Сын індыйскага мільярдэра Мукеша Амбані, Анант Амбані, зноў прапанаваў перавезці ў Індыю бегемотаў, якія паходзяць ад жывёл з колішняга заапарка наркабарона Пабла Эскабара. Гаворка ідзе пра 80 асобін, якіх хочуць выратаваць ад магчымай ліквідацыі ў Калумбіі і размясціць у прыватным цэнтры для жывёл «Вантара» ў штаце Гуджарат, піша The Guardian.
Гэтая гісторыя пачалася яшчэ ў 1980‑х гадах, калі вядомы калумбійскі наркабарон Пабла Эскабар стварыў у сваім маёнтку Hacienda Nápoles вялікі прыватны заапарк. Туды ён завёз розных экзатычных жывёл, у тым ліку сланоў, жырафаў і чатырох бегемотаў з Афрыкі.
Пасля ліквідацыі Эскабара ў 1993 годзе калумбійскія ўлады пакінулі бегемотаў на волі, бо жывёлы былі небяспечныя і цяжкія для кантролю. З цягам часу яны перасяліліся ў басейн ракі Магдалена і пачалі вельмі хутка размнажацца. У рэгіёне не было натуральных ворагаў для іх, клімат падыходзіў, а ежы хапала, таму колькасць жывёл значна вырасла.
Цяпер, паводле ацэнак, у Калумбіі жыве больш за 200 дзікіх бегемотаў. Гэта самая вялікая папуляцыя па-за межамі Афрыкі. Жывёлы наносяць шкоду мясцовай прыродзе: знішчаюць расліннасць, выцясняюць мясцовыя віды, могуць нападаць на хатнюю жывёлу і ствараюць небяспеку для людзей.
Раней улады спрабавалі стэрылізаваць гіпапатамаў, але працэс ідзе занадта павольна. Эксперты папярэдзілі, што праз некалькі дзесяцігоддзяў іх колькасць можа перавысіць тысячу. Таму ў красавіку ўлады Калумбіі абвясцілі, што пачнуць афіцыйны адстрэл для скарачэння папуляцыі. Гэта выклікала абурэнне ў абаронцаў жывёл.
На гэтым фоне Анант Амбані выступіў з прапановай вывезці частку жывёл у Індыю. Ён заявіў, што бегемоты — жывыя істоты, і калі ёсць магчымасць выратаваць іх бяспечным і гуманным спосабам, гэта трэба зрабіць. Ён таксама адзначыў, што жывёлы не выбіралі месца нараджэння і не вінаватыя ў сітуацыі, у якой апынуліся.
Гэта не першая такая прапанова з боку гэтага чалавека. Яшчэ ў 2023 годзе разглядаўся план перавезці 60 бегемотаў у той жа цэнтр, які тады называўся Green’s rescue and rehabilitation. Але праект не рэалізавалі з-за тэхнічных складанасцяў: трэба было злавіць вялікіх дзікіх жывёл вагой каля дзвюх тон кожная, арганізаваць транспартаванне, атрымаць дазволы і ўзгадніць усё паміж рознымі структурамі.
Цяпер Амбані заявіў, што асабіста звярнуўся да ўрада Калумбіі з просьбай дазволіць навукова арганізаванае і бяспечнае перасяленне 80 бегемотаў у новы пастаянны дом.
Аднак ідэя выклікае пытанні. Сам цэнтр «Вантара» мае даволі спрэчную рэпутацыю. Там утрымліваецца больш за 150 тысяч жывёл, у тым ліку рэдкія віды. Крытыкі сцвярджаюць, што частка жывёл магла трапіць туды з парушэннямі правіл або неэтычным шляхам. Таксама гучалі абвінавачанні ў сувязях з незаконным гандлем дзікай прыродай. Іншыя называюць праект «асабістым заапаркам дзеля прэстыжу» сям’і Амбані, бо звычайныя людзі не маюць туды доступу.
Сям’я Амбані і кіраўніцтва «Вантара» ўсе абвінавачанні адмаўляюць. Летась расследаванне Вярхоўнага суда Індыі не знайшло доказаў незаконнай дзейнасці.
Ёсць і практычныя сумневы ў мэтазгоднасці гэтай аперацыі. Бегемоты не жывуць у Індыі ў натуральных умовах. Хоць у цэнтры ёсць мядзведзі, кракадзілы, сланы, леапарды і тыгры, няма вядомага досведу ўтрымання бегемотаў, тым больш адразу 80 асобін. Акрамя таго, іх перавозка можа каштаваць больш за 4 мільёны даляраў.
Аднак калі гэты праект усё ж рэалізуюць, то гісторыя бегемотаў Пабла Эскабара атрымае яшчэ адзін нечаканы працяг.
Цяпер чытаюць
Беларуска распачала чэлендж «40 спатканняў», але ўжо на сярэдзіне не хавае расчаравання ў мужчынах41
Каментары