Na matčy Italija — Izrail buduć zadziejničany kinołahi, sapiory, bieśpiłotniki, technałohija vyjaŭleńnia zbroi i vybuchoŭki
Zbornaja Italii prymie zbornuju Izraila ŭ aŭtorak va Udzine ŭ ramkach 8‑ha tura kvalifikacyi da čempijanatu śvietu pa futbole.
Ułady ŭzmacnili miery biaśpieki pierad matčam, jaki ličycca «nadzvyčaj vysokaryzykoŭnym». Vakoł stadyjona ŭviedzienaja čyrvonaja zona, piša sports.ru.
Priefiekt Udzine Damienika Lijone vykazaŭ zaniepakojenaść u suviazi z prapaleścinskaj demanstracyjaj, jakaja pavinna adbycca ŭ aŭtorak udzień u centry horada i moža sabrać da 10 000 udzielnikaŭ. Jon ličyć, što akcyja «moža stvaryć mahčymaść dla praniknieńnia ahresiŭnych hrupovak, što moža stvaryć pahrozu biaśpiecy».
Na matčy čakajecca kala 5 000 hledačoŭ, u tym liku 51 izrailcianin, pry ahulnaj umiaščalnaści areny 25 000 čałaviek. Na stadyjonie budzie razhortvacca maštabnaja antyterarystyčnaja apieracyja. Buduć zadziejničanyja kinołahi, sapiory, bieśpiłotniki, a taksama technałohii vyjaŭleńnia zbroi i vybuchovych rečyvaŭ.
Pieršyja aharodžy vakoł stadyjona ŭžo ŭstanoŭleny, a na bramkach buduć raźmieščany mietałašukalniki i bietonnyja barjery dla filtracyi płyni zaŭziataraŭ i praduchileńnia niesankcyjanavanaha dostupu.
Akramia taho, u aŭtorak budzie zabaronieny prodaž i ŭžyvańnie praduktaŭ i napojaŭ u šklanoj i kieramičnaj tary, a taksama ŭ blašankach — za miežami stadyjona i ŭ najbolš uraźlivych rajonach centra horada.
Taksama płanujecca maštabnaje razhortvańnie sił pravaparadku — palicyi, karabinieraŭ i Finansavaj hvardyi (italjanskaja vajenizavanaja palicyja, što ŭvachodzić u skład Ministerstva ekanomiki i finansaŭ) — dla manitorynhu terytoryi horada i praduchileńnia patencyjnaj napružanaści pamiž pratestoŭcami i zaŭziatarami.
Miery biaśpieki buduć pastupova ŭzmacniacca da pačatku matču, u vyniku čaho terytoryja vakoł stadyjona pieratvorycca ŭ zonu z abmiežavanym dostupam, žorstkim kantrolem i abmiežavanymi maršrutami dla hledačoŭ.
U subotu Izrail hulaŭ u haściach u Narviehii. U Osła prajšła prapaleścinskaja demanstracyja, u tym liku palili ściahi Izraila.
Ciapier čytajuć
Łukašenka pra vyzvaleńnie palitviaźniaŭ: Chočuć zastacca ŭ Biełarusi — kali łaska1
Kamientary