U Ńju-Jorku pačynajecca praces nad Łuidžy Mandžone. Jaho abvinavačvajuć u zabojstvie kiraŭnika strachavoj kampanii, jakoje ŭschvalavała ZŠA

U sudzie Ńju-Jorka pačalisia papiarednija słuchańni pa spravie ab zabojstvie ŭ śniežni 2024 hoda kiraŭnika strachavoj kampanii UnitedHealthcare Brajana Tompsana. Abvinavačańnie vystaŭlena 27‑hadovamu Łuidžy Mandžone, jamu moža pahražać śmiarotnaje pakarańnie, piša Bi-bi-si.

Jašče da jaho zatrymańnia śmierć vysokapastaŭlenaha strachoŭščyka padniała ŭ ZŠA chvalu złaradstva, prademanstravaŭšy niezadavolenaść mnohich amierykancaŭ niedastupnaściu miedycyny.

Papiarednija sudovyja słuchańni, jakija pačalisia ŭ Ńju-Jorku, pavinny ŭstanavić, ci moža sud razhladać materyjały dopytu Mandžone, jaki byŭ praviedzieny adrazu paśla jaho zatrymańnia ŭ pačatku śniežnia 2024 hoda ŭ McDonald's u horadzie Ałtuna ŭ štacie Piensilvanija, a taksama dałučyć da spravy ŭ jakaści rečyŭnych dokazaŭ znojdzienyja ŭ jaho tady pry sabie rečy — natatnik, pistalet i t.ł.

Abarona Mandžone nastojvaje, što sam dopyt byŭ praviedzieny z parušeńniem pracedury, u pryvatnaści, jamu nie było abvieščana ab jaho pravach, u tym liku ab pravie nie śviedčyć suprać siabie (tak zvanaje praviła Mirandy).

Mienavita tady, ličać advakaty, śledstva atrymała najvažniejšyja dla spravy materyjały, jakija ŭ tym liku pralivajuć śviatło na mahčymy matyŭ złačynstva, adznačaje Reuters: u natatniku Mandžone nibyta była znojdziena tłumačalnaja zapiska.

Na słuchańniach u sudzie adzin z palicejskich pakazaŭ, što nieŭzabavie paśla zatrymańnia Mandžone sam, biez padkazki, raskazaŭ jamu, što ŭ jaho ŭ zaplečniku lažyć pistalet, nadrukavany na 3D-pryntary. Advakaty staviać pad sumnieŭ, što Mandžone moh sam paviedamić ab sabie takuju kampramietujučuju infarmacyju, miarkujučy, što jaho dapytvali, nie paviedamiŭšy jamu ab jaho pravach, paviedamlaje Reuters.

Mandžone vystavili abvinavačvańni ŭ naŭmysnym zabojstvie jak na ŭzroŭni štata, tak i na fiederalnym uzroŭni. U štacie Ńju-Jork, dzie byŭ zabity Tompsan, śmiarotnaje pakarańnie zabaroniena, abvinavačańnie na ŭzroŭni štata pahražaje Mandžonie pažyćciovym źniavoleńniem.

Adnak na fiederalnym uzroŭni za takoje złačynstva złamyśnik moža być asudžany na śmiarotnaje pakarańnie, i abvinavačańnie ŭžo zajaviła, što płanuje zapytać mienavita vyšejšuju mieru pakarańnia.

Akramia zabojstva, Mandžone abvinavačvajecca taksama ŭ niezakonnym vyrabie zbroi, padrobcy dakumientaŭ i šerahu inšych złačynstvaŭ. Adnak vystaŭlenaje suprać jaho raniej abvinavačańnie ŭ teraryźmie było źniata.

Data razhladu spravy pa sutnaści jašče nie pryznačana, čakajecca, što praces pačniecca ŭ 2026 hodzie.

Mandžone nie pryznaje siabie vinavatym pa ŭsich artykułach abvinavačvańnia.

Mandžone, vychadziec z zamožnaj siamji i vypusknik prestyžnaha ŭniviersiteta ź Lihi plušču (abjadnańnie vaśmi viadomych univiersitetaŭ na paŭnočnym uschodzie ZŠA, kudy ŭvachodziać u tym liku Harvardski, Jelski, Kałumbijski i Prynstanski ŭniviersitety) byŭ zatrymany paśla niekalkich dzion aktyŭnych pošukaŭ. Jaho apaznali naviedvalniki McDonald's pa raspaŭsiudžanym palicyjaj kadry z kamier vonkavaha nazirańnia.

Tompsan, kiraŭnik najbujniejšaj u ZŠA miedycynskaj strachavoj kampanii UnitedHealthcare, byŭ zastreleny 4 śniežnia 2024 hoda ŭ centry Ńju-Jorka.

Palicyja, jak paviedamlali ŚMI sa spasyłkaj na pravaachoŭnikaŭ, znajšła hilzy, na jakich nibyta byli markieram napisany słovy Deny, Defend, Depose (Admaŭlaj, Abaraniajsia, Likviduj). Jany abyhryvajuć frazu, jakaja, na dumku paciarpiełych ad admovaŭ strachoŭščykaŭ apłacić lačeńnie, apisvaje ich stratehiju: Delay, Deny, Defend (Zaciahvaj. Admaŭlaj. Abaraniajsia).

Hienprakuror ZŠA Pem Bondzi nazvała zabojstva Tompsana «chaładnakroŭnym, dobra padrychtavanym złačynstvam, jakoje ŭzrušyła Amieryku».

Jašče da zatrymańnia Mandžone ŭ sacsietkach i ŭ pablikach stali źjaŭlacca repliki ŭ jaho padtrymku ad amierykancaŭ, niezadavolenych vysokim koštam miedycynskich pasłuh u ZŠA i niedastupnaściu miedstrachavańnia dla mnohich sacyjalnych hrup.

UnitedHealth Group, kudy ŭvachodziła kampanija, jakuju ŭznačalvaŭ Tompsan, była vymušana abmiežavać mahčymaść pisać kamientary pad dopisami pra jaho hibiel u svaich aficyjnych akaŭntach u sacsietkach paśla taho, jak karystalniki pakinuli pad imi tysiačy smajlikaŭ i emodzi z apładysmientami.

• 1
• 0
• 1
• 0
• 2
• 3
• 0
• 0