковасць, а не замах, — кажа Марыны Адамовіч. — Інакш бы трактар падагналі». «Сысці ад сутыкнення не было калі. Джып аказаўся на маёй паласе проста лоб у лоб. Я ехала на хуткасці кіламетраў 90, да джыпа было метраў 50, калі яго заўважыла», — кажа жонка Статкевіча.
Сутыкненне адбылося на паласе руху машыны Адамовіч, ёсць сведкі. Яны і дапамаглі дастаць жанчыну з разбітай машыны. За рулём джыпа быў малады хлопец, у машыне быў яшчэ адзін пасажыр, акрамя яго.
Палітвязень найхутчэй што даведаецца пра здарэнне 4 мая, калі над ім адбудзецца чарговы суд. Газеты яму прыносяць у чацвяргі, але ў выданні за гэты тыдзень інфармацыя трапіць яшчэ не паспела. Марына Адамовіч не ведае, ці дапусцяць на працэс яе. Адпаведныя заявы яна падала ўчора, для чаго і ездзіла ў калонію.
Яна не можа наступаць на нагу. Яна пакуль не ведае, ці ёсць трэшчыны ў костцы голені, ці гэта проста моцны ўдар.
«Я сёння светлая-светлая, як падпечаны яблык, — горка прызналася яна «Нашай Ніве». — І дзякую Богу, што засталася жывая».
Цяпер чытаюць
Дзе працуюць і як выглядаюць жонкі топ-чыноўнікаў?9
Каментары