Čym strašniejšaja kładziešsia spać, tym pryhažejšaja pračynaješsia: modnicy apantanyja ekstremalnym načnym dohladam
Kožnuju noč tysiačy dziaŭčat kładucca spać, «mumifikavanyja» płastami kaśmietyki i bjuci-srodkaŭ. Ich meta — ranicaj źniać ź siabie ŭsie «binty» i ŭbačyć u lusterku idealny tvar. Ale ci pracuje?
U tyktoku papularny novy trend, jaki chavajecca pad chešteham #morningshed — składanyja pracedury padrychtoŭki siabie da snu, jakija abiacajuć aślaplalny vyhlad ranicaj. Jany vychodziać daloka za miežy naniasieńnia zvyčajnaj syrovatki ci kremu. Hałoŭny pryncyp možna sfarmulavać tak: čym bolš dziŭna i niepryvabna vyhladaješ pierad snom, tym bolš uražvajučy budzie vynik ranicaj.
Jak piša El Pais, kožnuju ranicu tysiačy dziaŭčat pračynajucca «mumijami» i traciać čas, kab pazbavicca ad atrybutaŭ svajho načnoha rytuału: niekalkich płastoŭ kaśmietyki, masak dla tvaru i vusnaŭ, raznastajnych patčaŭ, klejkaj stužki dla fiksacyi rota i bandažoŭ dla karekcyi avała tvaru. Da ŭsiaho hetaha dadajecca stres ad nieabchodnaści spać nieruchoma i na śpinie.
Pavodle źviestak płatformy dla analizu anłajn-trendaŭ Spate, siaredniemiesiačnaja kolkaść pošukaŭ pa zapycie #morningshed u hetym hodzie skłała 3,6 miljona. Ironija ŭ tym, što dla dasiahnieńnia modnaha «naturalnaha» vyhladu patrabujucca kałasalnyja namahańni. Čym bolš składanym i navat absurdnym vyhladaje načny rytuał, tym bolš uvahi jon pryciahvaje ŭ sacsietkach.
Ci taki dobry efiekt?
Maski, patčy, bandažy… Dermatołahi adnahałosna śćviardžajuć, što bolšaja kolkaść słajoŭ kaśmietyki nie harantuje lepšaha vyniku. Naadvarot, mnohija ź ich ličać, što dobra pradumany minimalizm značna bolš efiektyŭny. Šmatetapnyja rytuały, pavodle ich słoŭ, mohuć vyklikać razdražnieńnie, kantaktny dermatyt, akne i parušeńnie pH-bałansu skury.
Asabliva nastojliva śpiecyjalisty rajać nie spałučać retynoidy z chimičnymi pilinhami. Retynoidy — heta vielmi aktyŭnyja vytvornyja vitamina A, jakija paskarajuć abnaŭleńnie kletak, a chimičnyja pilinhi (srodki z AHA– i BHA-kisłotami) intensiŭna ačyščajuć pavierchniu skury. Vykarystańnie abodvuch kampanientaŭ adnačasova moža pryvieści da mocnaha razdražnieńnia i paškodžańnia achoŭnaha barjera skury, bo heta zanadta ahresiŭnaje ŭździejańnie. Taksama nie rekamiendujecca spałučać niekalki vidaŭ pilinhaŭ za adnu praceduru, kab nie vyklikać praźmiernaje abłuščvańnie i abiazvodžvańnie skury.
Vitamin S lepš zasvojvajecca ranicaj, a retynoidy — uviečary. Pieptydy mohuć stračvać svaju efiektyŭnaść pry kantakcie z mocnymi kisłotami. Ahulnaja rekamiendacyja — vykarystoŭvać adzin «mahutny» aktyŭny kampanient za noč u spałučeńni sa srodkami dla adnaŭleńnia skury.
Srodki biez dakazanych vynikaŭ
Pośpiech hetych rytuałaŭ u sacyjalnych sietkach, zdajecca, napramuju zaležyć ad kolkaści praduktaŭ na tvary. Adnak efiektyŭnaść mnohich ź ich vyklikaje ŭ śpiecyjalistaŭ vialikija sumnievy.
Płastyr dla rota, jaki nibyta zabiaśpiečvaje pravilnaje nasavoje dychańnie, dermatołahi i miedyki ličać niebiaśpiečnaj praktykaj. Jany papiaredžvajuć, što heta moža vyklikać chrap, apnoe i navat udušša, kali płastyr ssuniecca padčas snu.
Ełastyčnyja paviazki dla tvaru z efiektam pachudzieńnia na samoj spravie nie źmianšajuć tłuščavyja adkłady. Jany dajuć tolki časovy kampresijny efiekt, a son u ich moža vyklikać razdražnieńnie i praźmiernuju nahruzku na skronieva-skivičny sustaŭ.
Klejkija stužki dla tvaru (tejpy), jakija nibyta praduchilajuć utvareńnie marščyn, taksama nie majuć dakazanaj efiektyŭnaści, a ryzyka paškodzić skuru pry ich źniaćci całkam realnaja.
Adna z samych dziŭnych navinak — kałahienavyja maski, jakija za noč stanoviacca prazrystymi. Dermatołahi tłumačać, što kaśmietyčny kałahien u jaho zvyčajnaj formie nie zdolny praniknuć u hłybokija słai skury i dziejničaje tolki jak časovy ŭvilhatnialnik na pavierchni. Dla stymulacyi vypracoŭki ŭłasnaha kałahienu patrebnyja inšyja kampanienty i pracedury.
Akramia taho, ekśpierty pa kaśmietycy nahadvajuć pra važnaje praviła biaśpieki: nieabchodna zaŭsiody prytrymlivacca instrukcyj vytvorcy i nie pakidać na ŭsiu noč masku, jakaja dla hetaha nie pryznačana. Jany ŭdakładniajuć, što kali maska źjaŭlajecca pilinham abo maje ŭ sastavie kisłoty (naprykład, hlikolevuju, małočnuju ci salicyłavuju), pakidać jaje na noč vielmi niebiaśpiečna. Heta moža vyklikać mocnaje razdražnieńnie, pačyrvanieńnie i paškodžańnie achoŭnaha barjera skury, bo takija srodki raźličany na ŭździejańnie ŭsiaho na niekalki chvilin.
U toj ža čas, kali maska maje ŭvilhatnialny abo zaspakajalny efiekt i źmiaščaje takija kampanienty, jak hiałuronavaja kisłata abo ałoe viera, praciahłaje vykarystańnie zvyčajna nie vyklikaje prablem.
Dyk jaki ž načny dohlad ličycca idealnym?
Na dumku kaśmietołahaŭ, efiektyŭny načny rytuał składajecca ŭsiaho ź niekalkich pravilna padabranych krokaŭ: dbajnaha dvuchetapnaha ačyščeńnia, vykarystańnia aktyŭnych kampanientaŭ (takich jak retynoidy i pieptydy) dla adnaŭleńnia i dastatkovaha ŭvilhatnieńnia dla padtrymańnia achoŭnaha barjera skury.
Ciapier čytajuć
Na Kipry źnik Uładzisłaŭ Baŭmhiertnier, były hiendyrektar «Urałkalija». Jaho zatrymlivali pa skandalnaj spravie ŭ Minsku1
Kamientary