NAK vyznačyŭ najlepšych biełaruskich spartsmienaŭ i trenieraŭ 2025 hoda

U naminacyi «Najlepšy spartsmien» pieramoh bijatłanist Anton Smolski. 

U hetym hodzie jon druhi raz u karjery vyjhraŭ Kubak Sadružnaści, a taksama zavajavaŭ čatyry załatyja miedali na chatnim Kubku najmacniejšych spartsmienaŭ. Akramia taho, na rachunku Antona šmatlikija miedali čempijanatu Rasii i etapaŭ Kubka Rasii. Varta adznačyć, što ad udziełu ŭ prestyžnych mižnarodnych spabornictvach biełaruskija bijatłanisty z 2022 hoda adchilenyja, tamu ŭsie ich miedali zdabyvajucca faktyčna tolki ŭ biełaruska-rasijskich spabornictvach.

Kankurentami Smolskaha byli batutyst Ivan Litvinovič i viaślar Jaŭhien Załaty. U 2025 hodzie Litvinovič vyjhraŭ ahulny zalik Kubka śvietu i staŭ čempijonam śvietu ŭ sinchronnych skačkach, a Załaty pieramoh na pieršynstvie Jeŭropy i ŭziaŭ bronzu čempijanata śvietu.

U naminacyi «Najlepšaja spartsmienka» pieramahła lidarka nacyjanalnaj kamandy pa mastackaj himnastycy Alina Harnaśko.

U 2025 hodzie jana ŭziała zołata na Univiersijadzie ŭ Hiermanii, zavajavała rossyp uznaharod na etapach Kubka śvietu i Kubka vykliku, stała najlepšaj na prestyžnych mižnarodnych turnirach u Minsku, Maskvie, Dubai i Piekinie, a taksama pieramahała na kłubnych čempijanatach Francyi i Ispanii. 

Akramia jaje, na hałoŭny pryz u hetaj katehoryi taksama pretendavali tenisistka Aryna Sabalenka i sinchranistka Vasilina Chandoška. Sabalenka sioleta vyjhrała adkryty čempijanat ZŠA i zaviaršyła hod pieršaj rakietkaj śvietu, a Chandoška zavajavała srebra i bronzu čempijanatu śvietu.

U naminacyi «Najlepšy trenier» užo druhi hod zapar pieramahła hałoŭnaja trienierka zbornaj Biełarusi pa skačkach na batucie Volha Ułasava. 

Sioleta jaje vychavancy zavajavali try miedali vyšejšaj proby na čempijanacie śvietu ŭ Ispanii i šeść załatych uznaharod na III hulniach krain SND u Azierbajdžanie. Taksama biełaruskija batutysty stanavilisia pryziorami etapaŭ Kubka śvietu, a Ivan Litvinovič vyjhraŭ ahulny zalik turniru.

U hetaj naminacyi taksama byli pradstaŭlenyja Nikałas Alvarada, jaki pryvioŭ zbornuju Biełarusi pa plažnym futbole da srebra čempijanatu śvietu, i hałoŭny trenier zbornaj Biełarusi pa akademičnym viesłavańni Vital Bieły, čyje padapiečnyja stali pryziorami suśvietnych i kantynientalnych forumaŭ.

U naminacyi «Najlepšaja kamanda» najlepšaj była pryznana zbornaja Biełarusi na skačkach na batucie pad kiraŭnictvam užo zhadanaj Volhi Ułasavaj. 

U top-3 najlepšych kamandaŭ hoda taksama ŭvajšli chakiejnaje «Dynama» i zbornaja Biełarusi pa plažnym futbole. Minskija dynamaŭcy ŭpieršyniu ŭ historyi vyjšli ŭ druhi raŭnd płej-of Kubka Haharyna, a futbalisty plažniki ŭziali srebra čempijanatu śvietu.

Urešcie, «Praryvam hoda» pryznana vystupleńnie minskaha «Dynama» ŭ Kantynientalnaj chakiejnaj lizie. 

U siezonie-2024/25 KCHŁ padapiečnyja Dźmitryja Kvartalnava zaniali najvyšejšaje dla siabie čaćviortaje miesca ŭ Zachodniaj kanfierencyi pa vynikach rehularnaha čempijanatu i pabili rekordy kłuba pa bałach i pieramohach za čempijanat. Taksama «zubry» ŭpieršyniu ŭ historyi vyjšli ŭ čverćfinał rozyhryšu Kubka Haharyna.

Kankurencyju chakieistam tut składali płyŭčycha Alina Zmuška i dvojka Taćciany Klimovič z Alenaj Furman (akademičnaje viesłavańnie). Biełaruski zavajavali bronzavyja miedali suśvietnych forumaŭ u svaich vidach sportu.

• 0
• 0
• 0
• 0
• 0
• 0
• 0
• 0