www.Svaboda.org: VACŁAŬ HAVEŁ PIERADAJE SVAJU PREMIJU HAZECIE “NAŠA NIVA”

Siońnia ŭviečary ŭ Prazie adbudziecca cyrymonija ŭznaharodžańnia byłoha českaha prezydenta Vacłava Haveła premijaj imia dabračynnaj dziajački Hano Elenbonhien. Vacłaŭ Haveł vyrašyŭ pieradać svaju ŭznaharodu niezaležnaj biełaruskaj hazecie “Naša Niva”. Dla hetaha ŭ českuju stalicu zaprošany redaktar “Našaj Nivy” Andrej Dyńko.Volha Karatkievič, Praha

Cyrymonija adbudziecca ŭ Kanhresovym centry Nacyjanalnaha banku Českaj Respubliki. Havorać, što kaliści ŭ hetym budynku spyniaŭsia Frederyk Šapen.

Premiju zasnavała Praskaje tavarystva mižnarodnaha supracoŭnictva. Prezydent, prafesar Mark Elenbohien, nazvaŭ premiju imiem maci – Hano Elenbohien. U Praskaje tavarystva ŭchvachodziać bolš za 20 čałaviek z roznych krainaŭ. Hanarovy staršynia Praskaha tavarystva były prezydent Paŭdzionnaj Afryki, nobeleŭski laŭreat Frederyk De Klerk. Hałoŭnaja zadača tavarystva – adkrytyja kantakty Centralnaj Eŭropy i ŭsiaho śvietu.

Uznaharoda ŭručałasia trojčy, pieršym premiju atrymaŭ Česki filharmaničny arkiestar Aškienazi. Stała tradycyjaj, što naminanty pieradajuć svaje premii – i pieršaja była pieradadzienaja 14-ci hadovamu pijanistu Łukašu Vondračku ź miastečka Atava, dla taho, kab jon moh praciahvać muzyčnuju praktyku.

U minułym hodzie ŭhanaravanaja była Madlen Ołbrajt, byłaja dziaržsakratarka ZŠA. Madlen Ołbrajt vyrašyła svaju ŭznaharodu pieradać českaj žurnalistcy Pietry Prachazkavaj, jakaja aśviatlała vajnu ŭ Čačenii, padziei ŭ inšych “haračych kropkach” – Asetyi, Afhanistanie, Tadžykistanie... Pietra nia tolki raskazvała pra padziei ŭ Čačenii, ale i zasnavała ŭ Hroznym dom dapamohi dzieciam, jaki dziejničaŭ i na momant uručeńnia ŭznaharody, niahledziačy na toje, što rasiejcy bolš nie puskali Prachazkavu ŭ Hrozny. Atrymanyja hrošy žurnalistka pieradała na patreby Domu dapamohi čačenskim dzieciam.

Siońnia były česki prezydent Vacłaŭ Haveł u praciah minułahodniaj tradycyi taksama pieradaje svaju premiju žurnalistam – biełaruskaj niezaležnaj hazecie “Naša Niva”. Z hetaj nahody ŭ Prahu pryjechaŭ redaktar “Našaj Nivy” Andrej Dyńko.

Vacłaŭ Haveł vielmi časta vykazvaŭ salidarnaść ź biełaruskimi kulturnymi i demakratyčnymi siłami. Były česki prezydent zaprasiŭ u Prahu Vasila Bykava, sustrakaŭsia ź im, taksama cikaviŭsia pra sytuacyju ŭ Biełarusi biespasiarednie ŭ biełaruskich palitykaŭ, dla čaho admysłova ź imi sustrakaŭsia, siarod udzielnikaŭ byŭ, naprykład, Vincuk Viačorka, pradstaŭniki biełaruskaj dyjaspary ŭ Prazie.

Litaralna dniami Vacłaŭ Haveł znoŭ skazaŭ, što treba padtrymlivać dysydentaŭ u krainach, dzie isnujuć aŭtarytarnyja i dyktatarskija režymy, nazvaŭšy režym Alaksandra Łukašenki “hańbaj dla Eŭropy”. U artykule “Duša nacyi”, jaki apublikavała hazeta “Washington Post”, Vacłaŭ Haveł skazaŭ, što isnuje šmat palitykaŭ u svabodnym śviecie, jakija prahmatyčna supracoŭničajuć z represyŭnymi režymami, dazvalajučy tatalitarnym režymam dyktavać, z kim sustrakacca i što havaryć. Vacłaŭ Haveł nastojliva pierakonvaje, što havaryć i sustrakacca treba z dysydentami. I hetym padtrymlivać ich. Svaju premiju były česki prezydent, jaki pretendavaŭ na Nobeleŭskuju premiju miru, pieradaŭ adzinaj niezaležnaj biełaruskamoŭnaj hazecie “Naša Niva”.

• 0
• 0
• 0
• 0
• 0
• 0
• 0
• 0