Kali i kudy lepš znoŭ padavacca na vizu, kali ŭ šenhienie admovili
Kryścina Varapajeva, kiraŭnica turystyčnaj kampanii Lime Travel, zaŭvažyła: čym bližej da zimy, tym bolš admoŭ u šenhienskich vizach atrymlivajuć biełarusy. Ale ci varta adčajvacca? Ci značyć heta, što šenhien čałavieku bolš nie atrymać? Hetyja i inšyja pytańni «Lusterka» zadała vizavaj ekśpiertcy Anastasii Łysakoŭskaj.
Kali ŭ konsulstvie adnoj z krain ES admovili ŭ šenhienskaj vizie, ci značyć heta, što jaje bolš nie daduć?
«Nie, adzin ci navat niekalki admoŭnych adkazaŭ nie aznačajuć pažyćciovy ban. Vizavy kodeks ES nie ŭtrymlivaje padobnych praviłaŭ, — kaža Łysakoŭskaja. — Rašeńnie prymajecca kožny raz nanoŭ pa kankretnym kiejsie. Jość historyi, kali ludziam admaŭlali dva-čatyry razy zapar u roznych konsulstvach, ale na piataj sprobie čałaviek usio ž taki atrymlivaŭ vizu».
Pa słovach Anastasii, niehatyŭny adkaz nie pavinien vyklikać paniku. Pravilniej jaho ŭsprymać jak sihnał — niešta nie tak z abhruntavańniem pajezdki abo dakumientami, jakija čałaviek sabraŭ dla padačy. A značyć, niedachopy varta vypravić.
«Jość ciapier i momant «randomu», heta značyć situacyi, kali pryčyny takoha rašeńnia nievytłumačalnyja, — adznačaje surazmoŭca. — U majoj praktycy byli vypadki, kali mužu adkryvajuć vizu, a žoncy — nie. I heta pry identyčnym pakiecie dakumientaŭ i sumiesnaj padačy. Ci dzieciam staviać šenhien, a adnamu z baćkoŭ admaŭlajuć. Takich prykładaŭ u mianie šmat, ich pryrodu rastłumačyć składana».
Što rabić, kali admovili ŭ šenhienskaj vizie?
Tut Anastasija prapanuje nie panikavać, a padzialić dziejańni na try kroki.
Pieršy — spakojna pračytać błank admovy i aznajomicca z pryčynami.
U śpisie samych papularnych zvyčajna takija: niedastatkovaje abhruntavańnie mety pajezdki (naprykład, kiepska raśpisany maršrut, niama broni hatela i hetak dalej); niedachop srodkaŭ; sumnievy ŭ namiery pakinuć Šenhienskuju zonu, to-bok padazreńnie ŭ imihracyi; chłuślivyja danyja abo padroblenyja dakumienty; adsutnaść strachoŭki abo pamyłki ŭ joj; parušeńni padčas papiarednich vyjezdaŭ za miažu (naprykład, nievykanańnie terminaŭ znachodžańnia, vykarystańnie vizy nie pa pryznačeńni).
Krok druhi — krytyčna pahladzieć na svoj pakiet dakumientaŭ i padumać, što ź imi nie tak.
«Pieračytajcie, ci zrazumieła vy prapisali maršrut? Ci jość broni, kvitki, mierapryjemstvy? Ci ŭ vas tam abstraktnaje «pajezdka da siabroŭki», adras jakoj navat nie paznačany, — pryvodzić prykład ekśpiertka. — Źviarnicie ŭvahu na vypiski z banka: ci jość tam ruch hrošaj, ci miortvyja 200 rubloŭ?»
Zychodziačy z hetaha analizu, možna pierachodzić da treciaha kroku i vybrać: iści na apielacyju ci padavacca nanoŭ.
Što lepš: apielacyja ci novaja padača?
«Apielacyja razhladajecca ŭ tym ža konsulstvie, — instruktuje Anastasija. — Adnak padać jaje mahčyma nie va ŭsich. Naprykład, niamieckaje takija zajavy ŭžo nie prymaje. Tut jość tolki opcyja zapisacca na padaču znoŭku».
Pry hetym vizavaja ekśpiertka adznačaje, što siarod tych, chto razhladaje padobnyja zvaroty, vyłučajucca Hrecyja i Polšča.
Zychodziačy sa svajho dośviedu, surazmoŭnica kaža, što nie sustrakała kiejsaŭ z hrečaskaha konsulstva, u jakich takaja sproba niešta źmianiła b. A ŭ vypadku z polskaj, ź jaje słoŭ, stanoŭčych rašeńniaŭ vielmi mała.
«Ale, kali vy sapraŭdy źbirajeciesia ŭ Polšču i ŭ vas jość dadatkovyja dakumienty, jakija mohuć paŭpłyvać na rašeńnie konsuła, tady asprečvać admovu varta, — ličyć Łysakoŭskaja. — Ja b parekamiendavała rabić heta i ŭ vypadku ź Ispanijaj. Šmat prykładaŭ, dzie paśla apielacyi vizu ŭsio ž taki stavili. Adzinaje «ale», što heta konsulstva znachodzicca ŭ Maskvie, tak što pracedura moža raściahnucca na dva-try miesiacy».
Kali čałaviek nie choča zajmacca asprečvańniem, to lepš padacca na novy šenhien. Pry hetym, pa słovach ekśpiertki, vizu dazvolena zapytvać jak u dziaržavy, jakaja admoviła, tak i ŭ inšaj.
