Isłandyja maje namier paskoryć pytańnie pra mahčymaje ŭstupleńnie ŭ Jeŭrapiejski sajuz. Jak paviedamlaje Politico sa spasyłkaj na dvuch infarmavanych surazmoŭcaŭ, užo ŭ žniŭni ŭ krainie moža adbycca refierendum nakont adnaŭleńnia pieramoŭ ź ES. Datu hałasavańnia parłamient płanuje abviaścić u najbližejšyja tydni.
Pieršapačatkova ŭradavaja kaalicyja abiacała pravieści refierendum da 2027 hoda, adnak vyrašyła nie zaciahvać praces z-za mižnarodnaj napružanaści.
Na rašeńnie paŭpłyvali novyja amierykanskija myty i zajavy Donalda Trampa pra mahčymuju anieksiju Hrenłandyi. Pradstaŭnik ZŠA navat pažartavaŭ, što Isłandyja moža stać «52‑m štatam», a sam Tramp niekalki razoŭ uzhadvaŭ krainu ŭ svaich vystupach, kali havaryŭ pra Hrenłandyju.
U Jeŭrasajuzie adznačajuć, što tema pašyreńnia ciapier ciesna źviazanaja z pytańniami biaśpieki i zdolnaściu dziejničać va ŭmovach hłabalnaha sapiernictva. Kiraŭnictva ES padkreślivaje, što supracoŭnictva ź Isłandyjaj spryjaje stabilnaści ŭ niespakojny čas.
Isłandyja padała zajaŭku na ŭstupleńnie ŭ ES u 2009 hodzie padčas finansavaha kryzisu, kali ŭ krainie abrynulisia try najbujniejšyja banki. Adnak u 2013 hodzie pieramovy byli prypynienyja, a praz dva hady ŭłady paprasili źniać z krainy status kandydata.
Apytańni hramadskaj dumki ŭ Isłandyi śviedčać, što padtrymka ŭstupleńnia ŭ ES raście. Kali pieramovy adnoviacca, jany mohuć prajści adnosna chutka, bo Isłandyja ŭžo ŭvachodzić u Jeŭrapiejskuju ekanamičnuju zonu i Šenhienskuju prastoru, a raniej paśpieła zakryć častku pieramoŭnych raździełaŭ.
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki13
Kamientary