Pavodle danych Biełaruskaj aŭtamabilnaj asacyjacyi, na dolu Lada prychodzicca 26% prodažaŭ novych aŭto aficyjnymi dylerami. Pacikavilisia ŭ byłych i ciapierašnich ułaśnikaŭ pra ich uražańni ad aŭto rasijskaj marki.
Biełarusy lubiać univiersały
Samaja papularnaja Lada na biełaruskim rynku — Vesta. I heta chiba adziny aŭtamabil biudžetnaha siehmientu, dasiažny ŭ kuzavie ŭniviersał, što dla mnohich i pasłužyła hałoŭnaj pryčynaj pry vybary hetaha aŭto.
Rynak b/u aŭto paćviardžaje, što mienavita ŭniviersały Lada karystajucca najbolšym popytam. Z 500 pradadzienych Lada Vesta i Vesta Cross 350 mašyn majuć kuzaŭ univiersał.
Surazmoŭca, jaki ŭ 2021 hodzie nabyŭ sabie Lada Vesta SW Cross, zhadvaje, što tady heta byŭ vielmi papularny aŭtamabil, jaki davoli cikava vyhladaŭ, mieŭ vysoki klirens i, samaje hałoŭnaje, byŭ dastupny va ŭniviersale.
«Dla pajezdak pa horadzie, na rybu i na daču samaje toje», — kaža mužčyna. Čatyry hady tamu jon nabyŭ novuju Lada pa canie kala $18 tysiač pa tahačasnym kursie.
«Mašynu kuplaŭ nie ŭ kredyt, a za najaŭnyja. Ja tady atrymaŭ spadčynu, pradaŭ svoj Peugeot 406 univiersał za try tysiačy, dakłaŭ i nabyŭ sabie novy aŭtamabil, bo nie chaciełasia pastajanna kałupacca ŭ mašynie», — raskazvaje surazmoŭca.
Mužčyna kaža, što ŭ cełym svaim vybaram zadavoleny, pakolki za čatyry hady i krychu bolš za 60 tysiač prabiehu aŭtamabil nie dastaviŭ jamu asablivych turbot.
«U mianie viersija jašče z ruchavikom 1,6 litra ad Renault (da vajny na šerah madelaŭ Lada ŭstaloŭvali ruchaviki Renault — NN), jon ličycca vielmi nadziejnym.
Akramia standartnaha absłuhoŭvańnia, u mašynie ničoha nie złamałasia. Adzinaje, što niepryjemna ździviła, dyk heta toje, što zadnija tarmaznyja barabany iduć razam z padšypnikami. Daviałosia mianiać niedzie z hod tamu. Detali razam z rabotaj paciahnuli kala $350», — kaža surazmoŭca.
Siarod minusaŭ jon vyłučaje nieabchodnaść rabić antykarazijnuju apracoŭku, kab źnizić ryzyku źjaŭleńnia iržy, a taksama nizki ŭzrovień šumaizalacyi. Zamianiać aŭto jon pakul nie źbirajecca, bo pa jaho słovach, vybaru asabliva niama.
«Siedany mianie nie cikaviać, tamu alternatyvy niama, choć z ulikam vielmi dobraha stanu aŭto i małoha prabiehu, dumaju, mahu pradać jaje niedzie za $14 tysiač. Ale, naprykład, kuplać restajlinhavuju Vesta nie baču sensu, bo tam užo VAZaŭski ruchavik i šmat inšych detalaŭ, jakija byli zamienieny praz sankcyi, a maja staraja Vesta — heta jašče šmat u čym Renault», — kaža aŭtamabilist.
Novaja mašyna za $7500?
Inšy surazmoŭca byŭ ułaśnikam Lada Granta, jakaja źjaŭlajecca samaj dastupnaj u liniejcy aŭtavytvorcy.
U 2019‑m novaja Granta ŭ kamplektacyi Comfort+ (u jakoj byŭ bartavy kampjutar, kandycyjanier, ABS i adna paduška biaśpieki) kaštavała kala $8500.
«Pry kupli dakredytoŭvaŭsia na bolšuju častku sumy, choć heta i była spačatku samaja tannaja mašyna na rynku», — kaža aŭtaamatar.
Mužčyna adznačaje, što z ulikam taho, što ŭ 2020‑m biełaruski rubiel pačaŭ prasiadać, to ŭ niejki momant novyja Granta ŭ pieraliku na dalary kaštavali ŭsiaho kala $7500.
Tym nie mienš nizkaja cana aŭto adčuvałasia na kožnym kroku.
«U aŭtamabila prosta žachlivyja tarmazy. Pryblizna da siaredziny nacisku na piedal mašyna praktyčna nie tarmozić. Padumaŭ, što niešta nie tak, ale vyśvietliłasia, što heta takaja asablivaść u hetaj madeli, da jakoj prosta treba pryzvyčaicca. Heta było niaprosta i niepryjemna, bo paśla siadaješ na narmalnaje aŭto, pa zvyčcy mocna ciśnieš na tormaz — i ŭ vyniku ledź nie vylataješ u łabavoje škło», — kaža były ŭłaśnik Granta.
Taksama mužčyna adznačyŭ, što ŭ aŭtamabila žachlivaja šumaizalacyja, nijakaja kiravanaść i vielmi niazručny zadni rad siadzieńniaŭ. Byli narakańni i na pracu karobki pieradač.
