Kolkaść biudžetnikaŭ skarociać na 10-15%

Ministerstva finansaŭ Biełarusi ličyć nieabchodnym skaracić kolkaść zaniatych u biudžetnaj śfiery na 10–15%. Pra heta 9 lutaha padčas pašyranaha pasiadžeńnia kalehii ministerstva ŭ Minsku zajaviŭ ministr finansaŭ Andrej Charkaviec.

«Pamier zališniaj kolkaści zaniatych u biudžetnym siektary moža być acenieny ŭ 10–15%», — skazaŭ ministr.

Jon padkreśliŭ, što isnujuć pieradumovy dla pierahladu štataŭ biudžetnych arhanizacyj. «Dola ekanamična aktyŭnaha nasielnictva, zaniataha ŭ biudžetnym siektary, značna pieravyšaje pakazčyk krain-susiedziaŭ z padobnym uzroŭniem sacyjalna-ekanamičnaha raźvićcia», — skazaŭ Charkaviec.

Pavodle słoŭ ministra, dola zaniatych u adukacyi, achovie zdaroŭja, sacyjalnym absłuhoŭvańni, u Biełarusi składaje 17,5%. Razam z tym u susiednich krainach hety pakazčyk vahajecca ad 12,8% (u Łatvii) da 16,8% (u Rasii). «Ale heta dakryzisnyja adroźnieńni zaniataści ŭ biudžetnaj śfiery, jakija pavialičylisia ŭ pieryjad kryzisu», — adznačyŭ Charkaviec.

Pavodle jaho słoŭ, krainy, jakija zajavili kurs na libieralizacyju i pryciahnieńnie zamiežnych inviestycyj, charaktaryzujucca paraŭnalna nizkim uzroŭniem uciahvańnia ekanamična aktyŭnaha nasielnictva ŭ biudžetny siektar.

«Uzrovień VUP na dušu nasielnictva ŭ hetych krainach blizki da VUP Biełarusi, ale dola zaniatych u asnoŭnych halinach sacyjalnaj śfiery nižejšaja na 3,5 pracentnaha punkta i składaje 14%», — padkreśliŭ Charkaviec.

Pavodle acenak ministra, pryviadzieńnie kolkaści zaniatych u biudžetnaj śfiery ŭ adpaviednaści z realnymi patrebnaściami ekanomiki dazvolić skaracić raschody biudžetu na 2 trłn. rubloŭ. «Bolšuju častku hetych srodkaŭ možna było b pieraraźmierkavać na finansavańnie inviestycyj u raźvićcio biudžetnaj śfiery i vyvieści jaje na jakasna novy ŭzrovień», — adznačyŭ Charkaviec.

Jon pierakanany, što ŭsia sistema biudžetnych arhanizacyj pavinna nabyć novaje abličča: «Biudžetny siektar nie pavinien być statyčnym, jon pavinien refarmavacca razam sa źmienami ekanamičnaj situacyi».

Jon taksama ličyć nieabchodnym ustanavić limit finansavańnia dla halinovych ministerstvaŭ i rehijonaŭ z ulikam ekanamičnych mahčymaściaŭ dziaržavy. «Nie abjomy finansavańnia pavinny adpaviadać sietcy biudžetnych ustanoŭ, a, naadvarot, štaty arhanizacyj pavinny padładžvacca pad mahčymaści biudžetu», — padkreśliŭ Charkaviec.

Pavodle słoŭ ministra, dla Minfina značna važniej, «jak arhanizacyja realizuje svajo dziaržaŭnaje pryznačeńnie, nakolki nasielnictva zadavolena jakaściu atrymanych pasłuh, a nie jaki kaštarys arhanizacyi».

• 0
• 0
• 0
• 0
• 0
• 0
• 0
• 0