Prezident Litvy pavinšavaŭ biełarusaŭ z Dniom Voli: «Vaša rašučaść i stojkaść natchniajuć»
Prezident Litvy Hitanas Naŭsieda źviarnuŭsia da biełaruskaha naroda z nahody Dnia Voli. U svaim vinšavańni jon padkreśliŭ niepachisnuju padtrymku demakratyčnych pamknieńniaŭ Biełarusi i adznačyŭ hłybokuju histaryčnuju suviaź pamiž dźviuma krainami. Pryvodzim tekst.
Ad imia naroda Litvy chaču pavinšavać usich biełarusaŭ, jakija siońnia adznačajuć Dzień Voli. Hety dzień simvalizuje vaša niastomnaje imknieńnie da svabody, niezaležnaści i suvierenitetu i źjaŭlajecca vielmi važnym dla ŭsich ludziej, jakija šanujuć pravy čałavieka i demakratyju.
Jak vašy susiedzi, my zblizku nazirajem za vašaj advažnaj baraćboj za hetyja ahulnačałaviečyja kaštoŭnaści. Vaša rašučaść i stojkaść natchniajuć mnostva ludziej i ŭsioj mižnarodnaj supolnaści pastajanna nahadvajuć, nakolki važnaj źjaŭlajecca salidarnaść narodaŭ i paśladoŭnaja padtrymka tych, chto imkniecca da svaich asnoŭnych pravoŭ.
Dzień Voli — heta nie tolki dzień, kali vy ŭspaminajecie svaju baraćbu za svabodu na roznych histaryčnych etapach i achviary tych, chto zmahaŭsia za svabodnuju volu naroda. Heta taksama dzień razvažańniaŭ ab budučyni — jeŭrapiejskaj budučyni Biełarusi, u jakoj usie biełarusy buduć karystacca ŭsimi svabodami i mahčymaściami, jakich jany vartyja.
Litvu i Biełaruś jadnaje ahulnaja šmatviakovaja historyja, ahulnaja kulturnaja spadčyna i blizkija čałaviečyja suviazi. Litva aktyŭna padtrymlivaje biełaruskuju hramadzianskuju supolnaść i imkniecca paspryjać tamu, kab hałasy biełarusaŭ u mižnarodnaj supolnaści byli pačutyja.
Siońnia, jak i kožny dzień, chaču jašče raz zapeŭnić, što padtrymka Litvoj demakratyčnaj Biełarusi, jaje niezaležnaści i suvierenitetu źjaŭlajecca niepachisnaj. My padtrymlivajem volu ŭsich ludziej Biełarusi žyć u svabodnaj i demakratyčnaj dziaržavie. Litva pryznaje imknieńni, vykazanyja biełaruskimi demakratyčnymi siłami i ich lidarkaj Śviatłanaj Cichanoŭskaj, budavać demakratyčnuju i jeŭrapiejskuju budučyniu Biełarusi.
Žadaju zastavacca mocnymi i adzinymi pierad tvaram usich vyklikaŭ, ź jakimi vy sutykajeciesia štodnia. I dalej zmahajciesia za svabodu svajoj krainy, nie dazvalajcie vykarystoŭvać svaju dziaržavu ŭ rasijskaj vajennaj ahresii suprać Ukrainy.
Niachaj hety Dzień Voli budzie majakom nadziei, jaki aśviatlaje šlach da lepšaj budučyni Biełarusi — takoj, u jakoj tryumfujuć demakratyja, spraviadlivaść i pravy čałavieka. Niachaj hety dzień nablizić vas usich da ažyćciaŭleńnia imknieńnia da svabodnaj, niezaležnaj, kvitniejučaj i jeŭrapiejskaj Biełarusi.
Gyvuok, Baltarusija! Žyvie Biełaruś!
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych2121
Kamientary
[Zredahavana]