Prezident Hiermanii: Adnosiny z Maskvoj i Vašynhtonam nikoli nie buduć raniejšymi
Na dumku prezidenta Hiermanii Franka-Valtera Štajnmajera, vajna va Ukrainie pakazała, što Jeŭropa pavinna zabiaśpiečyć svaju biaśpieku ad Rasii, a nie razam ź joj. Zrešty, i viartańnia da tych adnosin z ZŠA, jakija byli da pačatku druhoha terminu Donalda Trampa, bolš užo nikoli nie budzie, piša Deutsche Welle.
«Napad Rasii na Ukrainu kardynalna parušyŭ usie pryncypy jeŭrapiejskaj sistemy biaśpieki», — zajaviŭ 24 sakavika prezident Hiermanii Frank-Valter Štajnmajer u Bierlinie padčas mierapryjemstva, pryśviečanaha 75‑j hadavinie MZS FRH.
Pavodle jaho słoŭ, dziesiacihodździami va ŭsich pryjarytetach stajała imknieńnie stvaryć «ahulny jeŭrapiejski dom» razam z Rasijaj paśla padzieńnia «žaleznaj zasłony», ale ahresija Maskvy suprać Kijeva robić heta niemahčymym.
«Ja miarkuju, što navat paśla vajny ŭ dačynieńni da hetaj Rasii havorka budzie iści nie pra mir, a pra toje, nakolki imavierny novy kanflikt. Karaciej kažučy: siońnia Jeŭropa pavinna zabiaśpiečvać svaju biaśpieku ad Rasii, a nie razam z Rasijaj», — praciahnuŭ kiraŭnik dziaržavy, dadaŭšy, što vieryć, što ŭ adnosinach z Maskvoj «nie budzie viartańnia da taho, što było da 24 lutaha 2022 hoda».
Na dumku prezidenta Hiermanii, Bundeśvier pavinien stać «aporaj kanviencyjnaj biaśpieki ŭ Jeŭropie».
«Dla hetaha našy ŭzbrojenyja siły majuć patrebu ŭ poŭnaj padtrymcy nie tolki z boku palitykaŭ, ale i ŭsiaho hramadstva. Heta aznačaje: dastatkovyja finansavyja srodki, sučasnaje ŭzbrajeńnie, bolš asabovaha składu», — patłumačyŭ palityk.
Jon dadaŭ, što ŭ vypadku, kali dobraachvotnaj słužby va Uzbrojenych siłach akažacca niedastatkova, krainie budzie nieabchodna viarnucca da vajskovaj pavinnaści:
«Ja liču, što lepš za ŭsio heta zrabić u formie abaviazkovaha terminu hramadskich rabot dla ŭsich, jaki adnyja buduć adbyvać u Bundeśviery, a inšyja — u sacyjalnych ustanovach».
U toj ža pramovie fiederalny prezident Hiermanii nazvaŭ vajnu ZŠA i Izraila ź Iranam «palityčnaj fatalnaj pamyłkaj», jakaja «supiarečyć mižnarodnamu pravu» i jakoj «možna było paźbiehnuć».
Jon kanstatavaŭ surjoznyja źmieny ŭ adnosinach sa Złučanymi Štatami i vykazaŭ zdahadku pa anałohii z Rasijaj, što ŭ ich užo «nie budzie šlachu nazad u pieryjad da 20 studzienia 2025 hoda», kali pačaŭsia druhi prezidencki termin Donalda Trampa.
Štajnmajer vykazaŭ mierkavańnie, što Bierlin pavinien być prahmatyčnym u adnosinach ź ciapierašniaj amierykanskaj administracyjaj i «zasiarodzicca na svaich asnoŭnych intaresach», ale «nie iści na kampramis sa svaimi pryncypami» i nie ihnaravać pry hetym mižnarodnaje prava.
«Va ŭrada ZŠA inšaje śvietapohlad, čym u nas — taki, jaki nie prajaŭlaje nijakaj pavahi da ŭstalavanych pravił, partniorstva abo ź ciažkaściu zavajavanaha davieru. My nie možam heta źmianić. My pavinny z hetym spraŭlacca. Ale ja pierakanany: u nas niama pryčyn dałučacca da hetaha śvietapohladu», — skazaŭ jon.
Maryja Kaleśnikava sustrełasia z prezidentam Hiermanii
Prezident Hiermanii sustreŭsia ź Cichanoŭskimi i zaklikaŭ vyzvalić palitviaźniaŭ u Biełarusi
Prezident Hiermanii padkreśliŭ rolu biełarusaŭ u pieramozie nad nacyzmam
Štajnmajer zajaviŭ ab «kančatkovym pravale» rasijskaj palityki Hiermanii i paabiacaŭ svajoj krainie ciažkija hady
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary