«Łukašenka lubić łajacca matam, ty łaješsia ŭ adkaz. A harełku ja vylivaŭ na padłohu». Koŭł raspavioŭ pra vizity ŭ Minsk

Jon padzialiŭsia padrabiaznaściami zastollaŭ z Alaksandram Łukašenkam, jaki lubić łajacca matam, a taksama detalami vyzvaleńnia palityčnych źniavolenych i kantaktaŭ ź biełaruskimi demsiłami. Apaviadańnie Džona Koŭła pryvodzić «Lusterka».

Niecenzurnaja leksika i vosiem tostaŭ

Svoj apoviad Džon Koŭł pačaŭ z uspaminaŭ pra toje, jak naohuł atrymaŭ pasadu śpiecpasłańnika i jak prajšła jaho pieršaja pajezdka ŭ Minsk. Kab znajści ahulnuju movu z Alaksandram Łukašenkam, daviałosia padładzicca pad jaho śpiecyfičnuju manieru znosin:

— Usio pačałosia z telefonnaha zvanka… U toj čas ja byŭ namieśnikam pasłańnika pa kanflikcie pamiž Rasijaj i Ukrainaj hienierała [Kita] Kiełaha. Mnie telefanujuć: «Pajedzieš u Biełaruś?» Ja pytajusia: «A dzie heta Biełaruś?» Potym kažu: «Dobra, heta dziela vyzvaleńnia amierykanskich źniavolenych». I pytajusia: «Nu, kali mnie jechać?» Mnie adkazvajuć: «Zaŭtra».

I ja pajechaŭ. Ja sustreŭsia z Łukašenkam, i jon vielmi šmat havoryć. Mnohija z hetych chłopcaŭ, jakija znachodziacca va ŭładzie pa 30 hadoŭ, lubiać pahavaryć. U Dziarždepartamiencie mnie skazali, što jon lubić «pabałbatać i paśmiajacca», nu my i pabałbatali. Prykładna praz paŭhadziny — chvilin sorak piać ja sprabuju zrazumieć, što jon za čałaviek. Jon pačynaje skardzicca na jeŭrapiejcaŭ…

Heta prahučyć hruba, i ja prašu prabačeńnia za leksiku, ale ja skazaŭ jamu: «Tak, jany kupka scykunoŭ» (aryhinał: «Yeah, they're a bunch of pussies»). I z hetaha momantu jon byŭ u mianie ŭ kišeni. Jon lubić łajacca matam, tamu ty łaješsia ŭ adkaz. I my vydatna paładzili. My prasiadzieli piać hadzin, i jon usio havaryŭ.

Pavialičyć

Potym byŭ dvuchhadzinny abied. Jon ustaje (viadoma, na stale harełka), padymaje tost za prezidenta Trampa. Chłopcy ź Dziarždepa robiać mnie znaki: «Ty pavinien vypić za jaho». Ja ŭstaju i pramaŭlaju adkazny tost. I tut pačalisia hetyja biaskoncyja tosty. A mnie nielha napivacca. Viadoma, para chłopcaŭ ź Dziarždepa vypili ŭsie vosiem tostaŭ i byli ŭ drabadan. Ja navučyŭsia rabić tak: sačyŭ za vačyma Łukašenki, pakul jon ahladvaŭ kampaniju, i kali jon na mianie nie hladzieŭ, ja prosta vylivaŭ harełku na padłohu. U vyniku ja vypiŭ tolki dźvie čarki, čaho było bolš čym dastatkova.

Ja viartajusia ŭ Štaty, a pierad samym adjezdam [ź Minska] damaŭlajusia z Łukašenkam: «Čamu b nam nie paŭtaryć?» U vyniku ja papracavaŭ z Krysam Śmitam (namieśnik pamočnika dziaržsakratara pa Uschodniaj Jeŭropie), my ŭsio arhanizavali i damovilisia pra novyja vyzvaleńni. <…> U toj raz ja vyciahnuŭ 14 čałaviek.

«Znajdzi mnie hetaha Łukašenku»

Klučavym pavarotnym momantam, jaki pryvioŭ da dalejšych masavych vyzvaleńniaŭ, Džon Koŭł nazyvaje asabistaje ŭklučeńnie Donalda Trampa. Daviedaŭšysia pra pieršyja pośpiechi ŭ pieramovach i vyzvaleńniach palitviaźniaŭ, prezident ZŠA nastajaŭ na nieadkładnaj telefonnaj razmovie z Łukašenkam.

— My viačerali z prezidentam Trampam. Maja žonka — Hreta Van Sasteren. Jana 30 hadoŭ pracuje ŭ [televizijnym] efiry. Prezident Tramp byŭ jaje biznes-ekśpiertam šmat hadoŭ tamu, tak my i paznajomilisia. Tak voś, my viačerajem, i Hreta zhadvaje pra toje, što ja zrabiŭ. Jon kaža: «Što? Pra što vy kažacie?» Ja raskazvaju ŭsiu historyju. A jon adkazvaje: «Ja chaču pahavaryć z hetym chłopcam! Dastań mnie numar». Na nastupny dzień ja zachodžu ŭ Avalny kabiniet z numaram. Tam znachodziacca Siuzi Uajłs (kiraŭnik aparata Biełaha doma. — Zaŭv. red.) i [Marka] Rubia (kiraŭnik Dziarždepartamienta ZŠA). Tramp choča, kab usio rabiłasia nieadkładna, i kaža: «Złučy mianie ź im, znajdzi mnie hetaha Łukašenku». Jany ŭ panicy: u nas niama pierakładčyka, heta nie ŭzhodniena. Ja padychodžu da Marka [Rubia] i kažu: «Słuchaj, davaj zrobim heta zaŭtra». A heta byŭ dzień, kali jon lacieŭ na Alasku na sustreču z Pucinym. Prezident Tramp kaža: «Ja patelefanuju z borta № 1». Ja idu ŭ situacyjny pakoj, my źviazvajemsia z Łukašenkam. U ich adbyłasia vydatnaja razmova, jany stali lepšymi pryjacielami, i heta vielmi, vielmi dapamahło.

