Jak dziaržava pradała niepatrebnuju łaźniu za 29 rubloŭ, a paśla zabrała i łaźniu, i šalonuju niaŭstojku
Historyja kupli łaźni ŭ Bresckim rajonie pieratvaryłasia ŭ sapraŭdnuju finansavuju pastku. Firma, jakaja vyrašyła vykarystać zakinuty abjekt, nabyŭšy jaho za simvaličnuju bazavuju vieličyniu, u vyniku akazałasia vinavataja dziaržavie sumu, u tysiačy razoŭ bolšuju za košt samoj pakupki.
U Bresckim rajonie ŭspłyła pakazalnaja historyja pra toje, jak tannaja dziaržułasnaść moža doraha kaštavać. U kastryčniku 2021 hoda kamunalnaje ŭnitarnaje pradpryjemstva pradała budynak łaźni kamiercyjnaj arhanizacyi ŭsiaho za adnu bazavuju vieličyniu. Na toj momant — 29 rubloŭ, piša BGmedia.
Ździełka adbyłasia pa vynikach aŭkcyjonu i była adobrana rašeńniem Bresckaha rajvykankama. Abjekt znachodziŭsia va ŭłasnaści rajona i byŭ pieradadzieny pakupniku z asablivymi ŭmovami.
Dahavor kupli-prodažu byŭ prostym. Novy ŭładalnik abaviazany byŭ vykanać chacia b adnu z troch umovaŭ:
- pačać pradprymalnickuju dziejnaść u budynku;
- pravieści rekanstrukcyju;
- źnieści abjekt.
Ale, jak pakazała pravierka, za adviedzieny čas nie było zroblena ničoha. Budynak tak i zastaŭsia bieź źmien, bolš za toje, jon pačaŭ razburacca.
Rabočaja hrupa zafiksavała fakt nievykanańnia ŭmoŭ dahavora. Paśla hetaha ŭ spravu ŭmiašałasia prakuratura Bresckaha rajona, jakaja padała pazoŭ u intaresach kamunalnaha pradpryjemstva.
Ekanamičny sud Bresckaj vobłaści padtrymaŭ pazicyju prakuratury i pastanaviŭ spahnać z kamiercyjnaj arhanizacyi niaŭstojku ŭ pamiery 161 tysiačy rubloŭ. Pazoŭ byŭ zadavoleny całkam.
Dahavor kupli-prodažu skasavany, budynak łaźni viernuty kamunalnamu pradpryjemstvu — kupla za 29 rubloŭ paviarnułasia šmattysiačnymi stratami.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy15
Kamientary
Čakajem novych inviestycyj u chrustalnay sasut)