Z Sańnikavym sustreŭsia advakat

8 i 9 lutaha z eks-kandydatam u prezidenty Biełarusi Andrejem Sańnikavym sustrakaŭsia jaho advakat Pavieł Sapiełka.

Jak paviedamiŭ advakat, jaho padabaronny, jaki pa-raniejšamu znachodzicca ŭ śledčym izalatary KDB, pakul nie pačaŭ znajomicca z materyjałami kryminalnaj spravy. «Pravodziacca śledčyja dziejańni», — skazaŭ Sapiełka, admoviŭšysia ad dalejšych kamientaryjaŭ u suviazi z padpiskaj ab nievydavańni.

Druhoha svajho padabaronnaha — Paŭła Sieviarynca, kiraŭnika vybarčaha štaba eks-kandydata ŭ prezidenty Vitala Rymašeŭskaha — advakat Sapiełka nie bačyŭ z 29 śniežnia. «Nie ŭdajecca atrymać ź im spatkańnia, a śledčych dziejańniaŭ, jakija patrabujuć majoj prysutnaści, nie pravodzicca», — skazaŭ advakat.

Pry hetym Sapiełka padkreśliŭ, što ŭžo dvojčy padavaŭ chadajnictva z prośbaj źmianić mieru strymańnia padabaronnym. «Dla źmieny miery strymańnia, na moj pohlad, jość usie zakonnyja padstavy», — zajaviŭ advakat.

Z 29 śniežnia nie bačyŭ svajho padabaronnaha i advakat Dźmitryja Bandarenki, davieranaj asoby Sańnikava. Pra heta BiełaPAN paviedamiła žonka Dźmitryja Volha Bandarenka, jakaja 9 lutaha atrymała ad muža druhi list ź SIZA KDB. Aŭtar lista nie vyklučaje, što jaho mohuć vypuścić da suda, ale raić blizkim «być hatovymi da roznaha varyjantu raźvićcia padziej».

Advakat Taćciana Stankievič, jakaja abaraniaje eks-kandydata ŭ prezidenty Mikałaja Statkieviča, paviedamiła, što taksama nie bačyła padabaronnaha z 29 śniežnia. Pry hetym jana zajaviła, što nie padavała i nie płanuje padavać chadajnictva ab źmienie Statkieviču miery strymańnia, bo ŭpeŭniena, što heta marna.

Atrymać infarmacyju ad advakata Iryny Burak, jakaja abaraniaje lidara Abjadnanaj hramadzianskaj partyi Anatola Labiedźku i byłoha supracoŭnika milicyi Alaksandra Kłaskoŭskaha, nie ŭdałosia.

Advakat eks-kandydata ŭ prezidenty Alesia Michaleviča Aleh Ahiejeŭ apošni raz bačyŭ padabaronnaha ŭ pačatku studzienia. «Ja z ranicy da viečara siadžu ŭ KDB, ale sustrecca z padabaronnym nie mahu», — skazaŭ Ahiejeŭ.

Na minułym tydni z materyjałami papiaredniaha rasśledavańnia ŭ miežach kryminalnaj spravy ab masavych biesparadkach 19 śniežnia pačaŭ znajomicca Alaksandr Atroščankaŭ, pres-sakratar Sańnikava.

Nahadajem, na pres-kanfierencyi 26 studzienia ministr unutranych spraŭ Anatol Kulašoŭ paviedamiŭ, što materyjały kryminalnaj spravy ŭ dačynieńni da šerahu aktyŭnych udzielnikaŭ masavych biesparadkaŭ 19 śniežnia ŭ Minsku buduć nakiravany ŭ sud u pieršych dniach lutaha. Adnak materyjałaŭ u dačynieńni da eks-kandydataŭ u prezidenty siarod ich jašče nie budzie, dadaŭ jon.

• 0
• 0
• 0
• 0
• 0
• 0
• 0
• 0