Łatvijski ŭrad maje namier padoŭžyć uzmocnieny pamiežny kantrol na biełaruska-łatvijskaj miažy jašče na paŭhoda — da 30 červienia 2026 hoda. Pra heta śviedčyć prajekt rasparadžeńnia, apublikavany na Partale pravavych aktaŭ, piša Delfi.lv.
Ciapier taki režym dziejničaje da 31 śniežnia hetaha hoda.
Ministerstva ŭnutranych spraŭ Łatvii tłumačyć, što cisk nielehalnaj mihracyi zastajecca stabilna vysokim. Niahledziačy na najaŭnaść aharodžy na miažy, čas ad času fiksujucca vypadki paškodžańnia płota i niezakonnaha pierachodu mihrantami dziaržaŭnaj miažy.
U hetaj situacyi asabliva važnym ličycca stvareńnie i raźvićcio techničnaj infrastruktury dla strymlivańnia nielehalnaj mihracyi. Płanujecca, što ŭsie nieabchodnyja techničnyja srodki buduć hatovyja da kanca 2025 hoda.
Ministerstva taksama padkreślivaje, što vajna Rasii suprać Ukrainy, jakuju adkryta padtrymlivaje Biełaruś, źjaŭlajecca dadatkovaj krynicaj ryzyki i moža matyvavać Biełaruś praciahvać sproby destabilizacyi situacyi na miažy z Łatvijaj.
Sioleta łatvijskija słužby pieraškodzili niezakonnamu pierasiačeńniu biełaruska-łatvijskaj miažy 11 847 čałaviek. U toj ža čas pa humanitarnych pryčynach u krainu ŭpuścili 31 mihranta.
U minułym hodzie sproby nielehalnaha pierachodu hetaj miažy spynili ŭ 5388 vypadkach, ale pa humanitarnych mierkavańniach Łatvija pryniała 26 čałaviek.
Kamientary