«Karobka pracavała vielmi šumna, ale, jak vyśvietliłasia na servisie, heta jašče adna «asablivaść», tak i treba. Pałaziŭšy pa forumach, znajšoŭ paradu zalić admysłovuju prysadku, pasprabavaŭ — i stała pracavać krychu cišej. Šumaizalacyju taksama daviałosia dadavać, bo jechać pa trasie było nievynosna».
Nivodnaha elemienta biez karozii
Stojkaść da karozii ŭ Granta taksama nie na samym vysokim uzroŭni. Pa słovach byłoha ŭłaśnika, pieršyja prajavy pačali źjaŭlacca paśla pieršaj zimy, heta značyć, kali mašynie było ŭsiaho paŭhoda.
«Praz dva hady ekspłuatacyi na mašynie nie zastałosia nivodnaha elemienta, na jakim nie było b «ryžykaŭ». I heta pry tym, što paśla kupli ja rabiŭ dadatkovy antykor».
U vyniku ŭ pačatku 2022 hoda mužčyna pradaŭ aŭto paśla avaryi.
«Ja byŭ paciarpiełym u DTZ, tamu mnie naličyli strachoŭku. Ramantavać aŭto nie było i dumki, tamu ja pradaŭ jaho ŭ avaryjnym stanie. Pa mašynu pryjechaŭ niejki taksist, jakomu była patrebna tannaja mašyna z małym prabieham. Ja za dva z kapiejkami hady najeździŭ na joj usiaho 27 tysiač. Pakupnik skazaŭ, što sam usio adramantuje, pafarbuje z bałončyka, ustaluje haz i adpravić aŭto ŭ pracu».
Były ŭłaśnik Granta kaža, što adziny plus hetaha aŭto — nizkaja cana.
«Aproč cany, plusaŭ niama nijakich. Ale z časam i hety plus źnik, bo kali hadoŭ piać tamu maja Granta kaštavała $8500, to ciapier aŭto ŭ anałahičnaj kamplektacyi budzie kaštavać kala $12 tysiač».
Mužčyna dadaje, što kali niama hrošaj na narmalnaje novaje aŭto, to lepiej uziać patrymanaje, čym novuju Lada.
Jak Lada pakazała siabie ŭ taksi?
Inšy surazmoŭca, jaki maje nievialiki aŭtapark taksi, pra aŭtamabili marki Lada adhukajecca vyklučna niehatyŭna.
«U pieryjad deficytu novych aŭto paśla 2022‑ha nabyŭ novuju Vesta 1,8 na aŭtamacie, bo adna z mašyn raźbiłasia ŭ DTZ. Da hetaha Lada ŭ maim aŭtaparku nie było, a tolki VW Polo i Skoda Rapid», — kaža mužčyna.
Ź jaho słoŭ, aŭtamatyčnaja karobka pieradač vyjšła z ładu ŭsiaho na 16 tysiačach prabiehu.
«Paśla ramontu karobki pieradač mašyna prajechała ŭsiaho kala 10 tysiač — i znoŭ złamałasia. U pramiežku pamiž ramontami byli pytańni pa elektronicy. Atrymlivałasia, što mašyna bolš staić u ramoncie, čym jeździć», — skardzicca surazmoŭca.
B/u aŭto moža być bolš nadziejnym za novaje?
Paśla čarhovaha ramontu AKPP mužčyna vyrašyŭ pradać mašynu, bo dla pracy ŭ taksi krytyčna važna, kab mašyna łamałasia jak možna mienš.
«Ja dla taho i kuplaŭ novyja mašyny, kab jany pracavali, a nie pastajanna byli na servisie. Takija prastoi niavyhadnyja ni mnie, ni kiroŭcam».
Kalehi, jakija majuć Lada Vesta ŭ aŭtaparku, patłumačyli mužčynu, što Vesta stała prablemnaj paśla taho, jak Renault pierastaŭ supracoŭničać z AŭtaVAZam.
«Maŭlaŭ, staryja Lada Vesta, dzie stajaŭ ruchavik ad Renault, byli kudy bolš nadziejnyja, a voś abnoŭlenuju viersiju, dzie ŭsio ładaŭskaje, lepš nie brać», — tłumačyć mužčyna.
Ciapier dla pracy jon praciahvaje nabyvać tolki VW Polo i Skoda Rapid. Abiedźvie madeli da 2022 hoda vypuskali ŭ Rasii.
«Novych ich daŭno niama, tamu zaraz davodzicca palavać na mašyny apošnich hadoŭ vypusku, jakija byli nie ŭ taksi ci na firmach, a ŭ pryvatnych ułaśnikaŭ, jakija za hod najazdžali da 10‑15 tysiač kiłamietraŭ. Takich varyjantaŭ niašmat, i prosiać za ich, jak praviła, niamała, ale lepš nabyć b/u VW Polo ci Skoda Rapid z małym prabieham, čym novuju Lada ci niejkaha «kitajca».
U hetych mašyn vielmi vialiki resurs, jany za šmat hadoŭ dobra zarekamiendavali siabie ŭ taksi, čaho nie skažaš pra Lada».
Ciapier čytajuć
«Zachoŭvajcie cisk na režym i padtrymlivajcie naš narod». Tekst vystupu Cichanoŭskaj u Jeŭraparłamiencie3
Kamientary
Vsio ravno po łajnu jezdiť ))