Kryścin Kebat, jakaja abdymałasia z žanatym hiendyrektaram IT-kampanii na kancercie Coldplay, upieršyniu prakamientavała heta

U lipieni na kancercie hurta Coldplay u Bostanie kamiera vypadkova źniała kiraŭnika IT-kampanii Astronomer Endzi Bajrana i dyrektarku adździeła kadraŭ Kryścin Kabot, jakija stajali abniaŭšysia. Videa pakazali na vialikich ekranach stadyjona padčas pieśni jak častku tradycyjnaha momantu kiss cam (kamiery dla pacałunkaŭ).

Kryścin Kebat upieršyniu z taho momantu dała intervju.

Jana raskazała The New York Times, što na jaje abrynuŭsia chejt — u kamientaryjach jaje nazyvali šluchaj, razburalnicaj siemjaŭ, palaŭničaj za hrašyma.

Jaje asabistyja danyja źlili ŭ internet, i na praciahu niekalkich tydniaŭ jana atrymlivała pa 500—600 zvankoŭ u dzień. Paparacy dziažuryli praz darohu ad jaje doma, a mašyny pavolna prajazdžali mima, «jak na paradzie», uzhadvała jana.

U vyniku Kebat naniała kansultanta pa kamunikacyjach, kab dapamahčy raspavieści historyju i pry hetym minimizavać dalejšuju škodu dla siabie i blizkich.

Jana raskazvaje, što da toj nočy jany z bosam navat ni razu nie całavalisia.

«Ja pryniała drennaje rašeńnie, vypiła paru kaktejlaŭ High Noon, tancavała i pavodziła siabie nieprystojna sa svaim bosam. I heta nie drobiaź. Ja ŭziała na siabie adkaznaść i achviaravała karjeraj dziela hetaha. Heta cana, jakuju ja vyrašyła zapłacić»,

— skazała jana. — «Ja chaču, kab maje dzieci viedali: možna pamylacca, možna surjozna abłažacca. Ale za heta tabie nie pavinny pahražać śmierciu».

Uviesnu 2025 hoda, padčas abiedu z bosam Kebat niejak asabliva zhadała pra svoj šlub, i Bajran spytaŭ, što zdaryłasia. Jana adkazała, što pieražyvaje rasstańnie.

«Ja prachodžu praz toje samaje», — uspomniła jana jaho słovy. Paśla hetaha jany stali bolš blizkimi.

Na pracy jany dzialilisia sakretami, śmiašyli adno adnaho, i ŭ Kebat chutka źjavilisia «vialikija pačućci». 

Rastańnie Kebat z mužam było jašče zusim śviežym, kali jana pahadziłasia pajści ź siabrami na Coldplay. Hrupa joj padabałasia, ale bolš za ŭsio vabiła mahčymaść vybracca kudy-niebudź ź siabrami ŭ letniuju sieradu. Jana zaprasiła Bajrana skłaści joj kampaniju.

Ci nie niepakoiła jaje hetaja vyłazka z punktu hledžańnia HR-etyki? «Mahčyma, niejkaja častka majho mozhu skakała i machała rukami, kryčučy: «Nie rabi hetaha!» — adkazała Kebat. — «Ale ŭ cełym — nie». Jana była ŭ zachapleńni ad taho, što paznajomić Bajrana sa svaimi siabrami. «Ja dumała: ja spraŭlusia, ja mahu zakachacca, ja ŭsio kantraluju». Pa darozie na stadyjon Kebat daviedałasia praz SMS, što jaje muž, ź jakim jana razvodzicca, taksama idzie na hety kancert. «Heta mianie vybiła z kalainy», — pryznałasia jana. Ale jany z Bajranam «nie byli paraj».

Miescy byli na VIP-bałkonie z šykoŭnym vidam na scenu. Kebat pamiataje, što vakoł było ciomna i zdavałasia, što ich nichto nie bačyć. Jany z Bajranam vypili pa paru kaktejlaŭ z tekiłaj, i pa chodzie kancerta stali vyhladać jak para. Jana padkreśliła, što ŭ tuju noč jany pacałavalisia pieršy i adziny raz. Bajran tancavaŭ zzadu Kebat, kali jana ŭziała jaho za ruki i abchapiła imi siabie.

Kali Kebat ubačyła svajo i jaho fota na hihanckim ekranie stadyjona, heta było tak, niby «niechta pstryknuŭ vyklučalnikam».

