З Саннікавым сустрэўся адвакат
Севырынца, Статкевіча і Бандарэнку адвакаты бачылі апошні раз 29 снежня.
8 і 9 лютага з экс-кандыдатам у прэзідэнты Беларусі Андрэем Саннікавым сустракаўся яго адвакат Павел Сапелка.
Як паведаміў адвакат, яго падабаронны, які па-ранейшаму знаходзіцца ў следчым ізалятары КДБ, пакуль не пачаў знаёміцца з матэрыяламі крымінальнай справы. «Праводзяцца следчыя дзеянні», — сказаў Сапелка, адмовіўшыся ад далейшых каментарыяў у сувязі з падпіскай аб невыдаванні.
Другога свайго падабароннага — Паўла Севярынца, кіраўніка выбарчага штаба экс-кандыдата ў прэзідэнты Віталя Рымашэўскага — адвакат Сапелка не бачыў з 29 снежня. «Не ўдаецца атрымаць з ім спаткання, а следчых дзеянняў, якія патрабуюць маёй прысутнасці, не праводзіцца», — сказаў адвакат.
Пры гэтым Сапелка падкрэсліў, што ўжо двойчы падаваў хадайніцтва з просьбай змяніць меру стрымання падабаронным. «Для змены меры стрымання, на мой погляд, ёсць усе законныя падставы», — заявіў адвакат.
З 29 снежня не бачыў свайго падабароннага і адвакат Дзмітрыя Бандарэнкі, даверанай асобы Саннікава. Пра гэта БелаПАН паведаміла жонка Дзмітрыя Вольга Бандарэнка, якая 9 лютага атрымала ад мужа другі ліст з СІЗА КДБ. Аўтар ліста не выключае, што яго могуць выпусціць да суда, але раіць блізкім «быць гатовымі да рознага варыянту развіцця падзей».
Адвакат Таццяна Станкевіч, якая абараняе экс-кандыдата ў прэзідэнты Мікалая Статкевіча, паведаміла, што таксама не бачыла падабароннага з 29 снежня. Пры гэтым яна заявіла, што не падавала і не плануе падаваць хадайніцтва аб змене Статкевічу меры стрымання, бо ўпэўнена, што гэта марна.
Атрымаць інфармацыю ад адваката Ірыны Бурак, якая абараняе лідара Аб’яднанай грамадзянскай партыі Анатоля Лябедзьку і былога супрацоўніка міліцыі Аляксандра Класкоўскага, не ўдалося.
Адвакат экс-кандыдата ў прэзідэнты Алеся Міхалевіча Алег Агееў апошні раз бачыў падабароннага ў пачатку студзеня. «Я з раніцы да вечара сяджу ў КДБ, але сустрэцца з падабаронным не магу», — сказаў Агееў.
На мінулым тыдні з матэрыяламі папярэдняга расследавання ў межах крымінальнай справы аб масавых беспарадках 19 снежня пачаў знаёміцца Аляксандр Атрошчанкаў, прэс-сакратар Саннікава.
Нагадаем, на прэс-канферэнцыі 26 студзеня міністр унутраных спраў Анатоль Куляшоў паведаміў, што матэрыялы крымінальнай справы ў дачыненні да шэрагу актыўных удзельнікаў масавых беспарадкаў 19 снежня ў Мінску будуць накіраваны ў суд у першых днях лютага. Аднак матэрыялаў у дачыненні да экс-кандыдатаў у прэзідэнты сярод іх яшчэ не будзе, дадаў ён.
Каментары