Šon Pen za 1 dalar źniaŭsia va ŭkrainskim filmie ab vajnie. Što heta za film?
Film «Vajna vačyma žyvioł», u jakim zdymałasia zorka Halivuda, — heta almanach, jaki składajecca ź siami kinanavieł, asobnych historyj. Heta apaviadańni pra trusa, karovu, kata i inšych žyvioł, piša Bi-bi-si.
«My stvarali hety film, kab praz spačuvańnie da žyvioł raskazać našu historyju i pryciahnuć ludziej na naš bok. Tak kranuć hledača, kab jon nie pieraklučyŭsia z ukrainskaj temy, a spyniŭsia, dahladzieŭ i zrazumieŭ niešta pra nas», — kaža pradziusar karciny Aleh Kochan.
Jon padkreśliŭ, što misija filma — nie skardzicca, a praz mastactva pakazać śvietu, chto takija ŭkraincy i za što jany zmahajucca.
Aŭtary kažuć, što film hruntujecca na realnych padziejach z dadańniem mastackaha asensavańnia, mastackaj formy.
Saŭndtrekam stała pieśnia hurta Imagine Dragons.
Režysiory almanacha — Mirasłaŭ Słabašpicki, Julija Šaškova, Maksim Tuzaŭ, Alaksiej Mamiedaŭ, Ivan Sautkin, Śviatasłaŭ Kaściuk i Andrej Lidahoŭski.
Va ŭkrainski prakat film vyjšaŭ 6 listapada. Suśvietnaja premjera prajšła na kinafiestyvali Tribeca ŭ Ńju-Jorku.
Čamu mienavita Šon Pen
Pradziusar filma Aleh Kochan raskazvaje, što kali stvaralniki pačali prasoŭvać pieršyja try navieły pra žyvioł i vajnu, to zrazumieli: kinafiestyvali jašče bolš-mienš buduć zacikaŭleny ŭ hetaj karcinie, a voś dystrybjutary, kinateatry i anłajn-płatformy — značna mienš.
«Filmy pra vajnu naohuł ciažka pakazvać, dakładniej — ciažka matyvavać hledača pahladzieć», — kaža pradziusar.
Tamu, pa jaho słovach, jany vyrašyli pryciahnuć Šona Piena, kab uzmacnić uvahu da prajekta.
«Šon Pen arhanična isnuje ŭ filmie jak piersanaž, jon hraje amierykanskaha pradziusara, a nie hienierała», — raskazaŭ Kochan.
Pa jaho słovach, Šon Pen paprasiŭ scenaryj, pahladzieŭ adźniaty materyjał, paznajomiŭsia z režysioram svajoj navieły — Mirasłavam Słabašpickim — i zajaviŭ, što jaho hanarar za ŭdzieł składzie 1 dołar.
«Praca za adzin dalar va ŭkrainskim filmie — heta taksama padtrymka Ukrainy. Dla mianie heta rašeńnie stała paćviardžeńniem taho, što jon — vielmi mahutny pasłaniec miru, a taksama taho, što naša kino i jaho tema traplajuć dakładna ŭ mižnarodnuju aŭdytoryju», — kaža pradziusar «Vajny vačyma žyvioł».
Jon padkreślivaje, što «padčas zdymak nivodnaja žyvioła nie paciarpieła».
Na placoŭcy zaŭsiody prysutničali haspadary žyvioł i śpiecyjalisty pa kaardynacyi zdymak z udziełam žyvioł, jakija sačyli za ich kamfortam.
Šon Pen padtrymlivaje Ukrainu i nieadnarazova pryjazdžaŭ siudy. Jon padaryŭ svaju statuetku «Oskar» prezidentu Uładzimiru Zialenskamu.
24 lutaha 2022 hoda, kali pačałosia poŭnamaštabnaje ŭvarvańnie Rasii, Šon Pen znachodziŭsia ŭ Kijevie. Paźniej jon pryjazdžaŭ u Buču i Irpień, kab svaimi vačyma ŭbačyć nastupstvy złačynstvaŭ rasijskich vojskaŭ.
U 2022 hodzie Šon Pen arhanizavaŭ u Łos-Andželesie dabračynny viečar, na jakim sabraŭ bolš za miljon dołaraŭ u dapamohu Ukrainie.
Jon źniaŭ dakumientalny film «Supiersiła» pra vajnu va Ukrainie, jaki ŭ 2023 hodzie vyjšaŭ u prakat u ZŠA.
U filmie Šon Pen traplaje ŭ ofis prezidenta Zialenskaha ŭ pieršyja dni vajny, dzie zapisvaje razmovy z Uładzimiram Zialenskim i kiraŭnikom jaho ofisa Andrejem Jermakom.
Ciapier čytajuć
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2424
Kamientary