U najstarejšym nacyjanalnym parku Afryki naradziłasia para simpatyčnych redkich hornych harył

Hety vid prymataŭ ličycca źnikajučym, piša Bi-bi-si.

Novanarodžanych bliźniat znajšli rejndžary, jakija adkazvajuć za manitorynh umoŭ pražyvańnia i stanu zdaroŭja hornych harył.

Jany ŭbačyli 22‑hadovuju haryłu pa mianušcy Mafuka, jakaja abdymała svaich dzicianiat (abodva samcy). Papiaredni ahlad pakazaŭ, što ŭsia siamja pačuvajecca dobra.

Ličycca, što naradžeńnie bliźniat u hornych harył adbyvajecca ŭsiaho prykładna ŭ 1% vypadkaŭ.

Ciažarnaść u harył doŭžycca kala vaśmi z pałovaj miesiacaŭ, i samki zvyčajna naradžajuć adno dziciania raz na čatyry hady.

Apošni vypadak naradžeńnia bliźniat hornych harył u nacyjanalnym parku Virunha byŭ zafiksavany ŭ vieraśni 2020 hoda.

Sama Mafuka ŭžo naradžała bliźniat u 2016 hodzie, adnak abodva dzicianiaty tady zahinuli na praciahu tydnia.

Dzicianiaty harył całkam zaležać ad maci — jak u dohladzie, tak i ŭ pieramiaščeńni — i nadzvyčaj uraźlivyja ŭ niebiaśpiečnym asiarodździ, u jakim dziejničajuć brakańjery i šmatlikija ŭzbrojenyja hrupoŭki. Dalejšy los małych Mafuka vyklikaje zaniepakojenaść: značnaja častka najstarejšaha afrykanskaha nacyjanalnaha parku znachodzicca pad kantrolem paŭstancaŭ, a bajavyja dziejańni paskoryli praces skaračeńnia lasnych masivaŭ.

Kiraŭnictva nacyjanalnaha parku paviedamiła, što ŭviedzieny dadatkovyja miery nazirańnia i achovy dla zabieśpiačeńnia vyžyvańnia bliźniat u hety krytyčny pieryjad. Rejndžary buduć uvažliva sačyć za maładoj siamjoj i pry nieabchodnaści akazvać dapamohu.

Pa słovach supracoŭnikaŭ Virunhi, u samoj Mafuka — niezvyčajnaja historyja vyžyvańnia. Jana naradziłasia ŭ 2003 hodzie ŭ siamji Kabiryzi i ŭ čatyry hady straciła maci, jakuju zabili ŭzbrojenyja bajeviki.

U dziesiać hadoŭ Mafuka dałučyłasia da siamji Bahieni i z taho času naradžała patomstva piać razoŭ. Jak adznačajuć zaołahi, jaje apošnija dzicianiaty — značnaja padtrymka ŭ namahańniach pa zachavańni hetaha źnikajučaha vidu.

Park Virunha, uklučany ŭ śpis abjektaŭ Suśvietnaj spadčyny JUNIESKA, byŭ stvorany 100 hadoŭ tamu mienavita dla abarony hornych harył, kolkaść jakich u dzikaj pryrodzie siońnia składaje krychu bolš za tysiaču asobin.

Pavodle Mižnarodnaha sajuza achovy pryrody (IUCN), jaki viadzie ŭlik vidaŭ, što znachodziacca pad pahrozaj źniknieńnia, siońnia hetyja prymaty sustrakajucca tolki ŭ Virunzie, a taksama ŭ nacyjanalnych parkach Ruandy i Uhandy.

Dziakujučy prahramam pracy ź miascovymi supolnaściami, jakija realizujucca pry padtrymcy Jeŭrapiejskaha sajuza i JUNIESKA, kolkaść hornych harył u Virunzie za apošniaje dziesiacihodździe pastupova pavialičvałasia.

U vyniku ŭ 2018 hodzie status hetaha vida byŭ źmienieny z «vida, jaki znachodzicca na miažy źniknieńnia» na «źnikajučy».

Park Virunha zajmaje płošču kala 7 800 kvadratnych kiłamietraŭ i vyznačajecca ŭražlivaj raznastajnaściu łandšaftaŭ — ad dziejučych vułkanaŭ i šyrokich azior da trapičnych lasoŭ i hor.

• 0
• 0
• 0
• 0
• 0
• 0
• 0
• 0