Pavialičyć

— Paśla zvanka z borta № 1 ja viartajusia ŭ Biełaruś i vyciahvaju jašče 52 čałavieki. Ale vielmi važna toje, što ŭ mianie jość amal poŭnaja padtrymka prezidenta. I heta firmovy styl viadzieńnia spraŭ Trampa: naładzić adnosiny, nijakich papiarednich umoŭ, prosta sieści za stoł pieramoŭ. Kali ŭ vas jość papiarednija ŭmovy, ličycca, što vy budziecie spračacca z-za ich hadoŭ šeść. Tamu — prosta siadajcie za stoł. Mienavita heta ja i rabiŭ pa jaho ŭkazańni.

«Tam usio robicca ŭ lesie»

Apisvajučy sam praces vyzvaleńnia, dypłamat raskazaŭ pra praceduru pieradačy ludziej na biełaruska-litoŭskaj miažy:

— Adbyłasia adna reč, jakaja apraŭdvaje ŭsie namahańni: jany byli ŭ furhonie, tam usio robicca ŭ lesie ich Kamitetam dziaržbiaśpieki. Ty jedzieš ź Litvy ŭ Biełaruś, zajazdžaješ u les, jany mianiajuć numary i ładziać inšyja špijonskija štučki. Padjazdžaje furhon, unutry 14 čałaviek. Kali ja adčyniŭ dźviery, jany ŭsie siadzieli voś tak [ściaŭšysia]. Paźniej ja daviedaŭsia: jany dumali, što ich viazuć na rasstreł. Ja adčyniaju dźviery i kažu: «Vy svabodnyja». Nijakaj reakcyi. Mnohija ź ich havaryli pa-anhlijsku. Ja paŭtaraju: «Vy svabodnyja». Adzin chłopiec padniaŭ vočy, ale ŭsio roŭna cišynia. Jany dumali, što heta pastka. Tady ja skazaŭ: «Ja znachodžusia tut pa daručeńni prezidenta Złučanych Štataŭ Donalda Trampa». I jany ŭsie voś tak padniali hałovy. Ja skazaŭ: «Vy sapraŭdy svabodnyja». Vyrazy ich tvaraŭ byli nieacennyja.

Taksama Koŭł nazvaŭ hałoŭny pryncyp administracyi Trampa: sankcyi zdymajucca praparcyjna kolkaści vyzvalenych ludziej:

— Što vy pavinny razumieć: amal 80% našych sankcyj suprać Biełarusi byli ŭviedzieny z-za palityčnych źniavolenych. Tamu ideja zaŭsiody zaklučałasia ŭ nastupnym: vy addajecie nam źniavolenych, my dajem vam źmiakčeńnie sankcyj u roznych praporcyjach. U apošni raz, kali my byli tam u śniežni, my vyciahnuli jašče 123 čałavieki. I adzin ź ich byŭ łaŭreatam Nobieleŭskaj premii miru (havorka pra Alesia Bialackaha). Raptam Łukašenka advodzić mianie ŭ bok i kaža, što vypuścić hetaha čałavieka.

«Ty možaš spynić hetaje dziarmo?»

Akramia vyzvaleńnia ludziej, Koŭł zhadaŭ, što vykarystoŭvaje svoj pramy dostup da Łukašenki dla vyrašeńnia rehijanalnych prablem u adnosinach Biełarusi i krain Jeŭrasajuza:

— Ja sustrakajusia z pasłom Biełarusi ŭ AAN [Valancinam Rybakovym] prykładna raz u tydzień ci dva. Ciapier u praces uklučanyja Litva, Polšča. Treba damahacca ich supracoŭnictva. Ja pryjšoŭ da Łukašenki i skazaŭ: «Ty možaš spynić zapuskać hetyja sranyja šary? Jany stvarajuć žudasnyja prablemy». I šary spynilisia. Potym uźnikaje niešta jašče z Polščaj, i mnie davodzicca znoŭ iści da Łukašenki i kazać: «Ty možaš spynić hetaje dziarmo?» U lubym vypadku, ja vielmi aptymistyčny, što da kanca hoda my vyciahniem usich [palitźniavolenych].

Pavialičyć

Taksama Koŭł raskazaŭ, što prasiŭ pradstaŭnikoŭ biełaruskich demsił źnizić hradus krytyki, kab nie sarvać dalejšyja pieramovy:

— Ja znachodžusia va ŭdałym stanoviščy, tamu što maje adnosiny z Łukašenkam pracujuć. I ciapier ja šmat razmaŭlaju z apazicyjaj. Ale ja kažu im adnu reč: «Słuchajcie, vy chočacie vychodzić, kryčać i aburacca — ja ŭsio razumieju. Vy chočacie raskazvać, jaki jon drenny. Ale trymajcie heta na peŭnym uzroŭni, tamu što ŭ nas tam zastałosia jašče 800−900 čałaviek, i kali vy jaho zanadta razzłujecie, usio razvalicca». Ja na suviazi ź imi, u nas dobryja adnosiny, jany heta razumiejuć.

• 17
• 5
• 4
• 30
• 2
• 1
• 0
• 0