«Fatahrafuje pašpart, a potym ciabie samoha». Na miažy Polščy ź Biełaruśsiu testujuć novuju sistemu ŭjezdu
Polskija pamiežniki ŭkaraniajuć novuju sistemu ŭjezdu ŭ Jeŭrasajuz. Prachodžańnie miažy zapavoliłasia, u niekatorych biełarusaŭ prablemy z dakumientami, piša BGmedia.
U punkcie propusku «Tarespal» na miažy Polščy ź Biełaruśsiu ŭ piatnicu, 7 listapada, pačali testavać novuju sistemu kantrolu za ŭjezdam i vyjezdam u Jeŭrasajuz hramadzian trecich krain — The Entry/Exit System — skaročana EES.
U ES jaje pačali ŭkaraniać 12 kastryčnika. Biełarusy pišuć u prymiežnych čatach, što z-za hetaj sistemy prachodžańnie miažy zaciahvajecca. BGmedia raskazvaje, jakija dadzienyja ciapier źbirajuć polskija pamiežniki.
Jakija piersanalnyja dadzienyja biełarusaŭ źbirajuć pry testavańni novaj sistemy ŭjezdu i vyjezdu ŭ Jeŭrasajuz
Novuju sistemu ŭjezdu i vyjezdu ŭ Jeŭrasajuz pačali testavać u punkcie propusku «Tarespal» uviečary 7 listapada. Adzin z karystalnikaŭ prymiežnaha čata patłumačyŭ novaŭviadzieńni:
«Novaja sistema prachodžańnia miažy. U pamiežnika telefon, u im ustalavana prahrama:
- fatahrafujecca pašpart i ŭ ich u telefonie padhružajecca z bazy;
- fatahrafujecca viza, kali typ S;
- fatahrafujecca vaš tvar;
- fatahrafujucca adbitki palcaŭ (tut mohuć nie padhružacca ź ich bazy, tady treba nanova ich adskanavać u budcy)».
Svaim dośviedam padzialilisia i inšyja biełarusy.
«Pamiežnik fatahrafuje pašpart, a potym fatahrafuje ciabie samoha. I heta navat nie padjazdžajučy da budki».
«Tyja, chto z kartami pobytu, prachodziać u adnoj čarzie, z šenhienskimi vizami — u druhuju. U kaho šenhien, robiać fota i zdymajuć adbitki. Kali my prachodzili, sistema zavisała, nie sčytvała adbitki, robiać pa niekalki razoŭ, z-za hetaha doŭha».
«Pytajuć mienavita šenhien, nie tolki typ S. Kožnuju vizu pierapraviarajuć pa niekalki razoŭ. Kudyści adzvońvajucca pastajanna. Chodziać pa čarzie, skanujuć pašparty, skanujuć aparatam dałoni prosta ŭ čarzie. Bačyli, jak babulu try razy da siabie ŭ budku z aŭtobusa vyklikali. A voś nacyjanalnyja vizy D uvohule biez pytańniaŭ — zirnuŭ i dalej pajšoŭ. Adnaho čałavieka z adnaho mikraaŭtobusa praviarali pierad nami dźvie hadziny, pastajanna telefanavali kudyści. Z-za hetaha stajaŭ uvieś kanał».
«Vielmi surjozna praviarajuć dakumienty palaki. Nie va ŭsich usio ŭ paradku z dakumientami. Ich vysadžvajuć. Ź vizami typu S niejki zamut. Spačatku pamiežnik sam padychodzić z mabilnym terminałam. Potym jašče ŭ budcy druhi raz palcy zdavać. I tak pa kožnym, u kaho viza typu S».
Z-za novaj sistemy ŭjezdu ŭ ES prachodžańnie miažy pavialičvajecca
Biełarusy pišuć u prymiežnych čatach, što z-za testavańnia novaj sistemy miaža «stała» ŭviečary 7 listapada. Biełarusy skardzilisia na heta:
«Z novaj sistemaj jany vielmi doŭha afarmlali lehkaviki i aŭtobusy. Ja sam bačyŭ, jak na kanale aŭtobusnym aŭtobus stajaŭ hadzinu prykładna, a lehkavyja 3 hadziny nie ruchalisia. Heta było 7 listapada z 20 da 00.00. A ŭ biełarusaŭ pustym pusta było».
«Pry ŭjeździe ŭ Jeŭrasajuz na adnaho mianie było patračana nie mienš za 40 chvilin…»
«Tam novuju sistemu ŭviali, z-za hetaha aŭtobusy doŭha praviarajuć, hadzinu na aŭtobus».
«Skaniravali palcy i rabili fota. Vielmi doŭha. U mianie z kožnaj ruki raz 5 skaniravali, nie atrymlivałasia, potym jašče niekalki palcaŭ paasobku».
Niekatoryja skardzilisia načalstvu pamiežnikaŭ punkta propusku «Tarespal». Im adkazali, što treba paciarpieć, pakul novaja sistema nie zapracuje kančatkova:
«Patelefanavali, usio jany viedajuć pra čarhu, ale ničym nie dapamohuć. Novaja sistema, šmat novych dadzienych treba ŭbivać, tamu budzie pavolna».
