Ekanamist Dźmitryj Kruk patłumačyŭ, čamu Łukašenka nie vyratuje lohkuju pramysłovaść, jak i ŭsio, za što jon biarecca.
Abmiarkoŭvajučy niadaŭnija źmieny ŭ kiraŭnictvie «Biellehprama», ekanamist Dźmitryj Kruk u efiry jutub-prajekta «Obyčnyj viečier» zaŭvažyŭ, što hałoŭnaja prablema biełaruskaj lohkaj pramysłovaści — u niemahčymaści kankuryravać z Kitajem, «navat z tym uzroŭniem zarobkaŭ, jaki jość u Biełarusi».
«Kankuryravać z kitajskim lohpramam siońnia ŭ śviecie vielmi mała chto moža. Albo heta pavinny być premijalnyja brendy, jak u Italii, i ich pavinny kuplać za lubyja hrošy, jakija tady adbivajuć zarobki. Albo treba niejkim čaroŭnym čynam «abaraniać» unutrany rynak tak, kab jon spažyŭ. (…) To bok aharadzić jaho taryfami, kab tudy ničoha nie pranikała».
Ale sapraŭdnaja krynica prablemy, na dumku ekanamista, u žadańni Łukašenki zachavać halinu, jakaja była mocnaj u časy Savieckaha Sajuza, nasupierak sučasnym realijam.
«Voś tak u nas šmat što pracuje. Toje, što było ŭčora, stracić nielha. Ruchacca napierad zabaroniena».
Hetaja łohika sparadžaje zahannaje koła. Zamiest taho, kab pryznać pamyłkovaść raniejšych rašeńniaŭ i stratnaść układzienych srodkaŭ, čynoŭniki sprabujuć abaranić svaje papiarednija rašeńni. Dla hetaha jany navat, pa słovach Kruka, prydumali eŭfiemizm «vyratavać učorašnija ŭkładańni inviestycyj».
U vyniku idzie čarada pamyłak, jakija časta nasłojvajucca adna na adnu. Adnak pryznać pamyłki aznačaje znajści taho, chto budzie za ich adkazvać. U vyniku, jak tłumačyć Kruk, «Kamvol» biezvynikova «ratujuć» užo kala 15 hadoŭ, i kožny raz heta supravadžajecca finansavymi ŭlivańniami.
Kruk pryvodzić pakazalny prykład z ułasnaha dośviedu:
«Hod 2017—2018 byŭ, stvaryli takuju mižviedamasnuju hrupu (…) pa rašeńni prablemy drennych daŭhoŭ. I tam tady adzin čynoŭnik zajaviŭ: «Prablemu drennych daŭhoŭ vyrašyć dosyć prosta. Prablema ŭ tym, što za ich niechta pavinien budzie adkazać». Nu, kali pierakładać na prostuju movu, pavinna čałaviek 10 sieści. A pakolki nichto siadać nie žadaje, voś tamu prablemu i vyrašyć składana».
Pa mierkavańniu Kruka, źniaćcie Taćciany Łuhinoj z pasady hłavy «Biellehprama» i pryznačeńnie jaje dyrektaram «Kamvola», taki ž pošuk vinavataha. Samo prablemnaje pradpryjemstva jon nazyvaje «štrafbatam» dla Łuhinoj.
«Pryznačeńnie čempijonaŭ»
Taki padychod, kali praściej znajści vinavataha, čym pryznać pamyłkovaść samoj sistemy, tłumačycca nastupstvami łohiki režymu Łukašenki, jakaja isnuje z 1990‑ch hadoŭ. Jaje Kruk nazyvaje «pryznačeńniem čempijonaŭ».
«Usie prahramy raźvićcia Biełarusi, tak zvanyja piacihodki, jakija, pa vialikim rachunku, źjaŭlajucca padstavaj dla rašeńniaŭ na štohadovym uzroŭni, (…) pabudavany na pryncypie, što treba vyznačyć, jakaja halina jaki ŭkład zabiaśpiečyć.
Pa sutnaści, dziaržava biare na siabie rolu takoha prahresara sa Struhackich: my budziem vyznačać, kudy my pavinny ruchacca, i kožnamu damo źvierchu daručeńnie. Voś vam treba vyraści na 15%, vam treba vyraści na 20% i tamu padobnaje».
Taki mietad, pavodle ekśpierta, moh pracavać u industryjalnuju epochu 70— 80‑ch hadoŭ, kali hałoŭnaj prablemaj było nie pradać tavar, a vyrabić jaho. Tady i naradziŭsia kult «mocnaha haspadarnika». Ale ŭ 90‑ia śviet źmianiŭsia. Z raźvićciom technałohij i vychadam na arenu Kitaja jak «suśvietnaj vytvorčaj majsterni» hałoŭnaj zadačaj staŭ nie praces vytvorčaści, a pošuk svajho spažyŭca i kankurentnych pieravah.
U vyniku sproby «vyciahnuć za vušy» lohkuju pramysłovaść — heta nie što inšaje, jak sproba schavać papiarednija pamyłki. I hety praces biaskoncy.
«Voś hetaja fiška, paŭtarusia, ale, pa-mojmu, jana važnaja (…) — «vyratavać papiarednija inviestycyi». «My ž učora tudy ŭkłali 100 miljonaŭ dałaraŭ. Jak my možam pryznać, što jany prahareli? Davajcie ŭkładziom jašče 100 miljonaŭ, ale pasprabujem usio ž taki vyratavać pieršapačatkovyja 100 miljonaŭ». I voś hetaje bałota, jano zaciahvaje. I voś tak pa kole raźvivajecca ŭžo šmat-šmat hadoŭ».
Ciapier čytajuć
Litva znoŭ začyniła miažu ź Biełaruśsiu — iznoŭ šary z kantrabandaj9
Kamientary
Talent taki)