Navina ab tydniovaj zabaronie pravodzić płanavyja aborty ŭ Biełarusi vyklikała abmierkavańni. Sabrali samyja załajkanyja kamientary, jakija adlustroŭvajuć hramadskuju dumku.
Videa ŭ adnym z kanałaŭ u tyktoku ź infarmacyjaj ab tydniovaj zabaronie płanavych abortaŭ sabrała za dva dni bolš za 450 tysiač prahladaŭ i zvyš 500 kamientaryjaŭ, niekatoryja ź jakich znajšli padtrymku ŭ tysiač karystalnikaŭ.
Biezumoŭnym lidaram staŭ kamientar, jaki nabraŭ zvyš 7700 łajkaŭ. Aŭtar koratka i dakładna sfarmulavaŭ hałoŭnuju pretenziju hramadstva da padobnych zachadaŭ:
«Liču, što nie dziaržavie treba vyrašać, naradžać žančynie ci nie»
Adrazu za im idzie mierkavańnie (zvyš 5100 łajkaŭ), jakoje pieravodzić dyskusiju z płoskaści pravoŭ u płoskaść abaviazkaŭ, ale nie žančyny, a dziaržavy. Karystalnik prapanuje alternatyŭny šlach pavyšeńnia naradžalnaści:
«Liču, što dziaržava pavinna ŭziać na siabie finansavuju padtrymku ŭ dastatkovym abjomie dla naradžeńnia dziaciej».
Zamykaje trojku lidaraŭ kamientar, jaki atrymaŭ zvyš 3400 łajkaŭ. Aŭtar stavić pad sumnieŭ samu efiektyŭnaść časovaj zabarony. Na dumku aŭtara, rašeńnie pra abort — heta ŭzvažany krok, na jaki tydniovaja paŭza naŭrad ci paŭpłyvaje:
«Kali žančyna idzie na taki krok, značyć, jana ŭžo ŭsio vyrašyła, tryźnieńnie».
Ideja pra toje, što kančatkovy vybar pavinien zastavacca za žančynaj, prahučała jašče raz u łakaničnym, ale vielmi papularnym kamientary (zvyš 2900 łajkaŭ):
«Heta vyrašaje tolki žančyna!»
Dumka pra finansavuju adkaznaść dziaržavy taksama znajšła svoj praciah. Kamientatar, jakoha padtrymali zvyš 1000 čałaviek, ź ironijaj prapanuje pašyryć inicyjatyvu:
«A dziaržava nie choča na tydzień zabiaśpiečyć usich dziaciej? Dapamahčy maci».
Karystalniki taksama źviartać uvahu na mahčymyja niehatyŭnyja nastupstvy takich zabaron. Aŭtar kamientara, jaki sabraŭ amal 900 łajkaŭ, papiaredžvaje pra sacyjalnyja ryzyki:
«Adčapiciesia ad žančyn. Potym ździŭlajucca, što zdajuć svaich dziaciej u dziciačy dom ci, horš za toje, pazbaŭlajucca ich».
Kab pakazać absurdnaść rašeńnia ŭładaŭ, niekatoryja źviarnulisia da čornaha humaru i sarkazmu.
«Tyja samyja žančyny, u jakich z-za hetaha tydnia prapuščany termin dobraachvotnaha pieraryvańnia, vielmi radyja», — napisaŭ adzin z karystalnikaŭ. Jaho padtrymała amal 640 čałaviek.
Siarod mienš załajkanych, ale papularnych kamientaroŭ, znoŭ hučyć tema asabistaj adkaznaści i toj cany, jakuju płacić žančyna. Voś mierkavańnie, jakoje padtrymali amal 300 čałaviek:
«Čamu niechta vyrašaje, naradžać žančynie ci nie? Jana zahubić svajo zdaroŭje, niervy na hetaje dzicia i svajo žyćcio. Nie dziaržavie hadavać dziaciej»
Niekatoryja vyviali dyskusiju za miežy kankretnaj zabarony i zakranuli pytańnie pryjarytetaŭ dziaržaŭnaj palityki ŭ cełym:
«Padniać zarobki ❌❌❌zabarona na aborty✅✅✅».
I, narešcie, apošni ŭ našym ahladzie kamientar (265 łajkaŭ), aŭtar jakoha prapanuje inšy šlach vyrašeńnia demahrafičnaj prablemy i adnačasova papiaredžvaje pra niebiaśpiečnyja nastupstvy abranaha ŭładami kursu:
«Kab pavysić naradžalnaść, treba pavysić uzrovień žyćcia, zarobki i h.d., a nie zabaraniać aborty, bo jany buduć, ale tolki padpolna, što moža naškodzić i dziciaci, i maci».
Kamientaŭ z asudžeńniem abortaŭ niašmat, ale jany taksama jość. Niekatoryja ludzi ćviorda ŭpeŭnienyja, što pieraryvańnie ciažarnaści — złačynstva:
«Abort — heta zabojstva, za heta treba davać termin pa 139‑m artykule».
«Abort kali zrabiła — u turmu treba takich».
«Zabojstvy žančynami dziaciej pavinny być zabaronienyja».
Jość i ludzi, jakija ličać inicyjatyvu pa ŭviadzieńni «tydnia biez abortaŭ» dobraj mahčymaściu dla žančyny jašče raz abdumać svajo rašeńnie:
«Moža, realna niechta pieradumaje i potym budzie radaja, što nie zrabiła».
«Pa sutnaści, pravilna, i ŭvohule hetak ža treba samomu rabić pierad rašeńniem: tydzień pačakać i zrazumieć, ci treba jano tabie».
«Heta niadrenna, dać žančynie čas padumać, škada, nie va ŭsich jość takaja mahčymaść».
«Biazvychadnych situacyj nie byvaje», nahadvaje čałaviek:
«Ja suprać abortaŭ, Boh daŭ [dzietak], značyć, i na dzietak daść. A kali nie choča žančyna dzicia, značyć, treba zaścierahacca, usio prosta! Mnohija marać pra dzietak, dyj biezvychodnych situacyj nie byvaje!»
Ciapier čytajuć
«Piensijanieram dzieci pieraškadžajuć!» U Breście nie pieršy miesiac iduć sprečki nakont miesca dla budaŭnictva dziciačaha sada5
Kamientary