«Ja bačyŭ, jak pavolna ruchalisia mašyny i aŭtobusy pa kanałach 07.11 z 20 pa 00.00 pa polskim. Prosta nierealna pavolna. Sistema, jakaja pavinna paskoryć prachodžańnie, pavinna naładzicca kančatkova, a nie pałavinčata».
«Pakul nie naładziać hety EES i ETIAS, to budzie tak sabie z RP u RB».
«Palaki testavali novuju sistemu biez štampaŭ, u vyniku zrazumieli, što zavaryli kašu ŭ vyhladzie kaśmičnych čerhaŭ z boku RP i vyrašyli adkłaści».
Miarkujučy pa spravazdačach u pamiežnych čatach, polskija pamiežniki praciahvajuć testavać novuju sistemu, ale vybaračna i ŭ karotkija pramiežki času:
«RP — RB, 09.11.2025, čas RP. U 07.05 pačatak kantrolu na PP RP (štampy ŭ pašparty stavili, praviarali adbitki, fatahrafavali). U 07.55 pačatak kantrolu na PP RB».
«RB — RP, 09.11. U 19.25 prajšli polski kantrol. Aŭtobus na skanier nie adpraŭlali. Palaki biaruć adbitki va ŭsich, u kaho viza — fatahrafujuć. Taksama zadajuć zvyčajnyja pytańni: kudy jedziecie, navošta, na kolki. Kali na pracu, to kim».
«RP — RB, vyjechali 09.11. Vielmi doŭha stajali na polskaj. Z novaj sistemaj usio vielmi i vielmi pavolna».
«Varšava — Minsk, 11 listapada. U 09.40 puścili na pašpartny. Za 20—30 chvilin jaho prajšli. Novaja sistema ŭ palakaŭ, vidać, na paŭzie: adbitki nie brali, fota nie rabili — usio pa-staromu».
«RP — RB. Tolki što byli na kantroli polskim, prajšli za 25 chvilin. Vidać, hetuju novuju sistemu adklučyli pakul što. Mahčyma, biez novaj sistemy ahlady buduć chutčejšyja i čarha skarocicca».
Novaja sistema kantrolu ŭjezdu i vyjezdu ŭ Jeŭrasajuz: aficyjnaja infarmacyja
Entry/Exit System (EES) — heta aŭtamatyzavanaja sistema rehistracyi hramadzian dziaržaŭ, jakija nie ŭvachodziać u Jeŭrasajuz i prybyvajuć z karotkaterminovymi vizitami. Jana pryznačana dla zamieny tradycyjnaha štampavańnia pašpartoŭ. Sistema zapracavała 12 kastryčnika.
Ciapier pry pierasiačeńni miažy ŭsie dadzienyja padarožnikaŭ buduć zachoŭvacca ŭ elektronnaj bazie. Sistema aŭtamatyčna padličyć, kolki dzion čałaviek užo pravioŭ u Šenhienskaj zonie i kolki jamu zastajecca z dazvolenych 90 dzion na praciahu 180.
Novaja sistema budzie dziejničać dla ŭsich hramadzian krain, jakija nie ŭvachodziać u ES, u tym liku dla biełarusaŭ, jakija pryjazdžajuć u krainy Šenhienskaj zony na karotki termin (da 90 dzion).
Što źmienicca paśla ŭviadzieńnia novaj sistemy
Pry pieršym ujeździe pamiežniki zdymuć adbitki palcaŭ, zrobiać fotazdymak i ŭniasuć asnoŭnyja dadzienyja ab pajezdcy.
U niekatorych punktach źjaviacca terminały samaabsłuhoŭvańnia, dzie častku dadzienych možna ŭvieści zahadzia.
Pry nastupnych pajezdkach sistema prosta źvieryć bijamietryju i aŭtamatyčna vyznačyć, kolki dzion zastałosia ŭ dazvolenym terminie znachodžańnia.
Sistema budzie rehistravać datu i miesca ŭjezdu/vyjezdu, proźvišča, imia padarožnika i jaho bijamietryčnyja dadzienyja. Dadzienyja ŭ joj buduć zachoŭvacca na praciahu troch hadoŭ ad daty apošniaj pajezdki.
Ujezd u Jeŭrasajuz mahčymy jak sa zvyčajnym, tak i ź bijamietryčnym biełaruskim pašpartam. Uładalniki bijamietryčnych zmohuć prachodzić praz terminały chutčej.
Novyja praviły nie tyčacca ŭładalnikaŭ vidaŭ na žycharstva i doŭhaterminovych viz (rabočych, studenckich).
Tranzitnym pasažyram (naprykład, na maršrucie Minsk — Kalininhrad praź Litvu) rehistracyja nie patrabujecca.
Dla ŭsich astatnich hramadzian, jakija ździajśniajuć karotkaterminovyja pajezdki, rehistracyja ŭ sistemie EES stanie abaviazkovaj.
Navošta ŭkaraniajuć novuju sistemu ŭjezdu ŭ Jeŭrasajuz?
Paskoryć prachodžańnie miažy, sprościć kantrol terminaŭ znachodžańnia, pavysić biaśpieku i praduchilić parušeńni vizavaha režymu.
«U pašparcie babuli staić data naradžeńnia 00.00.1945» — «A ŭ majoj XX.XX.1940». Jak takoje moža być?2
Kamientary