U staličnych paliklinikach možna biaspłatna pryščapicca ad hrypu i kavidu
U paliklinikach Minska praciahvajecca vakcynacyja suprać hrypa i karanavirusa.
Adnačasova možna zrabić dźvie pryščepki, pryčym biaspłatna, pišuć Minsk-naviny.
Dla minčukoŭ dastupnyja try vakcyny suprać hrypu. Na biaspłatnaj asnovie — rasijskaja «Hrypoł plus».
Za hrošy hramadzian, pradpryjemstvaŭ, arhanizacyj pryščaplajuć preparatami «Vaksihryp Tetra» (Francyja) i «Influvak Tetra» (Niderłandy), — raskazała hałoŭny doktar 8‑j haradskoj palikliniki, hałoŭny pazaštatny śpiecyjalist pa ambułatornaj dapamozie kamiteta pa achovie zdaroŭja Minska Taćciana Kamkova.
— Adnačasova možna vakcynavacca ad karanavirusa. U najaŭnaści «Kanvaseł» (Rasijskaja Fiederacyja). U hetym vypadku ŭkoły robiać u roznyja ruki.
Pavodle słoŭ śpiecyjalista, navat u čałavieka, jaki zaniaty na pracy i abmiežavany ŭ časie, nie pavinna ŭźniknuć ciažkaściej z tym, kab pastavić pryščepku.
— Kabiniety vakcynacyi arhanizavanyja va ŭsich paliklinikach, i tudy možna źviarnucca i ranicaj, i ŭviečary (u časy pracy miedustanoŭ) u budnija dni, — udakładniła T. Kamkova.
— Taksama pryščepki robiać pa subotach. Pacyjentaŭ prymajuć biez zapisu. Nieabchodny miedahlad pravodziać niepasredna pierad uviadzieńniem preparatu. Kali sa zdaroŭjem usio ŭ paradku, pacyjenta nakiroŭvajuć na vakcynacyju.
Akramia taho, kali čałaviek źviarnuŭsia, naprykład, da vuzkaha śpiecyjalista, to hety doktar taksama moža pravieści ahlad i nakiravać na pryščepku. Darečy, achvotnych zrabić jaje dastatkova. Hramadzianie źviartajucca pastajanna, asabliva tyja, chto starejšy za 65 hadoŭ. U anamniezie ŭ takich ludziej chraničnyja zachvorvańni, siarod jakich sercava-sasudzistyja i cukrovy dyjabiet. Imunitet źnižany. Hramadzianie stałaha ŭzrostu, jak nichto inšy, razumiejuć: vakcynacyja — najlepšaja prafiłaktyka hrypu i jaho ŭskładnieńniaŭ.
Pryščaplajem ich biaspłatna, jak i tych, chto ŭvachodzić u hrupu ryzyki (pa zaražeńni hrypam, raźvićci ciažkich uskładnieńniaŭ). Heta ciažarnyja, supracoŭniki dziciačych sadkoŭ, škoł, himnazij, rabotniki, jakija zabiaśpiečvajuć žyćciadziejnaść našaha horada (transpart, handal, hramadskaje charčavańnie i hetak dalej).
— Dla zručnaści haradžan pryščepačnyja bryhady vyjazdžajuć na pradpryjemstvy i ŭ arhanizacyi, — dadała T. Kamkova. — Uvohule, vykarystoŭvajem roznyja formy pracy. Hałoŭnaje, kab minčuki pryščaplalisia.
Aptymalny čas — kastryčnik i listapad. Tady imunitet paśpieŭ by sfarmavacca, i da čakanaha ŭzdymu zachvaralnaści na VRI (studzień — luty) čałaviek budzie nadziejna abaronieny. Navat kali zachvareje, ryzyka ŭskładnieńniaŭ budzie minimalnaj.
Kamientary