Biełaruskaja aktrysa «Spadkajemcaŭ» Daša Niakrasava trapiła ŭ skandał u ZŠA — suprać jaje ŭžo pišuć pietycyi

Vyniki hetaj razmovy «vylilisia» ŭ toje, što z kiniematahrafistkaj skasavała kantrakt amierykanskaje talent-ahienctva Gersh. A zaraz na płatformie Change.org źjaviłasia pietycyja z patrabavańniem departavać aktrysu i režysiorku z ZŠA ŭ Biełaruś, piša Reform.news.

Što zdaryłasia?

Skandał vybuchnuŭ paśla taho, jak stary epizod padkasta (zahružany ŭ kastryčniku) «Red Scare», jaki Daša Niakrasava viadzie z kulturnaj ahladalnicaj Hannaj Chačyjan, raptam staŭ virusnym u listapadzie. U efiry ŭdzielničaŭ Nik Fuentes, jaki źjaŭlajecca lidaram ruchu «Hrojpieraŭ» — sistemy pierakanańniaŭ, apisanaj ŚMI jak rasisckaja i antysiemickaja.

Padčas padkasta abmiarkoŭvalisia temy imihracyi, Kańje Uesta i rost papularnaści samoha Fuentesa. Vydańnie The New York Times apisvała Fuentesa jak «biełaha nacyjanalista», jaki zaklikaŭ da vyklučna «pra-biełaha», chryścijanskaha ruchu i zajaŭlaŭ, što «arhanizavanaje jaŭrejstva» padryvaje amierykanskuju zhurtavanaść.

U padkaście Niakrasava nie tolki abmiarkoŭvała Fuentesa, ale i chvaliła jaho, kažučy: «Ja takaja prychilnica, ščyra kažučy» («I'm such a fan, honestly.»). Akramia taho, jany abmiarkoŭvali «mižnarodnaje jaŭrejstva» i dapuskali abraźlivyja stereatypy nie tolki ŭ dačynieńni da jaŭrejaŭ, ale i ŭ dačynieńni da italjancaŭ, azijataŭ i inšych supolnaściaŭ.

Pavialičyć

Karjera i minułyja sprečki

Šyrokuju viadomaść Dašy Niakrasavaj pryniesła rola Komfry Pelic u chit-sieryjale HBO «Spadkajemcy» (Succession), dzie jana źjaviłasia ŭ dzieviaci epizodach jak člen PR-kamandy Kiendała Roja. Siarod inšych jaje rabot — sieryjały «Mister Robat», «Źmiaja», «Dzikinsan», film «Materyjalistka», a taksama tryler «Žach na 61‑j vulicy», jaki jana sama napisała i zrežysavała. Adznačym, što «Žach na 61‑j vulicy» byŭ pryznany «Najlepšym poŭnamietražnym debiutam» na Bierlinskim kinafiestyvali ŭ 2021 hodzie.

Niahledziačy na paśpiachovuju karjeru, heta nie pieršy raz, kali vykazvańni Niakrasavaj vyklikajuć sprečki. Raniej u artykule The New Yorker jana była pracytavanaja antysiemickimi i antyklerykalnymi słovami:

«Francysk — nie sapraŭdny Papa, my ŭsie heta viedajem. … Vy nie pazbaviciesia ad jaŭrejaŭ. Jany infiltravali Carkvu daŭno».

Vyniki skandału

Hetym razam skandał nabraŭ surjozny abarot. Z kiniematahrafistkaj skasavała kantrakt amierykanskaje talent-ahienctva Gersh. Pryčym reakcyja była vielmi chutkaj — heta adbyłosia litaralna na praciahu niekalkich hadzin paśla taho, jak ryłzy z padkasta pačali masava raspaŭsiudžvacca ŭ sacyjalnych sietkach. Taksama aktrysa była vyklučana sa składu ŭdzielnikaŭ budučaha filma «Ikanaborac» (Iconoclast). Pradziusary adklikali jaje zaprašeńnie da taho, jak byŭ padpisany kantrakt, kab paźbiehnuć niehatyŭnaha ŭpłyvu skandału na prajekt.

I litaralna niadaŭna na płatformie Change.org źjaviłasia pietycyja z zaklikam departavać aktrysu ŭ Biełaruś, adkul jana rodam. Aŭtary pietycyi ŭ svaim zvarocie spasyłajucca na toje, što baćka Niakrasavaj pryjechaŭ u ZŠA pa vizie H-1B.

«Ciapier […] prahrama H-1B spyniajecca, i ŭsie, chto atrymlivaŭ ich u minułym, buduć departavanyja, navat kali jany atrymali hramadzianstva ZŠA.

My, nižejpadpisanyja, zaklikajem urad ZŠA taksama departavać ich dziaciej, navat kali jany źjaŭlajucca hramadzianami Złučanych Štataŭ Amieryki, i pakorliva prosim, kab pieršaja departacyja była simvaličnaj — departacyjaj nievialikaj internet-znakamitaści Dašy Niakrasavaj», — aburajucca aŭtary.

Na dadzieny momant pietycyja nabrała kala 1500 hałasoŭ.

Darja Niakrasava naradziłasia ŭ 1991 hodzie ŭ Minsku. Dziaŭčynie było čatyry hady, jana razam sa svajoj siamjoj emihravała ŭ ZŠA i pasialiłasia ŭ Łas-Viehasie, štat Nievada. Na siońnia jana paśpiachovaja amierykanskaja aktrysa kino, telebačańnia i ahučvańnia, kinarežysiorka, scenarystka.

• 9
• 0
• 5
• 33
• 0
• 1
• 1
• 1