Biełaruś praz 100 hadoŭ

 Biełaruś praz 100 hadoŭ

Jašče nie karaleŭstva

Voś, prapanuje mnie spadarstva vymyślić, jakoj budzie naša Biełaruś praz sto hadoŭ. Ale mnie nie ŭdajecca siahnuć dumkaj až hetak daloka, tamu prapanuju niekalki prapazycyjaŭ ab tym, što budzie praź piaćdziasiat hadoŭ, h.zn. u 2051 h.

Stalicaj Biełarusi moža j zastaniecca Miensk. Choć buduć i inšyja prapazycyi: naprykład, Słucak, Asipovičy abo znoŭ ža Navahradak.

Što abaviazkova budzie źmieniena — dyk heta peŭnyja abłasnyja centry. Bujnyja administracyjnyja centry blizu miežaŭ dziaržavy pryciahnuć ludztva z susiednich krainaŭ, i praz toje razmyjecca biełaruskaść tych miestaŭ. Tamu centram Viciebskaj vobłaści moža stać Lepiel, Homielskaj — Śvietłahorsk abo Žłobin, Bieraściejskaj – Baranavičy, Haradzienskaj – Lida abo Navahradak. Na ŭzor amerykanskich štataŭ, vobłaści buduć bolš samastojnymi. Mahčyma, źjavicca ŭžo pamiž imi roźnica ŭ zakanadaŭstvie — abłasnyja rady buduć sami vytvarać peŭnyja zakony. Naahuł, pašyrycca samakiravańnie.

Biełaruś staniecca całkam śvieckaj dziaržavaj. Niemahčyma budzie, kab čynoŭnyja asoby naviedvali chram z metaj samareklamy i kab heta pakazvali pa televizii. Zachavajecca šmatkanfesijnaść. Chryścijanskija kanfesii narešcie pačnuć realna zbližacca. Uzraście j rola pahanstva — naprykład, źjaviacca pahanskija jararchi.

Vulicy ŭ Biełarusi buduć prybirać z dapamohaj pyłasosaŭ, a peŭnuju ich častku ŭ kožnym hora-dzie myćmuć šampuniem.

Ludzi buduć pilnavacca svaich spravaŭ i mienš cikavicca palitykaj. Sacyjalahičnaje daśledavańnie pakaža, što 34% darosłych hramadzianaŭ nia zmohuć nazvać proźvišča svajho prezydenta (da hetaha času Biełaruś jašče nia staniecca karaleŭstvam).

Balšynia ludziej budzie zarablać na žyćcio ciažkoj razumovaj pracaj, siedziačy doma ci ŭ kantory za kamputaram. Tolki peŭny adsotak zajmieje pryvilej prafesijna pracavać na ziamli. Dziela hetaha tre budzie zdać admysłovy ispyt dy prajści pa konkursie.

Biełaruś zastaniecca adnoj ź niamnohich krainaŭ, dzie buduć pryniatyja strohija miery suprać raspaŭsiudžańnia hienetyčna źmienienych raślinaŭ i praduktaŭ. Meta hetkich źmianieńniaŭ — atrymlivać bolšy vynik ź mienšaje pracy. Ale biełarusy nia buduć škadavać siłaŭ dla pracy. U peŭnym sensie dla biełarusa pryjarytetam zastaniecca praces, a nia vynik.

Buduć dziejničać strohija abmiežavańni j na prodaž alkaholu. Alkahol budzie darahi.

Vialikuju častku svajho biudžetu biełaruskaja dziaržava budzie vydatkoŭvać na demelijaracyju ziemlaŭ, kab adnavić pieršasny stan pryrody krainy. Štohod na hetuju spravu buduć vydatkoŭvać prykładna stolki sama, kolki na ŭvieś praces kalečańnia pryrody. Padłučacca mižnarodnyja investary. I ŭžo na Paleśsi źjaviacca ładnieńkija bałotcy, choć jašče nia stolki, jak patrebna.

