22‑hadovaja biełaruska žyvie ŭ Novaj Ziełandyi i raskazvaje, jak jano
Paŭhoda tamu Alaksandra pierajechała ź Biełarusi ŭ Novuju Ziełandyju. U svaim tyktoku i na jutub-kanale dziaŭčyna raskazvaje pra žyćcio na inšym baku płaniety i pościć malaŭničyja kadry ź plažami, palmami i hornymi viaršyniami.
Alaksandry 22 hady. Paśla škoły jana pastupiła va ŭniviersitet, kab vyvučać niamieckuju movu, ale na druhim kursie adličyłasia — maŭlaŭ, tam było šmat lišnich pradmietaŭ, akramia movaŭ. Praź niejki čas dziaŭčyna pačała zarablać na sacsietkach. Kali joj było 19, Saša pierajechała ŭ Polšču, stała padarožničać pa Jeŭropie i zdymać pra heta videa.
Adnojčy na jaje padpisaŭsia chłopiec z Novaj Ziełandyi, jany pačali pierapisvacca. I zakruciłasia:
«Praz hod kamunikacyi jon prapanavaŭ, kab my sustrelisia, pryjazdžaŭ u Biełaruś. Potym my pačali sprabavać rabić mnie vizu, kab ja pryjechała ŭ Novuju Ziełandyju. Ja tady navat nie vieryła, što zmahu tut apynucca, mozh nibyta abmiažoŭvaŭ takuju dumku.
My padalisia na vizu niedzie ŭ listapadzie 2024-ha, i praz dva miesiacy ja jaje atrymała. Heta była elektronnaja haściavaja viza na hod, pa jakoj ja mahła tam znachodzicca tolki paŭhoda i musiła vyjazdžać kožnyja try miesiacy».
Novaja kraina Sašy vielmi spadabałasia:
«U Novaj Ziełandyi zusim niama niebiaśpiečnych žyviołaŭ, niama pavukoŭ i źmiej, jak u Aŭstralii. Tut možna chadzić dzie zaŭhodna, nie bajučysia, što sustreniecie anakondu. Heta nie trapičny vostraŭ, tut takija ž chvojnyja drevy, jak u nas, chacia jość i svaje ŭnikalnyja raśliny, jość palmy. Mnie padabajecca, što heta nie trapičny klimat, jon nahadvaje Jeŭropu.
Taksama mnie daspadoby, što Novaja Ziełandyja — heta nie pieranasielenaja kraina, možna padarožničać biez natoŭpaŭ turystaŭ».
Saša žyvie kala Vielinhtana, heta stalica krainy i vielmi vietrany horad. Pakolki Novaja Ziełandyja znachodzicca paraŭnalna blizka da Anktarktydy, adtul u krainu traplaje šmat viatroŭ. A jašče nadvorje ŭ Novaj Ziełandyi vielmi chutka źmianiajecca, i byvajuć vialikija pierapady tempieratury.
«Ja pryjechała siudy ŭ krasaviku, kali tut była vosień. Kali vy nie viedajecie, u Novaj Ziełandyi ŭsio naadvarot: kali ŭ Jeŭropie leta, tut — zima.
Dla vosieni nadvorje było sapraŭdy kamfortnaje, było ciopła, ale potym pačałasia zima. Za hod ja pieražyła dźvie zimy!
Naša jeŭrapiejskaja zima bolš suvoraja i chałodnaja, i ja nie mahu skardzicca, bo ŭ Novaj Ziełandyi sapraŭdy adnosna ciopła — siaredniaja tempieratura [zimoj] niedzie +15 hradusaŭ».
Zdavałasia b, vydatna? Ale pry hetym, kaža biełaruska, u novaziełandskich damach niama centralnaha aciapleńnia, i dobra, kali doma jość kamin:
«Sapraŭdy pačało nadakučvać, kali tabie rankam, uviečary abo ciaham usiaho dnia treba mierznuć doma z kandycyjanieram, ty siabie adčuvaješ niekamfortna».
Novaja Ziełandyja znachodzicca ŭ zonie azonavaj dzirki, tamu na vulicy možna chutka abhareć pad soncam. Jašče heta siejsmaaktyŭnaja zona — u krainie jość aktyŭnyja vułkany i mahčymyja ziemlatrusy.
Kraina addalenaja ad amal usich nasielenych kantynientaŭ, za vyklučeńniem Aŭstralii. Saša nazyvaje heta i plusam, i minusam. Z adnaho boku, heta spryjaje biaśpiecy, bo Novaja Ziełandyja addalenaja i ad šmatlikich maštabnych zdareńniaŭ, ale, ź inšaha boku, heta kraj śvietu, i dabiracca adtul da Jeŭropy vielmi składana — takaja pajezdka moža kaštavać niekalki tysiač dalaraŭ. Biełaruska dzielicca, što pryniać takuju addalenaść psichałahična niaprosta.
Darečy, pra ceny. Žyćcio ŭ Novaj Ziełandyi darahoje:
«Naprykład, 20 jajek buduć kaštavać 15 novaziełandskich dalaraŭ (prykładna 7,5 jeŭra — NN). Liču, što tut padobnyja ceny da Amieryki, ale šmat chto skardzicca, bo pracy mała. Šmat ludziej pierajazdžaje ŭ Aŭstraliju».
Biełaruska pryznajecca, što ŭ jaje novym žyćci šmat prablem. Jaje ciahnie dadomu, jana nie maje ŭ Novaj Ziełandyi siabroŭ. Ale dziaŭčyna trymajecca, bo źviartaje ŭvahu tolki na dobraje.
Saša nazyvaje Novuju Ziełandyju najpryhažejšaj krainaj. I, hledziačy pa jaje błohach, joj možna pavieryć. Biełaruska rehularna publikuje fota i videa, źniatyja ŭ malaŭničych kutkach krainy: naprykład, na fonie zaśniežanych hornych viaršyń, vadaspadaŭ i zialonych uzhorkaŭ.
Life in New Zealand is like
I pry hetym u Novaj Ziełandyi možna zanudzicca — pa słovach Sašy, pra heta kaža pałova jaje novaziełandskich znajomych:
«Treba razumieć, što Novaja Ziełandyja — heta ŭsio-tki nie Ibica i nie Barsiełona. Viadoma, u Oklendzie jość roznyja mierapryjemstvy, jość niejkija kłuby, viečaryny i hetak dalej. Ale ŭ paraŭnańni ź jeŭrapiejskimi haradami, Amierykaj i hetak dalej, tut, viadoma, bolš nudna.
Ale kali vy lubicie pryrodu, chajkinh i niejkija aktyŭnyja vidy sportu, heta kraina dla vas».
«Naša Niva» — bastyjon biełaruščyny
PADTRYMAĆCiapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie12
Kamientary
V Minskie v riestoranach/kafie mnoho vidieł biełarusok s inostrancami — točno vsie po lubvi byli i pieriejezd v druhije strany ich nie intieriesovał.