Što stała z abvinavačanymi ŭ chałatnaści dy inšych złačynstvach?
Paśla letašniaha vybuchu ŭ minskim mietro Alaksandr Łukašenka i pradstaŭniki siłavych viedamstvaŭ zajavili pra šerah mahčymych kryminalnych spraŭ.
«Kali b nie hałavaciapstva asobnych, my b ich [padazravanych u vybuchu] zatrymali raniej, jašče pa vybuchu 3 lipienia, — zaŭvažyŭ Łukašenka 16 krasavika 2011 pra zatrymańnie milicyjantaŭ, praz čyju chałatnaść nie ŭdałosia praduchilić vybuch. — Jość fakty, u bližejšy čas skažam, jak heta stała mahčyma, i tam jość elemient najpoŭnaj raschlabanaści. Kaho? Jany zatrymanyja, ja skazaŭ ich dapytvać jak złačyncaŭ». Jon udakładniŭ: «Jak čałaviek ź vializnaj torbaj ŭ 20 kh niasie vybuchoŭku i ŭsio heta prachodzić mima milicyi, mima rabotnikaŭ mietro?»
Paviedamili, praŭda, nie ŭ bližejšy čas, a značna paźniej. U Viciebsku sudzili supracoŭnika abłasnoha UUS Rusłana Sinicyna, jaki nie ŭziaŭ adbitki palcaŭ u Dźmitryja Kanavałava.
Ekśpiert nie tolki nie pravioŭ daktyłaskapiju, ale i vydaŭ maładomu čałavieku daviedku ab tym, što toj prajšoŭ takuju praceduru raniej.I takim čynam pryzyŭnik nie byŭ pravierany na datyčnaść da vybuchu ŭ Minsku 4 lipienia 2008.
Zhodna z materyjałami kryminalnaj spravy, mienavita adbitki palcaŭ Kanavałava byli vyjaŭleny na vybuchovym prystasavańni, jakoje nie spracavała ŭ 2008-m. Sud nad Sinicynym adbyvaŭsia ŭ zakrytym režymie. U vyniku milicyjaniera asudzili na 3 hady pazbaŭleńnia voli z adbyvańniem pakarańnia ŭ papraŭčaj kałonii va ŭmovach pasialeńnia.
Druhi milicyjant, jakoha abiacali pryciahnuć da adkaznaści, — supracoŭnik adździeła ŭnutranych spraŭ mietro. Hienprakuratura paśla vybuchu pakazała videa, na jakim milicyjant razmaŭlaje z supracoŭnicaj mietro, kali pobač ź im bieśpieraškodna prachodzić čałaviek ź vialikaj sumkaj. Sud pryznaŭ, što heta byŭ Dźmitryj Kanavałaŭ, jaki pranosiŭ vybuchoŭku.
«Budzie dadziena pravavaja acenka dziejańniam tych, chto pavinien byŭ praduchilić mahčymaść pranosu vybuchovaha prystasavańnia ŭ mietrapaliten, — zajaŭlaŭ tady ministr unutranych spraŭ Anatol Kulašoŭ. — Kali brać pa Minsku, stancyja mietro «Frunzienskaja» — heta pakul adzin čałaviek».
Ale žurnalistaŭ pra vyniki pravierki tak i nie prainfarmavali.Viadoma tolki, što z pasady byli źniatyja načalnik minskaj milicyi Leanid Farmahiej i načalnik upraŭleńnia ŭnutranych spraŭ na transparcie MUS Viačasłaŭ Jaŭstafjeŭ.
Karespandent «NN» źviarnuŭsia ŭ šerah pravaachoŭnych orhanaŭ, ale ni ŭ adnym nie zmahli skazać, jak pakarali milicyjanta sa stancyi «Frunzienskaja».U prakuratury Minska adznačyli, što nie majuć dačynieńnia da hetaj spravy. A načalnik adździeła ŭnutranych spraŭ mietro pieranakiravaŭ u adździeł infarmacyi HUUS Minharvykankama. Kiraŭnik ža adździeła Alaksandr Łastoŭski adznačyŭ, što nie vałodaje infarmacyjaj, bo heta nie sprava jaho viedamstva. Jon adznačyŭ, što funkcyi rasśledavańnia kryminalnych spraŭ pierajšli da Śledčaha kamiteta Biełarusi. Niahledziačy na toje, što SK pačaŭ pracavać tolki z 1 studzienia.
Nichto nie panios pakarańnie i za raspaŭsiudžvańnie čutak ab vybuchu aŭtobusa maršrutu №100 praź dzień paśla terakta ŭ stalicy.Pradstaŭnik Dziaržsakrataryjata Rady biaśpieki Biełarusi ŭ intervju ahienctvu «Interfaks» jašče letaś, u krasaviku, zajaviŭ, što zatrymali traich raspaŭsiudžvalnikaŭ pravakacyjnych čutak. «Usie troje — žychary Minska — byli zatrymanyja i źmieščanyja ŭ śledčy izalatar za toje, što z dapamohaj internet-forumaŭ i sacyjalnych internet-sietak raspaŭsiudžvali zahadzia łžyvyja źviestki pra nibyta ažyćcioŭlenyja ŭ biełaruskaj stalicy terarystyčnyja akty: vybuchi aŭtobusaŭ, aŭta- i čyhunačnaha vakzałaŭ». Supracoŭnikami śpiecsłužbaŭ «užo ŭstanoŭlenyja asoby jašče dziesiaci raspaŭsiudžvalnikaŭ iłžyvaj infarmacyi, u samy bližejšy čas u dačynieńni da ich buduć pryniatyja adpaviednyja miery».
Chacia ni pakazalnych sudoŭ, ni chacia b vyniesienych papiaredžańniaŭ hramadskaść tak i nie ŭbačyła. A jak akazałasia, staličnaja prakuratura, u kampietencyju jakoj heta ŭvachodziła, nie zajmałasia navat rasśledavańniem. «Śledčym adździełam prakuratury horada Minska pravierka pa ŭkazanych faktach nie pravodziłasia». Taki adkaz atrymała Redakcyja na svoj zapyt u pravaachoŭnyja, orhany. Heta značyć, što zajavy ab zatrymanych raspaŭsiudžvalnikach čutak byli ŭsiaho tolki sprobaj źbić chvalu čutak.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć7
Kamientary