Chto takaja Dełsi Radryhies, što zaniała miesca Madura. Maryjanietka Trampa ci abaronca Vieniesueły?

Jana była pravaj rukoj Madura i vice-prezidentam krainy. Mienavita tamu Viarchoŭny sud pieradaŭ joj paŭnamoctvy kiraŭnika dziaržavy na čas «vymušanaj adsutnaści» Madura.

Radryhies adrazu źjaviłasia na publicy ŭ atačeńni samych upłyvovych funkcyjanieraŭ i siłavikoŭ i pačała rabić jastrabinyja zajavy ŭ adras ZŠA, niby demanstrujučy, što vykradańnie Madura nie pryviało ni da źmieny režymu, ni da źmieny kursu krainy, ni da raskołu elit.

«U Vieniesuele jość tolki adzin prezident, i jaho zavuć Nikałas Madura, — skazała Radryhies i paabiacała adstojvać niezaležnaść. — Naš narod nie zdajecca, nie kapituluje i nikoli nie stanie kałonijaj jakoj-niebudź impieryi — ni staroj, ni novaj, ni zhasajučaj».

U Donalda Trampa inšaje mierkavańnie.

Na pytańnie, chto ciapier hałoŭny ŭ Vieniesuele, Tramp prosta adkazaŭ: «Usim kirujem my». Jon taksama pryhraziŭ, što Vieniesuełu čakaje novaja vajennaja apieracyja, a Radryhies — budzie niešta «horšaje za Madura», kali jana nie budzie vykonvać volu Biełaha doma i nie daść ZŠA «poŭny dostup da ŭsiaho — i da nafty, i da ŭsiaho astatniaha».

«Tyhryca»

Baćka Dełsi Radryhies byŭ partyzanam i pamior ad katavańniaŭ u palicyi ŭ 1976 hodzie.

U pošukach spraviadlivaści jana pajšła vučycca na jurysta — spačatku ŭ siabie na radzimie, potym u Francyi. A balivaryjanskaja revalucyja i prychod da ŭłady Uha Čaviesa, jak jana sama pryznavałasia, stali dla jaje siamji tryumfam «asabistaj pomsty» papiaredniaj uładzie za baćku. Starejšy brat 56‑hadovaj Dełsi, Chorchie Radryhies, taksama pajšoŭ u palityku. Ciapier jon uznačalvaje Nacyjanalnuju asambleju Vieniesueły.

Karjera Dełsi Radryhies pry Čaviesie pryviała jaje da ministerskaj pasady, adnak sapraŭdny praryŭ čakaŭ jaje ŭžo paśla jaho śmierci i prychodu da ŭłady Nikałasa Madura.

Pry im jana ŭ rozny čas uznačalvała ministerstvy suviazi, ekanomiki i zamiežnych spraŭ i ŭ vyniku stała vice-prezidentam, adkaznym taksama za naftahazavuju halinu — faktyčna adzinuju krynicu dachodaŭ źbiadniełaj Vieniesueły.

Madura prazvaŭ Radryhies «tyhrycaj» za jaje pałkuju addanaść idejam čavizmu. Jana była jaho pravaj rukoj jak unutry krainy, tak i za miažoj.

«Dełsi pracuje ŭ pary z bratam. Jaje rola chutčej praktyčnaja, čym intelektualnaja. Jany abodva — dobra adukavanyja ludzi, jakija zapoŭnili pusteču, što ŭtvaryłasia ŭ vyniku poŭnaha sychodu z urada kampietentnych śpiecyjalistaŭ», — kazaŭ palitołah Nikmier Evans u intervju BBC Mundo ŭ 2024 hodzie.

Tvar režymu

Dełsi Radryhies faktyčna stała tvaram režymu Madura, jaki apynuŭsia pad zachodnimi sankcyjami za padaŭleńnie svabod i falsifikacyju vybaraŭ u Vieniesuele.

Sam Madura ŭ apošni čas amal nie vyjazdžaŭ za miažu, i Radryhies hrała klučavuju rolu ŭ adnosinach z sajuznymi krainami — takimi jak Turcyja, Kitaj i Iran. Prabiŭnaja i niaŭrymślivaja Radryhies nie raz pravakavała skandały. Paśla taho jak Vieniesuełu vyklučyli z paŭdniovaamierykanskaha handlovaha błoka MIERKASUR, jana sprabavała prarvacca na jaho pasiadžeńnie ŭ Buenas-Ajresie. A ŭ 2020 hodzie prylacieła na pryvatnym samalocie ŭ Ispaniju, niahledziačy na zabaronu na ŭjezd u Šenhienskuju zonu.

ZŠA i Jeŭrasajuz uviali suprać Radryhies sankcyi za parušeńnie pravoŭ čałavieka i razbureńnie demakratyi ŭ Vieniesuele.

Radryhies zaŭsiody klajmiła ZŠA hańbaj i luta abaraniała prava Madura i jaho atačeńnia budavać sacyjalizm pavodle zapavietaŭ Uha Čaviesa i praciahvać viečnuju baraćbu z amierykanskim impieryjalizmam nie na žyćcio, a na śmierć.

Ciapier jana apynułasia ŭ situacyi, kali joj daviadziecca pracavać pad dyktatam Vašynhtona — i pierad abliččam abiacanaj Trampam vajennaj interviencyi ŭ vypadku, kali jana nie budzie padparadkoŭvacca.

Radryhies užo prajaviła hnutkaść. Paśla pieršych vajaŭničych zajaŭ jana źmiakčyła ton.

«My zaprašajem ułady ZŠA da sumiesnaj pracy nad paradkam dnia dvuchbakovaha supracoŭnictva, — skazała jana i źviarnułasia da Trampa. — Prezident Donald Tramp, našy narody i naš rehijon zasłuhoŭvajuć miru i dyjałohu, a nie vajny».

• 1
• 1
• 6
• 0
• 0
• 0
• 0
• 0