Francuza asudzili da 30 hadoŭ za zabojstva žonki. Ni cieła nie znajšli, nie było śviedak, jak i nie było pramych ulik
Sud u Francyi pryznaŭ 38‑hadovaha Siedryka Žubilara vinavatym u zabojstvie svajoj žonki. Mužčynu, jaki na praciahu ŭsiaho pracesu nastojvaŭ na svajoj nievinavataści, pryhavaryli da 30 hadoŭ turmy.
Hetaja sprava admietnaja tym, što ŭ joj niama ni cieła, ni śviedak, a ŭsie dokazy suprać Žubilara — uskosnyja, piša Bi-bi-si.
«My pavažajem rašeńnie prysiažnych, — skazaŭ advakat abarony Alaksandr Marcin. — Kaniečnie, my rasčaravanyja, ale my viedali, što nas čakaje jašče adna bitva, i my budziem pracavać nad apielacyjaj».
Abarona Žubilara nastojvała, što pakolki cieła jaho žonki tak i nie znajšli, to niama dokazaŭ taho, što było ździejśniena złačynstva.
Siedryk Žubilar źviarnuŭsia ŭ palicyju z nahody źniknieńnia svajoj žonki Delfin ranicaj 16 śniežnia 2020 hoda. Para, u jakoj dvoje dziaciej va ŭzroście šaści i paŭtara hadoŭ (na toj momant), žyła ŭ Kańjak-le-Min, u paŭdniova-zachodnim rehijonie Aksitanija.
Maštabnyja pošuki nie pryviali ni da jakich vynikaŭ: cieła Delfin tak i nie znajšli.
Pry hetym abvinavačvańnie sabrała dastatkova ŭskosnych dokazaŭ, kab pierakanać sud prysiažnych u vinavataści mužčyny.
Tak, prakurory raskazali, što viečaram pierad svaim źniknieńniem Delfin upieršyniu skazała svajmu mužu, što ŭ jaje źjaviŭsia paluboŭnik. U vyniku jany pasvarylisia (kryki žančyny čuli susiedzi) i Siedryk, miarkuje abvinavačvańnie, zadušyŭ svaju žonku.
Adnym z hałoŭnych dokazaŭ suprać Siedryka Žubilara staŭ toj fakt, što mašyna Delfin była pryparkavana kala ich doma nie tak, jak jana zvyčajna pakidała jaje: heta, miarkuje śledstva, pakazvaje na toje, što mužčyna karystaŭsia mašynaj toj samaj nočču.
Inšyja dokazy — taksama ŭskosnyja: złamanyja akulary Delfin u haścinaj; adsutnaść danych ab projdzienych krokach u telefonie Siedryka (jon śćviardžaŭ, što vychodziŭ z domu šukać svaju žonku); zajava ich syna Łui (jamu ŭ 2020 hodzie było šeść hadoŭ), što jon čuŭ sprečku baćkoŭ «pamiž kanapaj i jołkaj».
Žubilar byŭ adpraŭleny na psichałahičnaje abśledavańnie, jakoje pakazała, što ŭ jaho było ciažkaje dziacinstva, u darosłym uzroście jon kožny dzień kuryŭ marychuanu i nie moh doŭha ŭtrymacca na pracy. Jon nie prajaŭlaŭ asablivaj zaniepakojenaści z nahody źniknieńnia svajoj žonki i nieŭzabavie paśla jaje prapažy źniaŭ hrošy z rachunku Delfin.
Jaho maci dała pakazańni, pavodle jakich, kali Delfin upieršyniu paprasiła jaho ab razvodzie, Siedryk skazaŭ: «Ź mianie chopić. Ja zabju jaje i zakapaju jaje, i nichto nie znojdzie jaje cieła».
Advakat Žubilara Emanuel Frank zajaviła, što heta ŭsiaho tolki śpiekulacyi. «U sudach nie asudžajuć drennych ludziej. Jany asudžajuć vinavatych», — skazała jana.
Abarona nastojvaje, što dla ŭsich uskosnych dokazaŭ možna znajści inšyja tłumačeńni. Pa słovach advakataŭ Žubilara, śledčyja natreniravali śviedak, kab ich pakazańni paćviardžali viersiju ab vinavataści mužčyny.
Havaryli advakaty i ab tym, što ŭ vypadku złačynstva na hlebie straści — zabojstva žonki z reŭnaści — byli b albo vidavočnyja ślady (takija jak kroŭ), albo prykmiety starannaj uborki. Ni taho, ni druhoha ŭ domie Žubilaraŭ nie było.
Advakaty miarkujuć, što pavodziny i zvyčki Siedryka nie majuć dačynieńnia da spravy.
«Albo jon — kryminalny hienij, albo źlohku idyjot — vam vyrašać», — skazała Emanuel Frank.
Abarona nie dała alternatyŭnaha tłumačeńnia źniknieńniu Delfin Žubilar.
Kamientary