Biełaruskija čynoŭniki źniali sieryjał dla padletkaŭ. «Vydalicie mnie internet», — prosiać tyja, chto hladzieŭ
Naprykancy kastryčnika adbyłasia premjera biełaruskaha sieryjała dla padletkaŭ «Zumiery». Pieršyja dźvie sieryi ŭžo źjavilisia na YouTube. My pahladzieli ich za vas.
Ideałahičnyja nadziei na «Zumieraŭ» uskładali vialikija.
«U piedahohicy jość taki pryncyp — «roŭny navučaje roŭnaha», — kazaŭ pieršy namieśnik ministra infarmacyi Andrej Kuncevič. — Sapraŭdy, praz maładych hierojaŭ, jakija źjaŭlajucca jaskravymi pradstaŭnikami pakaleńnia zumieraŭ, praz pasyły, što jany danosiać u sieryjale da svajoj aŭdytoryi, chaciełasia źviarnucca da moładzi, pahavaryć pra tyja prablemy, jakija siońnia ich chvalujuć, abmierkavać aktualnyja rečy, što vyznačajuć žyćcio biełaruskaj moładzi ŭ pryźmie pakaleńnia zumieraŭ».
Hienieralnym pradziusaram staŭ deputat Mahiloŭskaha harsavieta Alaksandr Łaŭrynovič (raniej jon byŭ pradziusaram realici-šou «Fabryka błohieraŭ»).
Prajekt zdymali letam u siaredniaj škole №46 Mahilova. Dla jaho śpiecyjalna adbirali nieprafiesijnych akcioraŭ — stvaralniki śćviardžajuć, što atrymali bolš za 16 tysiač zajavak ad dziaciej ź Biełarusi, Rasii, Kazachstana i Uźbiekistana.
Zdajecca, ludzi, jaki pracavali nad «Zumierami», nie čytajuć biełaruskija naviny. Bo toje, što prapanoŭvajuć hladzieć školnikam, maksimalna daloka ad realij ajčynnych škoł.
Ale treba pryznać, što ŭ zdymačnaj kamandy sapraŭdy była zadačka z zoračkaj. Pakazać realnyja budni — čorna-siniuju masu dziaciej u adzieńni dziełavoha stylu, niecikavyja mierapryjemstvy dla pijanieraŭ dy nastaŭnic, jakija prymušajuć dziaŭčat zmyvać kaśmietyku dy zaplatać kosy? Dyk chto ž hetuju panyłaść hladzieć budzie?!
Hałoŭnaja ž ideałahičnaja meta, jakuju raniej ahučvali, — «uvajści ŭ moładzievuju aŭdytoryju praz płatformu, jakaja źjaŭlajecca dla jaje asnoŭnaj pry atrymańni kantentu, navin i naratyvaŭ».
Tamu hieroi «Zumieraŭ» vyhladajuć tak, što siaredniestatystyčnaja dyrektrysa atrymała b infarkt, pabačyŭšy takich vučniaŭ. Jany spakojna nosiać u škole džynsy, chodziać z kaśmietykaj i ružovymi vałasami. Cud — ale nichto z darosłych piersanažaŭ sieryjała ad hetaha prytomnaść nie stračvaje.
A voś sapraŭdnych hledačoŭ-školnikaŭ moža razdražniać taja biezdań pamiž ich školnym žyćciom i ekrannym «zumierskim».
Ci možacie vy ŭjavić sabie vučanicu mahiloŭskaj škoły, jakaja na poŭnym surjozie prosić u bufietčycy ŭ stałoŭcy «matču na kakosavym, ale bieź pieny»? Scenarysty «Zumieraŭ» — lohka. Praŭda, zamiest toj matčy dziaŭčyna ŭsio ž atrymlivaje niejki zialony smuzi.
Jak ździek vyhladaje toje, što hieroi nie tolki spakojna karystajucca ŭ škole mabilnymi telefonami, ale i ŭvieś čas zapisvajuć na ich videa dla sacsietak. I heta ŭ toj samy čas, kali va ŭsich biełaruskich škołach ź vieraśnia hadžety pad strohaj zabaronaj.
A jak vam toje, što hałoŭnaja aktyvistka vyrašaje zrabić tajemnuju načnuju viečarynu na terytoryi škoły dla svaich siabroŭ? Pavieryć u heta možna tolki ŭ tym vypadku, kali ŭ treciaj sieryi dzieciam raptam buduć tłumačyć, što takoje pastanoŭka siamji ŭ sacyjalna-niebiaśpiečnaje stanovišča.
U adroźnieńni ad «Kłasnaj» u «Zumierach» vyrašyli nie pierahružać vizualny šerah ideałahičnymi simvałami. U kabiniecie dyrektara navat niama partreta Łukašenki. Zatoje papki ŭ šafie stajać idealna: šerah čyrvony, šerah zialony.
U «Zumierach», jak i ŭ filmie Chaleckaha, vyrašyli prapisać piersanaža, jaki maryć stać siłavikom. Kaniečnie, heta mahutny chłopiec, jaki ŭvieś čas boŭtajecca na turnikach ci baksiruje. Mienavita jon ratuje niaščasnaha «ajcišnika» ad chulihanaŭ, jakija adabrali ŭ taho kampjutar.
Zdajecca, u takoj situacyi možna było b prademanstravać dzieciam, jakija sutyknulisia z rekietam u rodnaj škole, jak pravilna siabie pavodzić — źviarnucca pa dapamohu da darosłych. Ale ž nie — navošta vyrašać prablemy z dapamohaj taho ž dyrektara, kali «siłavik» achvotna napužaje chulihanaŭ.
Imknučysia havaryć na movie moładzi, scenarysty pierastaralisia — imavierna, jany vyrašyli, što čym bolš budzie słenhavych słoŭ u dyjałohach, tym sučaśniej. Z hetaha krynžujuć navat u kamientaryjach da videa.
Pieršuju sieryju na YouTube pahladzieła 131 tysiača čałaviek. Druhuju za 23 hadziny — mienš za piać tysiač, ale jašče praz hadzinu kolkaść prahladaŭ vyrasła da 18 tysiač. Kamientaryi zbolšaha nie vielmi kamplimientarnyja.
«Zumieraŭ» prezientavali jak pieršy biełaruski interaktyŭny sieryjał. Abiacali, što hledačy zmohuć upłyvać na siužetnuju liniju. Dla hetaha nieabchodna hulać u hulni ŭ adnajmiennym dadatku. Ale i tut u kamientataraŭ uźnikła całkam łahičnaje pytańnie: pra jaki ŭpłyŭ moža iści havorka, kali sieryi ŭžo źniali letam?
Imavierna, heta dobry varyjant, kab paznajomić dziaciej ź biełaruskimi realijami: ad taho, jak ty prahałasuješ, ničoha nie zaležyć.
Film «Kłasnaja»: pahladzieli jaho, kab zrazumieć, jakimi «jany» chočuć bačyć «nas»
U Biełarusi zdymajuć novaje prapahandysckaje kino, kab padletki kinulisia pastupać va ŭniviersitet na nastaŭnikaŭ
Premjera kamiedyi ad «Biełaruśfilma»: u hałoŭnaj roli rasiejec, a małady režysior prapanuje vadzić školnikaŭ
Ciapier čytajuć
«Kajłas, ja idu». Što za biełaruska źnikła ŭ žudasnym sieli ŭ Niepale12
Kamientary