U Breście taksist vysadziŭ padletka pasiarod darohi, jaho šukali dźvie hadziny
U Breście padletak zhubiŭsia paśla taho, jak taksist vysadziŭ jaho ŭ doždž pasiarod darohi. Baćki vyklikali milicyju i čakajuć reakcyi servisu, piša BGMedia.
Situacyja adbyłasia 17 listapada. Chłopčyka pryvieźli na sieans masažu daloka ad doma. Baćkam treba patrebna pajechać pa svaich spravach, a chłopca jany płanavali zabrać paźniej, aformiŭšy dla jaho taksi.
Kali masaž skončyŭsia, chłopca pasadzili ŭ mašynu i pierakanalisia, što baćka aformiŭ zakaz na jaho.
Ale praź niekalki chvilin kiroŭca pačaŭ raspytvać dzicia, ci jość u jaho hrošy i telefon. Daviedaŭšysia, što ničoha niama, jon spyniŭsia, vysadziŭ chłopčyka prosta pad doždž i admianiŭ zakaz, paśla čaho adrazu pajechaŭ.
Chłopiec apynuŭsia adzin na vulicy, biez suviazi i razumieńnia, dzie jon i kudy ciapier iści. Baćka pasprabavaŭ datelefanavacca da kiroŭcy — ale toj hruba adkazaŭ, što ŭžo vysadziŭ dzicia, i kinuŭ słuchaŭku.
Pačalisia dvuchhadzinnyja pošuki: baćki, siabry i milicyja ahladali terytoryju, praviarali kamiery. Na zapisach było vidać, što padletak, zabłytaŭšysia, pajšoŭ u procilehły bok i spyniŭsia na pustym aŭtobusnym prypynku. Praz paŭtary—dźvie hadziny jaho znajšli — pramokłaha, napałochanaha, ale cełaha.
Padčas taho, jak baćki sprabavali vyśvietlić situacyju, padtrymka «Jandeks Taksi» adkazvała tolki šabłonnymi paviedamleńniami. Pavodle słoŭ baćkoŭ, nivodny žyvy apieratar tak i nie dałučyŭsia da razmovy.
Heta historyja vyklikała vialiki rozhałas. Mnohija kamientatary aburajucca pavodzinami kiroŭcy, nazyvajučy ich žorstkimi i biezadkaznymi. Inšyja ličać, što i baćki pavodzili siabie nieaściarožna, pakinuŭšy dzicia biez telefona. Ale šmat chto padkreślivaje: taksist u lubym vypadku nie mieŭ prava vysadžvać niepaŭnaletniaha pasiarod pajezdki, tym bolš u niepahadź.
Situacyju nazyvajuć taksama prajavaj bolš šyrokaj prablemy: nizki kantrol za kiroŭcami, hrubaść, častyja admieny zakazaŭ i nieefiektyŭnaja padtrymka. Siamja ŭžo źviarnułasia ŭ milicyju, i hramadskaść čakaje, jak adreahuje «Jandeks Taksi» i što tam zrobiać, kab takoje bolš nie paŭtaryłasia.
Ciapier čytajuć
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2424
Kamientary