25+ idej padarunkaŭ na Kalady i Novy hod ad biełaruskich majstroŭ i brendaŭ
U pieradnavahodniaj mituśni nie adrazu atrymlivajecca saryjentavacca i abrać dla svajakoŭ i siabroŭ toj samy padarunak pad jalinku — kab nie aby-što i nie za kaśmičny košt. Kali vy nie z tych, chto zakupiŭsia jašče miesiac tamu, a adkładajecie ŭsio na apošni momant, voś padborka niebanalnych prezientaŭ (nijakich škarpetak i majtkoŭ).
Dla łasunoŭ
Zvyčajnymi šakaładkami ci cukierkami, zdajecca, užo nikoha nie ździviš, a voś areški-hihanty sa zhuščonkaj ad minskaj kaviarni Let it be (Kastryčnickaja, 23A) mohuć stać sapraŭdnym hastranamičnym adkryćciom.
Tyja, chto ŭžo kaštavaŭ areški, kažuć, što jany takija vialikija, što mohuć zamianić asobny pryjom ježy. Nu i zhuščonka tam što treba.
Košt adnaho areška: 9 rubloŭ
Dla tych ža, chto pa-za miežami Biełarusi, źviartajem uvahu na 82‑hramovyja syrki, jakija stvarajucca rukami biełaruskaj mastački Eli.
Košt adnaho syrka: ad 3 da 4 jeŭra
Kali ž čałaviek bolš pa salonym, to dobraj idejaj na padarunak moža być set z roznych syroŭ, naprykład, ad biełaruskich syravaraŭ u Polščy Krapacheese. Tym bolš kožny zakaz nabližaje siamju Juli i Alaksieja da mary — vykup fiermy.
Košt dla prykładu: adyhiejski syr — 1,6 jeŭra za 100 hr.
Dla zaležnych ad knižak
U zimovy, pieradnavahodni čas i knižak chočacca asablivych — kazačnych. Kali ŭžo pa niekalki razoŭ pieračytanyja «Uładar piarścionkaŭ» ci «Hary Potar» (u tym liku pa-biełarusku) i chočacca čahości novieńkaha, to raim źviarnuć uvahu na novaje vydańnie «Hutenbierha» «Kalady 1992» (košt — 18 jeŭra).
Dla siamiejnaha čytańnia prydasca «Śniežnaja fieja» ad Julii Vieramiej — kniha-padarožža ŭ zimovy śviet, dzie žyvuć siabroŭstva, dabrynia i cudy (košt — 12 jeŭra).
Dla bolš darosłych čytačoŭ kłasnym padarunkam stanie kniha pra tvorčaść Jazepa Drazdoviča z «Akademknihi». Mastak sam pa sabie — čaroŭny i nieardynarny, taki ž, jak i jaho pracy.
Dla kavamanaŭ
Daloni coffee štohod radujuć amataraŭ kavy svaimi dobra pradumanymi advent-kalendarami z dryp-kavaj. U hetym hodzie, viedajučy, što pieršyja raźbiaruć jašče na etapie prezientacyi, jany vypuścili dadatkovy pradukt — navahodni boks sa specialty kavaj i piernikami (kolkaść abmiežavanaja).
Košt: 125 rubloŭ
Dla čempijonaŭ płanavańnia…
…a zaadno i amataraŭ biełaruskaj kultury, bo mienavita heta abjadnała ŭ svaim aŭtarskim kalendary Vola Etyka — kalandar, jaki možna vyšyvać.
«Stvaraŭsia jon, pa-pieršaje, kab svaimi rukami dakranucca da biełaruskaj tradycyi: usie schiemy zrobleny na asnovie aŭtentyčnych arnamientaŭ. A pa-druhoje, kab 12 raz u 2026 hodzie možna było zapavolicca i niekalki hadzin pravieści sam-nasam z saboj i z vyšyŭkaj kryžykam», — patłumačyła ideju navinki majstryca.
Jana abiacaje, što takoj vyšyŭcy daduć rady navat pačatkoŭcy, tym bolš razam z kalendarom idzie instrukcyja i ŭsie nieabchodnyja materyjały. A jašče i padstaŭka! Kab kalandar pryhoža stajaŭ na abranym uładalnikam miescy ŭ kvatery ci ofisie.