«Tut važna vybrać, skažam tak, pravilnuju krainu, heta značyć z bolš łajalnym staŭleńniem da admovaŭ. Naprykład, Italiju», — kaža Anastasija.
Jak chutka možna padavacca paśla admovy?
Pa słovach ekśpiertki, padavać dakumienty možna choć na nastupny dzień. Čas čakańnia nidzie nie prapisany. Adnak varta ŭličyć, što novaje konsulstva ŭbačyć u sistemie niadaŭniuju admovu i jaje padstavu.
«Kali nieści toj ža słaby pakiet, šaniec atrymać druhoje «nie» vielmi vysoki, — papiaredžvaje śpiecyjalistka. — Tamu pierad tym jak znoŭ padavacca, kiejs varta ŭzmacnić. Dapuścim, prykłaści bolš mocnyja finansavyja dokazy (pakazać ruch pa rachunku, stabilny dachod, kantrakt, daviedki pa IP/firmie), padać padrabiaznyja dakumienty pa žylli i maršrucie (realnyja broni, bilety, łahičny maršrut), dakazać suviaź ź Biełaruśsiu (prykłaści pracoŭnuju damovu, infarmacyju ab nieruchomaści ŭ krainie, daviedku ź miesca vučoby, paśviedčańnie ab šlubie i naradžeńni dziaciej)».
Akramia taho, Anastasija raić skłaści chadajnictva konsułu. U im sumlenna apisać metu pajezdki i rastłumačyć, čamu da hetaha admovili (naprykład, było niedastatkova dakumientaŭ i hrošaj). A taksama prapisać, što źmianiłasia ŭ novym pakiecie daviedak i vypisak.
U jakoje konsulstva lepš iści, kali ŭžo admovili ŭ vizie?
«Skažu ščyra, «lohkich» konsulstvaŭ dla biełarusaŭ bolš niama. Jość krychu bolš łajalnyja i krychu bolš randomnyja, to-bok niepradkazalnyja, — raskazvaje Łysakoŭskaja. — Kali havorym pra stanoŭčuju statystyku vydačy, to lidar tut, viadoma, Italija. Tyja, u kaho jość numar žyvoj čarhi abo mahčymaść tudy trapić, — ščaśliŭčyki. Polšča ŭ cełym taksama niadrenny varyjant. Asabliva kali ŭ čałavieka jość siabry ci svajaki, jakija mohuć zrabić zaprašeńnie. Pa haściavoj mecie pajezdki dobraja statystyka i ŭ vydačy viz, i ŭ ich praciahłaści. Adnak zapisacca na padaču takoha šenhiena pa-raniejšamu niaprosta».
Śpiecyjalistka nie chavaje: niama ahulnaj instrukcyi, dzie było b prapisana, u jakoje konsulstva lepš iści ŭ vypadku admoŭnaha rašeńnia pa vizie. Adnak, zychodziačy z vopytu pracy, jany z kalehami vyvieli svaje niehałosnyja praviły:
- paśla admovy Hrecyi vielmi vysokaja ryzyka atrymać toje ž samaje ŭ pasolstvie Ispanii;
- Vienhryja nieachvotna prymaje dakumienty paśla taho, jak Polšča skazała «nie»;
- Italija, jak praviła, nie hladzić na vizavyja rašeńni inšych krain i navat moža pastavić dobry, to-bok doŭhi, šenhien;
- Hiermanija dakładna nie stavić aŭtamatyčnaje «nie» paśla admoŭ u inšych pasolstvach, ale zadać pa ich pytańni mohuć.
«Treba razumieć, dla čaho vam viza i kudy vy nakiroŭvajeciesia. Kali, naprykład, pajezdka ŭ Polšču, a da hetaha vy atrymali dźvie admovy — ad Hrecyi i Ispanii, varta pasprabavać padacca na polski šenhien (tut važna prykłaści apłačanyja paćviardžeńni pražyvańnia i prajezdu) albo na italjanskuju», — dzielicca dośviedam surazmoŭca.
Anastasija taksama nie rekamienduje vybirać Hrecyju dla atrymańnia šenhiena ŭ chałodnyja miesiacy — z kastryčnika pa krasavik.
«U hety pieryjad mała šancaŭ atrymać tut šenhien. Čamu? Hreki nie vierać, što vy chočacie adpačyvać u ich u zimovy čas, — žartuje surazmoŭca. — U hetyja miesiacy lepš źviartacca ŭ konsulstva Ispanii abo inšych krain».
Jakija šancy atrymać novy šenhien paśla admovy?
«Heta całkam realna, — padbadziorvaje Anastasija. — Z majho dośviedu, praktyčna ŭsie, chto sprabavaŭ paśla admovy, atrymlivali vizy. Pytańnie tolki ŭ vybary stratehii. Treba razumieć pryčyny, uzmacnić pakiet dakumientaŭ i vybrać pravilnuju krainu dla novaj padačy».
«Paŭhoda čakańnia, minus $1200 — i nijakaj vizy». Jak biełarusy zaraz adkryvajuć «šenhien»
Jeŭrasajuz nie źbirajecca admianiać šmatrazovyja šenhienskija vizy dla hramadzian Biełarusi
Miežy adkryvajucca. A što ź vizami? Voś jakija krainy ich vydajuć achvotniej
«Limit pieravyšany». Vizavy centr Italii adnaviŭ zapis pa žyvoj čarzie
«Fatahrafuje pašpart, a potym ciabie samoha». Na miažy Polščy ź Biełaruśsiu testujuć novuju sistemu ŭjezdu
Kamientary