«Mnie było tak soramna i tak strašna», — skazała jana. — «Ja — kiraŭnik HR, jon — hiendyrektar. Heta tak klišejna i tak kiepska». Jany ŭciakli ŭ bar. «My prosta siadzieli tam, schapiŭšysia za hałovy: što tolki što adbyłosia?» Jašče da vychadu sa stadyjona jany pačali abmiarkoŭvać, jak reahavać. «Pieršaja razmova była pra toje, što my pavinny paviedamić savietu dyrektaraŭ».

U Kebat jość kvatera ŭ Bostanie, dzie jana žyvie, kali dzieci zastajucca ź joj. Jany z Bajranam pajechali tudy, kab raspracavać płan. Chto napiša list? Što tam budzie? Chto jaho adpravić? «Pačalisia paničnyja ataki», — kaža Kebat. Jana ŭžo bačyła pierad vačyma stratu pracy i ŭskładnieńni ŭ adnosinach z mužam, jakoha dzieci abažali.

I voś kala čatyroch hadzin ranicy Kebat atrymała paviedamleńnie. Heta byŭ skrynšot z TikTok.

Jana pajechała da dziaciej, jakija byli z baćkam u Bostanie. Jana chacieła pahavaryć ź imi raniej, čym jany pačujuć heta ad inšych. «Jany viedali, chto taki Endzi, i ja skazała: «My paddalisia momantu, i ciapier heta ŭ sacsietkach». Jaje dačka, jakoj było 14, raspłakałasia.

Potym jana viarnułasia ŭ kvateru na kanfierenc-suviaź z savietam dyrektaraŭ Astronomer. U toj razmovie joj skazali: «Słuchaj, my ludzi. My ŭsie pamylajemsia. Ale ty razumieješ, što my pavinny heta abmierkavać i pryniać rašeńnie», — uzhadvaje jana. Nieŭzabavie kampanija pačała rasśledavańnie.

Kebat pastaviła kamiery nazirańnia doma, a miascovaja palicyja ŭzmacniła patrulavańnie. Paśla zaviaršeńnia rasśledavańnia ŭ Astronomer joj prapanavali viarnucca na pasadu, kaža jana. Ale jana nie mahła ŭjavić, jak budzie kiravać kadrami, byŭšy abjektam usieahulnych kpinaŭ. Jana damoviłasia ab svaim zvalnieńni, pra jakoje abviaścili 24 lipienia.

Kebat źmianiłasia da niepaznavalnaści dla siamji i siabroŭ. «Z taho času nastupiła takaja ciemra», — skazała jaje maci. Šmat dzion jana nie vychodziła z pakoja. Kebat kazała, što adčuvaje siabie ŭ biaśpiecy tolki doma. Jana ŭspomniła vypadak, kali jany z dačkoj pryjšli ŭ haradski basiejn, i žančyna, jakuju jana viedała zusim trochi, pačała ich fatahrafavać. Dačka sa ślaźmi na vačach pačała prasić: «Mama, kali łaska, davaj pojdziem». Inšym razam, kali jana zabirała syna z pracy, hrupa žančyn padyšła da mašyny i, nazyvajučy jaje «hetaj dziaŭčynaj», kazała, što nie razumiejuć, jak jana naohuł moža pakazvacca na ludziach. «Ja nie viedała, jak pravilna padtrymać svaich dziaciej», — skazała jana.

Naprykancy leta stała krychu lahčej. Kebat padała na razvod z Endru, jaki vypuściŭ zajavu, što jany ŭžo nie žyli razam na momant kancerta, i paprasiŭ nie turbavać jaho. Jana znajšła terapieŭtaŭ dla dziaciej, jakija viarnulisia ŭ škołu, dzie da ich pastavilisia z razumieńniem. Kebat pačała vychodzić z doma hulać u tenis.

Jany z Bajranam padtrymlivali suviaź usio leta. Ale ŭ pačatku vieraśnia jany sustrelisia i vyrašyli, što «znosiny tolki zaminajuć kožnamu ruchacca dalej i zahojvać rany». Z taho času kantakty byli minimalnymi.

Kebat choča abvierhnuć čutki, što jana trapiła na top-pazicyju praz łožak. Jana pracuje z 13 hadoŭ, vyrašyŭšy, što nikoli nie choča finansava zaležać ad mužčyny. Kali jana raźviałasia ź pieršym mužam u 2018 hodzie, jana całkam zabiaśpiečvała siamju sama. «Ja nikoli tak ničym nie hanaryłasia ŭ žyćci», — kaža jana.

Kebat zaŭvažyła, što samymi žorstkimi krytykami byli žančyny. «Toje, što ja ŭbačyła, prymušaje mianie dumać, što nie tolki mužčyny nas strymlivajuć. My sami siabie strymlivajem, źniščajučy adna adnu».

• 5
• 0
• 3
• 1
• 0
• 5
• 0
• 0