Košt: 50 jeŭra
Dla estetaŭ
Kaniečnie, na kampaniju zaŭsiody znojdziecca niechta pa-za sistemaj — toj, chto nie amatar navat stavić jalinku ŭ domie. Ale kali vašy znajomyja ličać upryhožvańnie dreva hałoŭnaj tradycyjaj, to cacka zaŭsiody budzie darečnaj.
U honar nadychodziačaha Hodu kania majstry narabili šmat kłasnych varyjantaŭ. Naš favaryt — uručnuju raśpisanyja koniki ad kieramistki Darji Lizunkovaj.
Košt za adnu cacku: 70 rubloŭ
Kali vy ŭsio ž nie pa konikach, źviarnicie ŭvahu na čaroŭnych piersanažaŭ ad Maryi Karniejenka. Kažany, kotki, trusiki i kaladoŭščyki stvoranyja z vaty — a tak i nie skažaš!
Košt: ad 23 jeŭra i vyšej, u zaležnaści ad pamieru i składanaści cacki
Bolš śmiełyja i aryhinalnyja cacki z pasłańniami možna zamović u Nadziei @yakhont. Taksama dyzajnierka svaimi rukami stvaraje niezvyčajnyja vazy i talerki.
Košt adnoj cacki: 10 jeŭra
Cacačnuju retra-kłasiku sa škła i nie tolki raim šukać na Oz.by — u ich vialiki vybar.
Dla amataraŭ utulnaści
Amal kožny čałaviek, jaki arhanizavaŭ u domie šmat kropak z nastrajovym śviatłom, skaža vam, što heta najlepšaja ideja — jon nie zalivaje ŭsiu prastoru, nie reža vočy, a pracuje na aśviatleńnie kankretnaha kutočka, dzie možna zahniezdavacca ź pledam i kubkam kakavy.
Takim nastrajovym efiektam mohuć radavać samarobnyja lampy-simvały haradskoj prastory ad «Chutka Smačna».
Ciahnik, vahon mietro, panelka ci domik z Asmałoŭki — što budzie aśviatlać kvateru blizkaha? Vybirać vam.
Košt: ad 70 jeŭra i vyšej
Zamianić lampu možna i na bolš tanny, ale nie mienš efiektny varyjant — śviečki. Tym bolš, kali jany ad brenda «Kropli zor». Prosta pahladzicie na hetyja kalarovyja viežy-kanstruktary!
Jość u stvaralnicy brenda i śpiecyjalnaja zimovaja kalekcyja sa śviečkami ŭ formie Ščaŭkunčyka ci karusieli.
Košt: ad 11 jeŭra i vyšej, u zaležnaści ad vieličyni praduktu
Dla modnikaŭ
U marazy kłasnaja alternatyva šapkam dla dziaŭčat — chustki. Raim źviarnuć uvahu na chustki z arnamientalnaj vyšyŭkaj ad Kaciaryny Piatrovič. Dla mužčyn u Kaci možna kupić vyšyvanuju kašulu — čamu b mienavita ŭ takim vobrazie nie sustreć Novy hod?
Aktualnym elemientam harderoba (jak dla dziaŭčat, tak i dla chłopcaŭ) zastajecca viazany kapiušon, asabliva kali jon adrazu idzie ŭ duecie ź vialikim šalikam. Pa takija rečy zahladvajcie da viadomych vam majstroŭ. Ci voś da Volhi.
Nu, i viečnaja kłasika ŭ dapamohu: alimpijki i chudzi ad LSTR.
Kali ŭciapleńnie nie staić za metu, to prosta stylovaj šmatsłojnaści razdaść Tvaja_paniova — majstarka zrobić dla vas fartuch u lubym kolery, z arnamientam, charakternym vašamu rehijonu.
Košt: ad 35 jeŭra
Dla amataraŭ padarožžaŭ
Z kavidnych časoŭ vandroŭki pa Biełarusi tolki nabirajuć papularnaść — mnohija praciahvajuć upieršyniu adkryvać dla siabie zachaplalnyja kutočki našaj radzimy. Dla takich siabroŭ krutym padarunkam budzie Pašpart vandroŭnika — knižka, jakaja źmiaščaje ŭ sabie 65 biełaruskich słavutaściaŭ, vartych naviedvańnia.
