Hazłajtynh, žančyna ŭ biadzie i himn śmiełaj žurnalistycy. Čamu varta pahladzieć novy chit Netflix «Žančyna z kajuty №10»
Na Netflix tydzień tamu vyjšaŭ zachaplalny tryler «Žančyna z kajuty № 10» z Kiraj Najtli. Čamu hety film — vydatnaje vosieńskaje kino dla tych, chto lubić detektyvy i historyi pra mocnych žančyn.
U asnovie filma — adnajmienny biestsieler 2016 hoda brytanskaj piśmieńnicy Rut Viejer, adnoj z samych papularnych sučasnych aŭtarak psichałahičnych detektyvaŭ i tryleraŭ, piša ŭkrainski Vogue.
Rut Viejer — 48 hadoŭ, jana žyvie na poŭdni Anhlii na ŭźbiarežžy mora i nadzvyčaj umieła stvaraje zmročnyja, zabłytanyja historyi, u centry jakich zvyčajna žančyny, što traplajuć u niebiaśpiečnyja situacyi, źviazanyja z zabojstvami. Rut Viejer stała viadomaj u 2015 hodzie paśla vychadu ramana «U ciomnym, ciomnym lesie», jaki raspaviadaje pra žančynu, što naviedvaje dziavočnik siabroŭki dziacinstva, pra jakuju ničoha nie čuła ŭžo šmat hadoŭ. Viečarynka adbyvajecca ŭ izalavanym šklanym damku ŭ lesie, i tam adbyvajecca niešta žudasnaje…
Siońnia ŭ biblijahrafii Viejer — bolš za 10 ramanaŭ, u tym liku i «Dziaŭčyna z kajuty № 10», jaki ŭvajšoŭ u dziasiatku najlepšych biestsieleraŭ brytanskaj haziety Sunday Times i The New York Times.
Hałoŭnaja hierainia ekranizacyi, što vyjšła na Netflix, — žurnalistka Łora Błekłok (Kira Najtli), jakaja piša pra padarožžy dla časopisa. Adnaho razu jana atrymlivaje zadańnie mary: pravieści tydzień na novym raskošnym łajniery, što padarožničaje narviežskimi fijordami, i napisać pra heta repartaž, — a taksama pra ŭładalnika jachty, bahacieja Ryčarda Bułmiera (Haj Pirs), jaki razam ź nievylečna chvoraj žonkaj Eni, jakaja na čaćviertaj stadyi raku, zasnavaŭ dabračynny fond.
Na jachcie Łora znajomicca z kamandaj i ŭpłyvovymi haściami Bułmiera, i ŭsio vyhladaje idealna: raskošnyja kajuty, śvieckija viečaryny, ihrystaje ljecca rakoj. Da taho momantu, pakul adnoj nočy Łora nie čuje kryki i nie bačyć, jak niechta skidaje ŭ vadu žančynu, jakaja, jak joj zdajecca, žyła ŭ kajucie numar 10. Adnak ekipaž i pasažyry zapeŭnivajuć, što ŭ hetaj kajucie nikoli nikoha nie było.
Na praciahu filma Łora sprabuje pierakanać usich, što jana sapraŭdy bačyła, jak niechta skidaŭ žančynu ŭ vadu, adnak z kožnym krokam stanovicca ŭsio mienš nadziejnaj apaviadalnicaj, bo ŭsie vakoł śćviardžajuć, što joj heta padałosia.
Situacyju paharšaje i toje, što ŭ Łory jość schilnaść da ałkaholu, tryvožnaść, jana pieražyła depresiju i sama pačynaje sumniavacca ŭ tym, što bačyła…
Kali vam zdajecca, što z padobnym siužetam vy ŭžo sutykalisia — vam nie zdajecca: sapraŭdy, historyja pra pryhody žurnalistki na jachcie nahadvaje siužet knihi «Dziaŭčyna ŭ ciahniku» Poły Chokins, ekranizavanaj u 2016 hodzie (z Emili Błant u hałoŭnaj roli), i «Žančyna ŭ aknie» E.Dž. Fin (2021), dzie hałoŭnuju rolu vykanała Emi Adams.
Siužet u hetych detektyŭnych historyjach raźvivajecca padobnym čynam: žančyna, što padarožničaje (albo znachodzicca ŭ zakrytym pamiaškańni), stanovicca śviedkaj zabojstva, ale źjaŭlajecca nienadziejnaj apaviadalnicaj, bo maje psichałahičnyja prablemy albo prablemy z ałkaholem. A hałoŭnaja zadača hledača — zrazumieć, ci varta joj vieryć.
Akramia ŭžo zhadanych detektyvaŭ, «Žančyna z kajuty № 10» nahadvaje «Śmierć na Nile» Ahaty Kryści, i piśmieńnica Rut Viejer nie chavaje, što Ahata Kryści — adna ź jaje lubimych aŭtarak i biaskoncaja krynica natchnieńnia.
Film režysiora Sajmana Stouna dobra pieradaje hetuju amal chičkokaŭskuju napruhu, jakaja ŭzmacniajecca tym, što hieroi znachodziacca razam u zamknionaj prastory.
Nad scenaram režysior pracavaŭ razam z Džo Šrapnełam i Anaj Voterchaŭs, scenarystami napružanaha trylera «Rebieka» 2020 hoda, što staŭ remiejkam adnajmiennaha filma Chičkoka. Sam ža Stoun pryznajecca, što natchniaŭsia paranaidalnymi trylerami 70‑ch hadoŭ.
Biez sumnievu, najlepšaje ŭ hetym filmie — Kira Najtli ŭ roli razumnaj, dalikatnaj Łory. Jaje hulnia, jak piša ŭ svajoj recenzii vydańnie Collider, pieratvaraje toje, što mahło być pramoj historyjaj pra «žančynu ŭ biadzie», u niešta vostraje.
Kira Najtli ŭvasablaje nie isteryčnuju žančynu, a razumnuju i mocnuju žurnalistku; aktorka nadaje svajoj hieraini cichi, emacyjny intelekt.
Askaranosnaja Najtli pa-majstersku pakazvaje, jak jaje hierainia pačynaje varjacieć praz hazłajtynh i toje, što apynułasia siarod taksičnych ludziej, jakija joj škodziać.
I mienavita jaje ihra robić «Žančynu z kajuty № 10» vartaju ŭvahi.
Kamientary
Hučyć tak, byccam hety sieryjał vyklučna dla fieministak.
Nazvać vydatnym kino - čarhovaje prachadnaje netfliksmuvi z usim viadomym siužetam...
Zaraz u kinateatrach vydatnaja i vielmi aktualnaja praca ad Poła Tomasa Andersana. A rekamiendavać hladzieć kino druhoha hatunku tolki kab pabačyć Kiru Najtli - vielmi sumnieŭny vybar.
Ale dziaŭčynkam-fieministkam, kali niama čaho rabić, to moža i okiej.
A kali toje samaje adbyvajecca z žančynaj, to heta ŭžo hazłajtynh i baraćba za pravy. :)