Klimat zrobicca bolš haračym, tamu ŭ haradoch na šmatpaviarchovyja damy buduć ustaloŭvać admysłovyja systemy kandycyjanavańnia. Aktualnaść aciapleńnia ŭ zimovy peryjad budzie źmianšacca.

Čałaviek atrymaje mahčymaść žyć viečna. Paśla taho, jak cieła znosicca (hadoŭ za 120), mozh budzie “pierasadžvacca” na kamputar, i čałaviek budzie bieśpierapynna adčuvać siabie žyvym i mieć mahčymaść kamunikavać z asiarodździem. Z časam hetaja pasłuha patańnieje, i ŭsiaki čałaviek budzie volny vybirać, karystacca ź jaje abo nie. Znojducca j takija, što nie zachočuć!

Budzie bolš svabody. Ludzi zrazumiejuć, što svaboda – heta nie kali niešta dazvolena, a kali zabaroniena zabaraniać.

Nia budzie nijakich pieraškodaŭ u raspaŭsiudžvańni infarmacyi. Bo infarmacyja moža być tolki karysnaj, a škodnaje — tolki jejnaje vykarystańnie. Tamu ŭ samym małym z haradoŭ Biełarusi možna budzie nabyć u šapiku hazety j časopisy balšyni krainaŭ Eŭropy. I va ŭsich hetych krainach buduć pradavać biełaruskuju presu.

Dziela svabody, samych nizkich u Eŭropie padatkaŭ i vyhodaŭ hieahrafičnaha stanovišča Biełaruś staniecca vielmi pryciahalnaj krainaj dla imihrantaŭ. Dla kožnaj dziaržavy budzie ŭstalavanaja peŭnaja hadavaja kvota. Pieravahu buduć mieć adukavanyja maładyja ludzi z raźvitych krainaŭ. U Biełaruś buduć viartacca habrei, ich kolkaść da 2051 h. znoŭ dasiahnie 1% ad kolkaści ŭsiaho nasielnictva.

U 2051 h. u Biełarusi žyćmuć 12 miljonaŭ čałaviek (nia ličačy kamputarnych žyćciaŭ).

Nad Biełarusiaj budzie łunać bieł-čyrvona-bieły ściah, hierbam nazaŭsiody stanie “Pahonia”.

Biełaruskaja mova ŭvojdzie jašče nie va ŭsie sfery žyćcia. Ale ŭ našaj movie buduć vydavacca ŭžo eratyčnyja časopisy, i na joj buduć razmaŭlać prastytutki. Z hetaha času za movu možna budzie bolš nie bajacca.

Alaksandar Urbanovič

Novy prajekt “Našaje Nivy”

2101 hod. Jakoj budzie Biełaruś praz 100 hadoŭ? Jakoj budzie dziaržava i jaki dziaržaŭny ład? Jakimi buduć harady? Jaki horad budzie stalicaj Biełarusi? Jakimi miežy krainy? Što biełarusy buduć jeści? Jakimi buduć biełaruskija hrošy? Jakim transpart? Jakimi srodki masavaj infarmacyi? Jakaja litaratura budzie čytacca? Ci zastanucca teatry? Jakija imiony buduć samymi papularnymi? Jakimi stanuć lasy i reki? Ci možna budzie kupacca ŭ zabrudžanych siońnia aziorach? Jakija źviary źniknuć, jakija novyja raśliny zaviaducca? Što budzie z čarnobylskaj zonaj? U jakich cerkvach buduć malicca ludzi? Što jany viedaćmuć pra 2001 hod? Što budzie z nami?

Štotydnia — fantazii pra budučyniu Viečnaj Biełarusi, ese, prahnozy i futuralahičnyja artykuły ŭ rubrycy “Biełaruś praz 100 hadoŭ”. Z hetaha vyjdzie cełaja kniha! Čakajem Vašych dopisaŭ. Budziem zahadvać.