Košt: 54 rubli.
Śpis prezientaŭ dla vandroŭnikaŭ ahułam biazdonny — im i namioty niališnija, i butelki na vadu, i lichtaryki, i paŭerbanki… A jašče — dobry zaplečnik. U brenda «Vokładki», darečy, ciapier kaladnyja źnižki — moža, što hodnaje trapić na voka.
Dla tych, chto lubić źziać
Univiersalnaja paletka dla tvaru Paradiso Relouis Contouring Palette idealnaja i na budni, i dla śviataŭ — usio dla taho, kab źziać štodzień.
Košt: 19,96 rub.
Dadatkova źziać dapamohuć vadkija kultavyja cieni ad hetaha ž brenda — z usioj raznastajnaści koleraŭ budzie składana vybrać toj samy.
Košt: 10,89 rub.
Kali ŭ vašaj kampanii jość amatary spa-pracedur, raim źviarnuć uvahu na navahodni nabor «Marozny marcypan» ad «Bielity» — možna sabrać u padarunkavuju torbu i mus dla ruk, i pienu dla vanny, i hiel dla duša.
Dla kalekcyjanieraŭ aksiesuaraŭ
Zavušnicy, piarścionak ci niešta inšaje z upryhožańniaŭ — najlepšy varyjant dla tych, chto lubić sam pabyć jalinkaj.
Zavušnicy ad Mašy Maroz — toje, pra što budzie pytać u vas kožny minak. Nivodnaja para nie paŭtarajecca, a jaje stvareńnie — zaŭsiody natchnieńnie tradycyjnymi biełaruskimi pościłkami i ich strakataściu.
Bolš strymanaja bačańnie pryhažości — u brenda Label D. U takoj juvielircy možna pajści i ŭ ofis, i na spatkańnie, i na viečarynu.
Biasprojhryšnym varyjantam stanuć modnyja ciapier abviesy na torby, jakija možna vykarystoŭvać i jak birulku dla klučoŭ.
Varyjant ad atmasfiera.com
Dla tych, chto nastalhuje
Siabra ci blizki ŭ emihracyi? Vy nie prahadajecie, kali dašlacie jamu niešta ź jaho rodnych miaścin ci niešta z rodnymi krajavidami.
Tak, brend «Žnivień» daŭno prapanoŭvaje zamaŭlać cišotki z kaardynatami rodnaha horada.
Košt: 22 jeŭra
A brend Jestem tu nadrukuje dla vas na cišotkach luboje miłaje sercu miesca — budź toje babulina chata, rečka ŭ miastečku ci staličnyja viežy na centralnym vakzale.
Košt: 30 jeŭra
Dyzajniery ž z ZABRODSKI padrychtavali dla vas cełuju sieryju łonhślivaŭ na luby hust — z kultavaj biełaruskaj ježaj, babulinym televizaram, nakrytym survetkaj, ci tym samym viaskovym siervantam ź siervizam.
Košt: 66 jeŭra
Dobrym, intelihientnym vitańniem z radzimy moža stać i biełaruskaja mapa — naprykład, u viersii Arkadzia Smoliča 1919 hoda.
Košt: 55 jeŭra.
A što nakont taho, kab nasić na plačach ci hałavie chustki z rodnymi sercu krajavidami? Takija ŭ vialikim vybary prapanuje brend AV Sollection.
Košt: 67 rubloŭ
«Naša Niva» — bastyjon biełaruščyny
PADTRYMAĆTop biełaruskich švedraŭ na luby hust — z Paleśsiem, słuckimi pajasami ci lalkami-abiarehami
Top niebanalnych padarunkaŭ na lubuju nahodu ad biełaruskich majstroŭ
Stylistka nazvała top-5 samych modnych biełarusak
Top samych modnych biełaruskich mužčyn — vybar stylistki
Ideja dla padarunka — padborka stylovych aksiesuaraŭ ź biełaruskim kałarytam
Ciapier čytajuć
Analityk Hienštaba, jaki malavaŭ kartu «adkul rychtavałasia napadzieńnie», apynuŭsia ŭ SIZA KDB za pracu na ŭkrainskuju raźviedku12
Kamientary