17 hadoŭ tamu ŭ Puchavickim rajonie zabili vieterana Druhoj suśvietnaj vajny. Doŭhi čas złačynstva zastavałasia nieraskrytym, paviedamlaje Hienprakuratura.
Usio adbyłosia ŭ noč za 6 studzienia 2007 hoda. U dom 83‑hadovaha žychara vioski Śvietły Bor pranik nieviadomy — jon znajšoŭ 250 tysiač niedenaminavanych rubloŭ (siońnia heta 25 rubloŭ), hadzińnik «Łuč» i dziaržaŭnyja ŭznaharody SSSR i Biełarusi, jakimi mužčynu ŭznaharodzili jak udzielnika vajny.
«Kali haspadar doma zastaŭ złačyncu na miescy zdareńnia, toj šturchnuŭ jaho ŭ hrudzi i nie mienš čym try razy ŭdaryŭ jaho małatkom pa hałavie. Pry hetym jon viedaŭ, što paciarpieły — čałaviek stałaha ŭzrostu, invalid II hrupy ŭ suviazi z chvarobaj aporna-ruchalnaj sistemy. Zatym abvinavačany praciahnuŭ pošuki kaštoŭnych rečaŭ u domie. Nie znajšoŭšy bolš ničoha kaštoŭnaha i bajučysia być zaśpietym na miescy złačynstva, jon schavaŭsia sa skradzienaj majomaściu i ŭznaharodami», — paviedamlaje Hienieralnaja prakuratura.
Paźniej mužčyna ździajśniaŭ roznyja złačynstvy (u tym liku ciažkija), znachodziŭsia ŭ miescach pazbaŭleńnia voli i ŭ vyniku staŭ fihurantam spravy ab zabojstvie vieterana VAV. Paśla vyvučeńnia materyjałaŭ spravy ŭ prakuratury Minskaj vobłaści pryjšli da vysnovy ab abhruntavanaści abvinavačańnia i pahadzilisia z kvalifikacyjaj pa č. 3 art. 207 (razboj), pp. 2, 12 č. 2 art. 139 (zabojstva), č. 3 art. 147 (naŭmysnaje pryčynieńnie ciažkaha cialesnaha paškodžańnia) KK Respubliki Biełaruś.
Kamientary