U Minsku stali pieranosić tramvajnaje kalco z DS «Voziera» bližej da centra

U stalicy pačali pieranos razvarotnaha tramvajnaha kalca, kab paźniej vykanać pašyreńnie Daŭhinaŭskaha traktu z-za budaŭnictva linii mietro, pišuć Minsk-naviny.

Raspracavany prajekt pašyreńnia ŭčastka darožnaj sietki — ad skryžavańnia Daŭhinaŭskaha traktu z zavułkam Čarviakova da Staravilenskaha traktu. Jaho płanujuć realizavać u šeść etapaŭ z ulikam budučaj vietki mietro i raźmiaščeńnia stancyi padziemki na vulicy Arłoŭskaj.

— Pieršaja čarha budaŭnictva praduhledžvaje demantaž tramvajnych puciej na terytoryi Staravilenskaha traktu, pieranos razvarotnaha tramvajnaha kalca ad kancavoj stancyi «Voziera» da Pałaca dziaciej i moładzi.

Taksama budzie vykanana rekanstrukcyja ŭčastka vulicy Staravilenskaj (ad Navavilenskaj da Arłoŭskaj) ź pieraprafilavańniem byłych tramvajnych puciej pad pałosy ruchu transpartu. Padčas druhoj čarhi vyzvalać terytoryju Staravilenskaha traktu. Treciaja i nastupnyja buduć źviazanyja vyklučna z budaŭniča-mantažnymi rabotami pa pašyreńni Daŭhinaŭskaha traktu, — raskazaŭ dyrektar Hardarbuda Siarhiej Panioŭ. — Akramia taho, u płanach rekanstrukcyja skryžavańnia i źmianieńnie kirunku ruchu z dadańniem levaha pavarotnaha źjezda, uzmacnieńnie śviatłafornaha rehulavańnia.

Novaja schiema arhanizacyi darožnaha ruchu na skryžavańni vulicy Arłoŭskaj i Staravilenskaha traktu pačnie dziejničać u 2027 hodzie.

Raboty paciahnuć za saboj i źmianieńnie kursiravańnia hramadskaha transpartu.

— Z-za pieranosu razvarotnaha kalca ŭ rajonie Pałaca dziaciej i moładzi rabotu tramvajnych maršrutaŭ skarociać da novaha kalca, — adznačyŭ dyrektar pradpryjemstva «Staličny transpart i suviaź» Juryj Supranovič. — Ruch tramvajaŭ pa Staravilenskim trakcie ad vulicy Navavilenskaj da dyśpietčarskaj stancyi «Voziera» admianiajecca.

Adnak u pieryjad ramontnych rabot praciahnie kursiravać pasažyrski transpart pa Daŭhinaŭskim trakcie ad zavułka Čarviakova da vulicy Arłoŭskaj. Źmieny maršrutnaj sietki buduć realizoŭvacca paetapna ŭ zaležnaści ad dobraŭparadkavańnia nieabchodnaj infrastruktury.

Dla zručnaści minčan i haściej horada płanujuć štodzionna arhanizavać novy maršrut №263 «Aŭtavakzał «Centralny» — Navavilenskaja».

Miarkujecca, što jon budzie kursiravać (pry ŭzhadnieńni z upraŭleńniem DAI HUUS Minharvykankama) pa vulicach Navavilenskaj, Arłoŭskaj, Staravilenskim trakcie, Daŭmana, praśpiekcie Mašerava, vulicach M. Bahdanoviča, Niamiha, płoščy F. Bahuševiča, vulicach K. Cetkin i Babrujskaj. Heta dazvolić stvaryć pramoje transpartnaje złučeńnie z tryma linijami mietro. Intervał ruchu składzie nie bolš za 15 chvilin u čas pik.

Juryj Supranovič padkreśliŭ, što źmianieńnie schiem ruchu pasažyrskaha transpartu — pracajomki praces, jaki patrabuje detalovaha analizu i vyvučeńnia pasažyrapatokaŭ.

— Ciapier składana adnaznačna skazać, jakija mienavita maršruty paśla pašyreńnia Daŭhinaŭskaha traktu źmieniać trasu ruchu. Adnak, kali heta adbudziecca, buduć vyvučanyja roznyja varyjanty i mahčymaści, — dadaŭ jon. — Paśla zaviaršeńnia rabot na ŭčastku ad vulicy Arłoŭskaj da zavułka Čarviakova płanujuć arhanizavać maršrut z rajona «Paŭnočny bierah» da stancyi mietro Puškinskaja. Miarkujecca, što tam buduć kursiravać elektrobusy asabliva vialikaj umiaščalnaści.

• 1
• 3
• 0
• 2
• 1
• 0
• 0
• 0