Palitolah Suzdalcaŭ uratavaŭ stvaralnika «Multklubu»

U žachlivym śnie zavadatary «Multklubu» nie mahli sabie ŭjavić, što ich multfilmy pra Łukašenku nastolki razzłujuć uładu, što im daviadziecca ŭciakać z krainy ad turmy. U žniŭni 2005 hodu na kvaterach stvaralnikaŭ papularnych palityčnych fłeš‑multoŭ adbylisia pieratrusy, paśla jakich była zaviedziena kryminalnaja sprava pa artykule «paklop na prezydenta Biełarusi». Ciapier pa hetyj spravie prachodziać u jakaści padazravanych try čałavieki.

Aleh

Pieršym z krainy razam z žonkaju źjechaŭ haradzieniec Aleh Minič. Z paŭhodu jon chavaŭsia ŭ Maskvie i Kijevie, a potym źjechaŭ u Niamieččynu. Ceły hod jon čakaŭ rašeńnia tamtejšych uładaŭ adnosna pradastaŭleńnia palityčnaha prytułku. «Niemcy vyjavilisia strašennymi biurakratami, — apaviadaje Aleh. — Jany nie dali viery dakumentam ad BKCH i listu asabista ad Alaksandra Milinkieviča ab tym, što na mianie ŭ Biełarusi zaviali kryminalnuju spravu i ŭstupili ŭ pierapisku ź biełaruskaj prakuraturaj, jakaja padavałasia biaskoncaju».

Narešcie, 1 lutaha aŭtar XXX‑multoŭ aficyjna atrymaŭ status palityčnaha ŭciekača. Ciapier jon namahajecca ŭładkavacca pa svajoj specyjalnaści ŭ kamputarnuju firmu. «Ciažka tut znajści pracy, kali nia viedaješ pa‑niamiecku ni słova», — pryznajecca animatar, jaki, žyvučy ŭ Bavaryi, abychodzicca anhielskaj movaj. Jon hatovy praciahvać pracu nad novymi seryjami «Mult‑klubu» i choča pastavić prajekt na kamercyjnuju asnovu. Adnak padtrymki ad biełaruskich hramadzkich dziejačoŭ jon nia maje. Musić, nia majuć takoj mahčymaści.

Pavał

Adzin z stvaralnikaŭ hramadzkaj inicyjatyvy «Treci šlach» Pavał Marozaŭ źjechaŭ ź krainy apošnim. Pry kancy minułaha hodu jaho čarhovy raz vyklikali pa spravie «Multklubu». Tam jamu paviedamili, što ź liku śviedkaŭ jon pierachodzić u lik padazravanych u ździejśnieńni «złačynstva». I jon pryniaŭ rašeńnie źjechać. Praz Rasieju jon pajechaŭ u Estoniju, dzie mieŭ niamała znajomych. U nastupnym miesiacy budzie paŭhodu, jak Pavał žyvie ŭ Tartu. Jon nia kinuŭ biełaruskuju spravu, praciahvaje zajmacca «Trecim šlacham», vystupaje kansultantam šerahu hramadzkich prajektaŭ. Radujecca, kali pryjazdžajuć u Estoniju ludzi ź Biełarusi: «Ale ciažka, kali źjaždžajuć – tryvała trymajecca jašče kolki dzion nastalhičnaje pačućcio», — pryznajecca jon. Da apošniaha momantu Marozaŭ planavaŭ atrymać u zvyčajnym paradku vid na žycharstva, a nie prasić u estonskich uładaŭ palityčnaha prytułku. Niepryjemny incydent ź jahonym siabrukom i paplečnikam Andrejem Abozavym zmusiŭ jaho źmianić mierkavańnie.

Andrej

Techničny kaardynatar «Treciaha šlachu» Andrej Abozaŭ, jaki prachodzić u spravie «Multklubu» jak padazravany, tak i nie davučyŭsia ŭ Miensku. Ciapier jon skančvaje moŭnyja kursy ŭ Estonii, kab pastupić u tamtejšy ŭniversitet na specyjalnaść «mižnarodny biznes». 25 sakavika jon pajechaŭ na aficyjny pryjom, što ładziła Eŭrakamisija ŭ Kijevie z nahody 50‑hodździa Eŭraźviazu. Viartaŭsia ŭ Talin praz Maskvu ciahnikom, bo heta najbolš tanny varyjant. U rasiejskaj Ćviary ŭ jahony vahon zajšli miascovyja milicyjanty, źniali biełarusa ź ciahnika i pad kanvojem dastavili ŭ pastarunak. Proźvišča Abozava znachodziłasia ŭ śpisie, jaki składajecca pavodle ahulnaha pahadnieńnia ministerstvaŭ unutranych spravaŭ Rasiei i Biełarusi, tamu rasiejskija milicyjanty musili jaho departavać. Andrej skarystaŭsia pravam na telefanavańnie i paviedamiŭ pra toje Andreju Suzdalcavu – členu biełaruska‑rasiejskaj pravaabarončaj kamisii pry prezydencie RF. Toj adrazu źviarnuŭsia ŭ Radu Biaśpieki Rasiei i henieralnuju prakuraturu. «Mianie cikaviła dva pytańni, — apaviadaje Andrej Suzdalcaŭ. – Ci sapraŭdy chłopca abvieścili ŭ fedieralny vyšuk i ci jość farmalnyja padstavy, kab nie vydavać jaho biełaruskamu boku. Praź dźvie hadziny ja zatelefanavaŭ Andreju i skazaŭ: nie chvalujsia, ciabie nichto nikomu nie addaść». Abozaŭ pravioŭ u pastarunku ŭ Ćviary amal sutki, ale na abychodžańnie nie narakaje. «Ja raspavioŭ milicyjantam historyju z «Multklubam», jany hladzieli na mianie jak na niejkaje dziva. Byli z saboju multy, pakazaŭ – doŭha śmiajalisia». Potym biełarusa supravadzili da miažy z Estonijaj i pažadali «dobraj darohi». Andreju ŭ Ćviary pakazali dakument. «Jon byŭ za podpisam starejšaha śledčaha pa asoba važnych spravach Mienskaj haradskoj prakuratury Šabana.

Aktyvist kaža, što budzie prasić u Estonii palityčnaha prytyłku.

• 0
• 0
• 0
• 0
• 0
• 0
• 0
• 0